ՍԽՐԱՆՔՆԵՐԸ ՉԵՆ ԿՈՐՉՈՒՄ, ԱՅԼ ԴԱՌՆՈՒՄ ԵՆ ԴԱՍ ՈՒ ԴԱՍԱԳԻՐՔ. ԳՐՔԻ ՇՆՈՐՀԱՆԴԵՍ ԵՊՀ-ՈՒՄ

Շնորհանդեսը կազմակերպել էր ԵՊՀ ժուռնալիստիկայի ֆակուլտետը:

Այս հատորում Գոհար Մարտիկյանը անդրադարձել է Արարատի մարզին և մարզի 94 հերոսներին, որոնք մարտնչել են հանուն հայրենիքի և հանուն տեսակի պահպանման:

Միջոցառումը սկսվեց Ժուռնալիստիկայի ֆակուլտետի ուսանողների կողմից պատրաստած տեսանյութով, որի միջոցով  ներկայացվեց Գոհար Մարտիկյանի կենսագրությունն ու ստեղծագործական գործունեությունը:

Այնուհետև բացման  խոսքով հանդես եկավ ԵՊՀ ժուռնալիստիկայի ֆակուլտետի դեկան , դոցենտ Նաղաշ Մարտիրոսյանը, որը բարձր գնահատեց Գոհար Մարտիկյանի ծավալած գործունեությունը:

«Գոհար Մարտիկյանը գտել է ապրելու բանաձևը սերունդներին փոխանցելու ճիշտ կերպը, ինչի համար հարգանքի է արժանի»,- ասաց Նաղաշ Մարտիրոսյանը,- «ամեն անգամ Արցախյան հերոսամարտի մասին խոսելիս ինձ մեղավոր եմ զգում, որովհետև  այդ պատերազմում զոհվեցին ինձ հասակակից, ինձ համար շատ թանկ մարդիկ, և պարտավորության զգացում է ՝ շարունակելու այն վեհ գործը, որն իրենք էին սկսել»:

Նաղաշ Մարտիրոսյանն ընդգծեց, որ հենց այդ գործը շարունակելու հարցում է, որ Գոհար Մարտիկյանի տեսակն անգնահատելի է:

«Ես հաճախ եմ խոսում իմ ուսանողների հետ  «Ապրելու բանաձև» հաղորդաշարի  մասին  և փորձելով սահմանել Գոհար Մարտիկյանի անձը՝ ես այն եզրահանգմանն եմ, որ Գոհար Մարտիկյանն ասացող է, վարքագիր և նաև «մարդ-խարիսխ», որն իր տեսակով թույլ չի տալիս նավին խորտակվել»,-ասաց դեկանը:

Ելույթի վերջում Նաղաշ Մարտիրոսյանը խոսեց նաև օրվա խորհրդի՝ Երջանկության միջազգային օրվա մասին՝ նշելով, որ մեր սերունդն արդեն իսկ երջանիկ է՝ լինելով տիկին Մարտիկյանի ժամանակիցը:

Գոհար Մարտիկյանի կատարած աշխատանքի մասին խոսեց նաև Տպագիր և հեռարձակվող լրատվամիջոցների ամբիոնի վարիչ, պրոֆեսոր Մուշեղ Հովսեփյանը:

«Գոհար Մարտիկյանը Հանրային ռադիոյի ամենաերկարակյաց հաղորդումներից մեկի հեղինակն է»,- նշեց Մուշեղ Հովսեփյանը,- «այս տարի լրանում  է տիկին Մարտիկյանի՝ Հանրային ռադիոյում աշխատելու 50-ամյակը: Կես դար է, ինչ  նա ներկայացանում է մեր հերոսների կերպարները՝ արդեն 1200 հերոսի  կերպարակերտում, և նա մեզ խոսք է տվել, որ այս շարքը կշարունակի »:

Մուշեղ Հովսեփյանի խոսքերով, Գոհար Մարտիկյանին հաջողվեց մեր հերոսների վրայից մաքրել մոռացության փոշին և նրանց նորովի ներկայացնել:

ԵՊՀ ժուռնալիստիկայի ֆակուլտետի ասիստենտ Դավիթ Սարգսյանն էլ պատմեց, որ Գոհար Մարտիկյանին վաղուց է ճանաչում,  նա իր առաջին խմբագիրն է եղել:

«Ես Գոհար Մարտիկյանից շատ բան եմ սովորել, այդ թվում նաև ակնարկներ գրել և կցանկանամ առանձնահատուկ նշել, որ նա այն սակավաթիվ հեղինակներից է, որը մեր հերոսների կյանքն ու ուղին  կարողանում է ներկայացանել առանց ավելորդ պաթոսի և դեպրեսիայի»,- նշեց Դավիթ Սարգսյանը:

Միջոցառման ընթացքում ելույթներով հանդես եկան նաև Հանրապետական խորհրդի համակարգող  Երանուհի Կարապետյանը, ԵՊՀ «Վարդանանք» ռազմահայրենասիրական ակումբի  նախագահ Սաթենիկ Աբրահամյանը, գրող,  հրապարակախոս Դավիթ Սարգսյանը:

Հեղինակի գրքից հատվածներ ընթերցեց Անահիտ Նավասարդյանը:

 Անի Պողոսյան