ԵՊՀ-ն ոչ միայն կրթական կարևորագույն հասցե, այլև միջմշակութային հաղորդակցության խաչմերուկ. ամերիկացի ուսանողները ԵՊՀ-ում

Մեզ հետ զրույցում օտարերկրյա ուսանողները պատմեցին համալսարանից ստացած իրենց տպավորությունների, Հայաստանի հանդեպ հետաքրքրության և ապագայի ծրագրերի մասին։

«Օտարերկրյա ուսանողները հիանալիորեն ինտեգրվում են ԵՊՀ-ին». Պատրիկ Ֆոլի 

Վիսկոնսին-Մեդիսոնի համալսարանի ուսանող Պատրիկ Ֆոլին, որը հայրենիքում ուսումնասիրում է «Ֆինանսներ» և «Ռուսերեն», ԵՊՀ-ն պատահականորեն չի ընտրել: 

«Ես ընտրեցի ԵՊՀ-ն իր ունեցած հեղինակության համար, ինչպես նաև այն պատճառով, որ այստեղ օտարերկրյա ուսանողները բավականին հեշտ են ինտեգրվում քաղաքին ու ուսանողական համակազմին»,- նշում է Պատրիկը։ 

Ռուս բանասիրության ֆակուլտետում «Ռուսաց լեզու և մշակույթ» ուղղությամբ մասնագիտանալուն զուգահեռ՝ նա հաճախել է նաև հայոց լեզվի դասընթացների։ Անդրադառնալով ռուսերենի կարևորությանը՝ Պատրիկն ընդգծում է, որ չնայած աշխարհում դրա ազդեցության նվազմանը՝ այն շարունակում է մնալ կարևոր լեզու՝ հաշվի առնելով ընթացիկ իրադարձություններն ու այդ լեզվով խոսողների մեծ թիվը։ 

Նա բարձր է գնահատում ԵՊՀ դասախոսական կազմի աշխատանքը. «Դասախոսները հիանալի աշխատանք են կատարում, նրանք իսկապես խրախուսող և աջակցող են»։

Պատրիկը ԵՊՀ կրթական ծրագրերի, դասավանդման մեթոդների, միջավայրի, դասախոսների և ուսանողների վերաբերմունքի մասին իր գոհունակությունն ընդմիջում է հումորով՝ ժպիտով հիշելով համալսարանի լսարանների նստարանները. «Ես կփոխեի միայն նստարանները. դրանք այնքան էլ հարմարավետ չեն»։ 

Առաջին անգամ Հայաստանում գտնվող ամերիկացի ուսանողին հասցրել է ապշեցնել տեղի մթնոլորտը. «Պարզապես հիացած եմ մարդկանց հյուրընկալությամբ և բարյացակամությամբ»։ 

«Երբ անգամ նախկին ԽՍՀՄ երկրներն են հեռանում ռուսերենից, այն այնուամենայնիվ մնում է կենսական լեզու». Ջուլիան Գորն

Օհայոյի Օբերլին քոլեջի ուսանող Ջուլիան Գորնը, որը մասնագիտանում է «Ռուսաց լեզու և պատմություն» ուղղությամբ, ԵՊՀ-ն ընտրել է Ամերիկյան խորհուրդների երաշխավորությամբ. «Ես ընտրեցի ԵՊՀ-ն՝ որպես Հայաստանի ամենահին և կարևորագույն համալսարաններից մեկը, քանի որ վստահում եմ Ամերիկյան խորհուրդների գնահատականին»:

Նրա ուսումնական ծրագիրը բավականին հագեցած է՝ «Աշխարհագրություն», «Ռուսաց լեզվի քերականություն», «Ռուս գրականություն», «Հայոց պատմություն և մշակույթ», «Ռուսերենի հնչյունաբանություն» և «Հայերեն»։ Բացի հայերենից՝ բոլոր առարկաները դասավանդվում են ռուսերենով։ 

Ջուլիանը ևս կարևորում է ռուսաց լեզվի դերը. «Այն շարունակում է մնալ կենսական լեզու, երբ անգամ նախկին ԽՍՀՄ երկրները հեռանում են ռուսերենից՝ հաշվի առնելով արտաքին հարաբերությունների ներկա վիճակը, ինչպես նաև այն փաստը, որ ռուսերենով աշխարհում դեռևս խոսում է ավելի քան 200 միլիոն մարդ»։ 

ԵՊՀ-ի դասավանդման մեթոդները Ջուլիանին գոհացնում են, թեև նկատում է տարբերություն, երբ համեմատում է իրենց համալսարանի հետ. «Մանկավարժությունը տարբերվում է, սակայն տարբերվող մոտեցումները տեսնելը, սովորելը ևս կարող են օգտակար լինել»։ 

Ապագայում ամերիկացի ուսանողն իրեն տեսնում է որպես Արևելյան Եվրոպայի պատմաբան, գրադարանավար կամ քաղաքաշինարար։ 

Ջուլիանի համար ևս սա առաջին այցն է Հայաստան, և նա նույնպես տպավորված է տեղի բնակիչների վերաբերմունքից. «Ինձ ամենից շատ տպավորել է այն, թե որքան հյուրընկալ են հայերը»։ 

Ի տարբերություն իր համակուրսեցու՝ նա ԵՊՀ-ում որևէ փոփոխություն կատարելու անհրաժեշտություն չի տեսնում:

«Ոչ մի բան չեմ կարողանում մտաբերել, որ կցանկանայի փոխվեր»,- շեշտում է նա՝ վկայելով այն մասին, որ համալսարանի պայմանները լիովին համապատասխանում են իր ակնկալիքներին։