ԵՊՀ ՀՀԻ ՓՈԽՏՆՕՐԵՆԸ ԼԻԲԱՆԱՆՈՒՄ ՄԱՍՆԱԿՑԵԼ Է «ԱՐԱՄ ՄԱՆՈՒԿՅԱՆ. ՆԱՄԱԿԱՆԻ» ԳՐՔԻ ՇՆՈՐՀԱՆԴԵՍԻՆ ԵՎ ՏԵՂԻ ՀԱՅ ՀԱՄԱՅՆՔԻ ՆԵՐԿԱՅԱՑՈՒՑԻՉՆԵՐԻ ՀԵՏ ՔՆՆԱՐԿԵԼ ՀԵՏԱԳԱ ԳՈՐԾԱԿՑԱՅԻՆ ԱՇԽԱՏԱՆՔՆԵՐԸ

«Արամ Մանուկյան. նամականի» գրքի շնորհանդեսը Լիբանանում կազմակերպել էր Համազգային հայ կրթական, մշակութային միության Լիբանանի շրջանային վարչությունը: Գրքի լիբանանյան շնորհանդեսը թվով չորրորդն էր: Առաջինը տեղի է ունեցել Երևանի պետական համալսարանում, երկրորդը՝ Շուշիում, երրորդը՝ Սիրիայում, վերջինը՝ Լիբանանում:



«Լիբանանում դեռևս երեք տարի առաջ պատմաբան Երվանդ Փամբուկյանի (գրքի կազմողն է) հետ խոսել ենք գրքի տպագրման աշխատանքների մասին: Ժողովածուն ընդգրկում է շուրջ 400 նամակ, որոնց մեծ մասը երբևէ լույս չի տեսել: Ի դեպ, փաստաթղթերը հիմնականում հավաքված են Դաշնակցության՝ Բոստոնում գտնվող արխիվից»,− ysu.am-ին տված հարցազրույցում ասաց պարոն Հովհաննիսյանը:

Համատեղ ջանքերով իրականացվեց գրքի հրատարակությունը: ՀՀԻ Բաբկեն Հարությունյանի անվան Հայաստանի պատմական աշխարհագրության և քարտեզագրության լաբորատորիայի վարիչ Վ. Մխիթարյանը ձևավորեց Արամ Մանուկյանի՝ 1904-1915 թվականների ընթացքում ծավալած գործունեության քարտեզը:

Առաջին հանրապետության 100-ամյակին ընդառաջ ԵՊՀ ռեկտոր Սիմոնյանի և պատմաբան Երվանդ Փամբուկյանի հանդիպման արդյունքում որոշվեց, որ գրքի լույսընծայմամբ կզբաղվի հենց ԵՊՀ-ն:

«Այս ժողովածուի հրատարակությունը համալսարանի համար աննախադեպ էր, քանի որ գիրքը տպագրվեց 1000 օրինակով»,− ասաց Մհեր Հովհաննիսյանը:



Հովհաննիսյանը գրախոսության ընթացքում մատնանշեց, որ Արամ Մանուկյանը միշտ էլ հավատացել է, որ իր կատարած գործում մենակ չէ և դեմ է եղել, երբ իրեն համարել են միակ փրկիչը: Նա դեմ էր անհատապաշտությանը: Նամակների միջոցով հնարավոր է ճանաչել քննադատ Արամ Մանուկյանին, ծանոթանալ Արամ Մանուկյան ուսուցչի կերպարին:

Պարոն Հովհաննիսյանը նաև նշեց, որ լիբանանյան այցի շրջանակներում մասնակցել է ԵՊՀ գործընկեր համայնքային կառույցների հետ բանակցությունների:

«Երևանի պետական համալսարանը 1991 թվականից Լիբանանի համազգային կենտրոնական վարչության գործընկերն է: ԵՊՀ հայագիտական հետազոտությունների ինստիտուտը 2011 թվականին ընդլայնեց համագործակցության շրջանակը՝ նոր կապեր ստեղծելով հայկական համայնքի հետ: Խոսքը վերաբերում է տեղի հայկական դպրոցներին, Ազգային առաջնորդարանին, Համազգայինի Լիբանանի շրջանային վարչությանը և կաթոլիկ ու ավետարանչական համայնքների տարբեր կառույցներին»,− հավելեց փոխտնօրենը:



«Այս այցելության ժամանակ հնարավորություն ստացանք՝ վերաթարմացնելու մեր ունեցած համաձայնագրերը, քանի որ որոշ կառույցների, մասնավորապես Ազգային առաջնորդարանի ամբողջական և Համազգային շրջանային վարչության ղեկավարությունները փոխվել էին: Համաձայնագրերի շնորհիվ շատ լավ աշխատանք ստացվեց: Եթե Համազգային շրջանային վարչության հետ փաստացի մեկ ծրագիր իրականացրինք, այսինքն՝ այս գրքի շնորհանդեսը, ապա Ազգային առաջնորդարանի հետ մենք առիթ ունեցանք քննարկելու առաջիկայում նախատեսվող համագործակցության ծրագրերը»,− ասաց պարոն Հովհաննիսյանը և հավելեց, որ ամենայն հավանականությամբ ձմռանը սկսվելու է «Ցեղասպանագիտություն» հեռաուսուցման ծրագրի լիբանանյան շարքը։ Քննարկվել է նաև Առաջնորդարանի ենթակայությամբ գործող հայկական դպրոցների լիբանանահայ ուսուցիչների վերաորակավորման հարցը:



Ինստիտուտի փոխտնօրենը նշեց, որ առաջիկայում Լիբանանի ազգային առաջնորդարանի հետ քննարկվելու է նաև քարտեզագրական աշխատանքներ իրականացնելու հարցը, քանի որ դպրոցներում չկան արևմտահայերեն, դասական ուղղագրությամբ պատից կախելու, լայնաֆորմատ պատմական քարտեզներ:

Պարոն Հովհաննիսյանը հարցազրույցի ընթացքում հավելեց, որ իրենց ծրագրերին օժանդակում են համայնքային կառույցները, որոնց թվում իր մշտական աջակցությամբ աչքի է ընկել լիբանանահայ համայնքի ապահովագրությամբ զբաղվող «ԱՖՀԻԼ» կազմակերպությունը։

«Համայնքները հոգում են մեր ճանապարհածախսը, ինչպես նաև կեցության և այլ ծախսերը: Այսինքն՝ կարելի է ասել, որ հասել ենք այն հավասարակշռությանը, երբ յուրաքանչյուրս գիտակցում ենք մեր պարտավորություններն ու աշխատանքի չափը»,− խոսքն ավարտեց ԵՊՀ հայագիտական հետազոտությունների ինստիտուտի փոխտնօրեն Մհեր Հովհաննիսյանը: