ՅՈՒՆԵՍԿՕ-ՌՈՒՍԱՍՏԱՆ ՄԵՆԴԵԼԵԵՎԻ ԱՆՎԱՆ ՀԻՄՆԱՐԱՐ ԳԻՏՈՒԹՅՈՒՆՆԵՐԻ ՀԱՄԱՇԽԱՐՀԱՅԻՆ ՄՐՑԱՆԱԿՆ ԱՌԱՋԻՆ ԱՆԳԱՄ ՇՆՈՐՀՎԵԼ Է ՊՐՈՖԵՍՈՐՆԵՐ ՕԳԱՆԵՍՈՎԻՆ ԵՎ ԲԱԼԶԱՆԻԻՆ

Պարգևատրման որոշումը կայացվել է ականավոր միջազգային ժյուրիի առաջարկով, որը նախագահում է քիմիայի բնագավառում 2016 թվականի Նոբելյան մրցանակի դափնեկիր, պրոֆեսոր Ժան-Պիեռ Սովաժը:

Հարկ է նշել, որ Յուրի Օգանեսովի գիտական աշխատանքները մեծ դեր են ունեցել պարբերական համակարգի նոր քիմիական տարրերի սինթեզի և ուսումնասիրության գործում։

Նրա նախաձեռնած միջազգային գիտական համագործակցության արդյունքում, ի թիվս այլոց, հայտնաբերվել են այնպիսի գերծանր տարրեր, ինչպիսին Քիմիական տարրերի պարբերական համակարգի 118-րդ քիմիական տարրն է, որն անվանի գիտնականի անունով է կոչվում՝ «Օգանեսոն»:

Դափնեկիրները մրցանակը ստանալու են Փարիզում նոյեմբերի 15-ին՝ ՅՈՒՆԵՍԿՕ-ի 41-րդ գլխավոր նստաշրջանի հանդիսավոր արարողության ժամանակ:

Երևանի պետական համալսարանը շնորհավորում է գիտնականին մրցանակի կապակցությամբ՝ մաղթելով նորանոր նվաճումներ և երկար տարիների բեղմնավոր գործունեություն:

Աշխարհահռչակ հայ ֆիզիկոս, ակադեմիկոս Յուրի Օգանեսովը (Հովհաննիսյան) ծնվել է 1933 թ. ապրիլի 14-ին Դոնի Ռոստովում: 

1956 թվականին ավարտել է Մոսկվայի ճարտարագիտաֆիզիկայի ինստիտուտը։ 1976-1989 թթ. եղել է Դուբնայի միջուկային հետազոտությունների միացյալ ինստիտուտի (ՄՀՄԻ) միջուկային ռեակցիաների լաբորատորիայի փոխտնօրեն, 1989-1997 թթ.՝ տնօրեն, 1997 թվականից՝ գիտական ղեկավար, միաժամանակ 1971 թվականից՝ նույն լաբորատորիայի ծանր միջուկների հետազոտման բաժնի պետ, 1969-1970 թթ.՝ Փարիզի համալսարանի պրոֆեսոր, Երևանի պետական համալսարանի, Ֆրանկֆուրտի (Գերմանիա), Մեսինայի (Իտալիա) համալսարանների պատվավոր դոկտոր։

2017 թվականին գործողության մեջ է դրվել «Աշխարհահռչակ հայեր. Յուրի Հովհաննիսյան» թեմային նվիրված «ՅՈՒՐԻ ՀՈՎՀԱՆՆԻՍՅԱՆ. YURI OGANESSIAN» նամականիշը:

Հայաստանի վարչապետ Նիկոլ Փաշինյանի հրամանագրով Յուրի Օգանեսովին շնորհվել է Հայաստանի քաղաքացիություն: 2018 թվականին ՀՀ-ում մարվել է ֆիզիկոսին նվիրված հատուկ ծրար (ֆիլատելիստական արտադրանք), որի վրա պատկերված է 2006 թվականին Յուրի Օգանեսովի կողմից հայտնաբերված՝ Դմիտրի Մենդելեևի պարբերական աղյուսակը համալրող նոր՝ 118-րդ քիմիական տարրը, որը կոչվում է նրա անունով՝ «Օգանեսոն» (Og):