ՁԵՌՆԱՐԿԱՏԻՐՈՒԹՅՈՒՆԸ ԵՎ ԿԱՆԱՅՔ. ՀԱՆԴԻՊՈՒՄ-ՔՆՆԱՐԿՈՒՄ ԵՊՀ-ՈՒՄ

 Այս տարի ԵՊՀ ԳՀԱԿ-ում իրականացրել է կանանց սոցիալական ձեռնարկատիրական գործունեության ուղղությամբ ուսումնասիրություններ:

 Մագդալենա Կոնդասը հանդիպման ժամանակ նշեց, որ  սոցիալական ձեռնարկատիրությունը թե՛ որպես պրակտիկա և թե՛ որպես  հասկացություն վերջին տարիներին լայնորեն օգտագործվում է տարբեր ոլորտների  մասնագետների կողմից: Հյուրը մասնակիցներին ներկայացրեց նաև  համեմատական հետազոտության արդյունքները:

Խոսելով Լեհաստանի փորձի մասին՝ բանախոսը շեշտեց, որ  շատ կարևոր է հաշվի առնել Եվրոպական միության գործոնը և վերջինիս կանոնադրությունը, որովհետև այն հնարավորություն է տալիս սերտորեն համագործակցելու միմյանց հետ, ինչպես նաև իրականացնելու փորձի փոխանակում. «Մեզ համար շատ հետաքրքիր է Հայաստանում նմանատիպ հետազոտություն անցկացնելը:  Այն և՛ փորձի փոխանակում է, և՛ գիտելիքների ձեռքբերում: Պետք է նշել, որ կանայք  այս ոլորտում հատկապես վերջին տարիներին սկսել են բավականին ակտիվ գործունեություն ծավալել»:

 Հայաստանյան ձեռնարկատիրական  իրականությունը ներկայացնելիս բանախոսը շեշտեց, որ ամենահետաքրքիրը Հայաստանում այն է, որ կինը, մասնագիտությամբ ուսուցչուհի լինելով, եթե աշխատաշուկայում համապատասխան աշխատանք չի գտնում, ապա նրան հաճախ «դրդում» են զբաղվել գյուղատնտեսությամբ:

«Իմ հետազոտությունը ցույց տվեց, որ Հայաստանում գյուղատնտեսությամբ զբաղվող կանանց մեծամասնությունն ունի բարձրագույն կրթություն: Այս մոտեցումը ես սխալ եմ համարում, քանի որ բարձրագույն կրթություն ունեցող կինը չպետք է մոռանա իր կրթության մասին և իրեն նվիրի գյուղատնտեսությանը»,- մտահոգություն հայտնեց Մագդալենա Կոնդասին:

Մագդալենա Կոնդասի նախորդ հետազոտության թեման  եղել է  Լեհաստանի և Պաղեստինի սոցիալական ձեռնարկատիրության պրակտիկաները:

Բանախոսն իր ելույթում անդրադարձավ  ոչ միայն Հայաստանում կատարած ուսումնասիրությունների արդյունքներին, այլև ներկայացրեց այն բոլոր խնդիրները, որոնց բախվում են կանայք, ինչպես նաև խոսեց այդ խնդիրների հաղթահարման հաջողված օրինակների մասին: