ԵՊՀ ՀԽ-Ն ՀԱՎԱՆՈՒԹՅՈՒՆ Է ՏՎԵԼ ՌԵԿՏՈՐԻ ՀԱՇՎԵՏՎՈՒԹՅԱՆԸ

Նիստի օրակարգը հաստատելուց հետո ԵՊՀ ռեկտոր Հովհաննես Հովհաննիսյանը Հոգաբարձուների խորհրդին ներկայացրեց 2020-2021 ուստարվա ԵՊՀ գործունեության վերաբերյալ ռեկտորի հաշվետվությունը՝ տեղեկացնելով տարբեր ուղղություններով իրականացված ծրագրերի, գրանցած արդյունքների և արված աշխատանքների մասին:

Ռեկտորի ելույթից, նրան ուղղված հարցերից ու պատասխաններից հետո ԵՊՀ հոգաբարձուների խորհուրդը միաձայն որոշեց հավանություն տալ 2020-2021 ուսումնական տարվա ընթացքում «Երևանի պե­տական համալսարան» հիմնադրամի գործունեության ռեկտորի հաշվետվությանը և բավարար գնահատել 2020-2021 ուսումնական տար­վա գործու­նե­ությունը:

Այնուհետև օրակարգային հաջորդ հարցի շրջանակում Հովհաննես Հովհաննիսյանը ՀԽ-ի հաստատմանը ներկայացրեց «Երևանի պետական համալսարան» հիմնադրամի 2022 թվականի ֆինանսական տարվա եկամուտների և ծախսերի նախահաշիվը:

Ներկայացված տեղեկությունների վերաբերյալ քննարկումից հետո ԵՊՀ հոգաբարձուների խորհուրդը 16 կողմ և 1 ձեռնպահ ձայների համամասնությամբ հաստատեց 2022 ֆինան­սա­կան տարվա եկամուտների և ծախսերի նախահաշիվը:

Անցնելով օրակարգի հաջորդ հարցին՝ ԵՊՀ ռեկտորը ՀԽ-ի հաստատմանը ներկայացրեց գիտական խորհրդի կողմից հաստատված կառուցվածքային փոփոխությունների առաջարկը, որով նախատեսվում է վերակազմավորել, լուծարել և ստեղծել կառուցվածքային մի շարք ստորաբաժանումներ:

Ըստ առաջարկի՝ նաև ԵՊՀ-ն ունենալու է 4 պրոռեկտոր՝ Ակադեմիական հարցերի գծով, Գիտական հարցերի գծով, Զարգացման և նորարարությունների գծով ու Ընդհանուր հարցերի գծով:

ԵՊՀ ռեկտորը, առաջարկին զուգահեռ, ՀԽ-ի հաստատմանը ներկայացրեց նաև հաստիքացուցակը, որոնց վերաբերյալ հնչեցին բազմաթիվ հարցեր, ու ծավալվեց քննարկում:

Արդյունքում ԵՊՀ ՀԽ-ն որոշեց ձևավորել աշխատանքային խումբ, որը ռեկտորատի հետ քննարկելու է աշխատավարձերի վերաբերյալ առաջարկվող փոփոխությունները և ներկայացնի Հոգաբարձուների խորհրդի անդամներին: Քվեարկությամբ որոշվեց, որ աշխատանքային խմբի կազմում ներառված են լինելու Երևանի շախմատի ֆեդերացիայի նախագահ Մխիթար Հայրապետյանը, Հանրահաշվի և երկրաչափության ամբիոնի վարիչ Վարուժան Աթաբեկյանը և ՈՒԽ նախագահ Դավիթ Ափոյանը:

Հոգաբարձուների խորհուրդը 13 կողմ, 3 ձեռնպահ և 1 դեմ ձայների համամասնությամբ որոշեց հաստատել գիտխորհրդի կողմից ներկայացված կառուցվածքային փոփոխությունները, ապա 13 կողմ և 4 ձեռնպահ ձայների համամասնությամբ հաստատեց «Երևանի պետական համալսարան» հիմնադրամի 2022 թվականի հաստիքացուցակը, սակայն դրանով սահմանված վարչական կառուցվածքային ստորաբաժանումների աշխատավարձերը որոշեց հաստատել 2021 թվականի համամասնություններով, իսկ լրավճարները՝ ներկայացված տարբերակով:

Օրակարգային վերջին հարցի շրջանակում ՀԽ-ն միաձայն հաստատեց «Երևանի պետական համալսարան» հիմնադրամին անհատույց օգտագործման իրավունքով ամրացված տարածքների մի մասի վարձակալության տրամադրման վերաբերյալ հայտը:

Ընթացիկ հարցերի շրջանակում էլ հնչեցին աշխատանքային տարբեր դիտարկումներ և դրանց պարզաբանումներ: