«ԱՅՆ, ԻՆՉ ԱՆՎԱՆՈՒՄ ԵՆ ՀԱՅՐԵՆԱՍԻՐՈՒԹՅՈՒՆ, ՊԱՏԵՐԱԶՄԻ ԴԱՇՏՈՒՄ ՉԻ ԳՈՐԾՈՒՄ». ՓՈԽԳՆԴԱՊԵՏ ԻՎԱՆ ՊՈՂՈՍՅԱՆ

ԵՊՀ ՈւԽ Լեոնիդ Ազգալդյանի անվան մարտական պատրաստության ակումբը սկսում է «Պատերազմի դասեր» խորագրով դասախոսությունների շարք, որի նպատակն է փոխել պատերազմի էության վերաբերյալ հասկացությունները:

Այսօրվա հանդիպման թեման էր «Պատերազմի դասեր. հոգեբանական պատերազմներ», որի հիմնական  նպատակն էր պարզաբանել, թե ինչպես են հոգեբանական գործոնները հաճախ հաղթանակի գրավական դառնում:

«Մեզ հաճախ թվում է, թե պատերազմում ունեցած հաղթանակը հզոր ուժի արդյունք է, մինչդեռ իրականում հաղթանակն ապահովում են պատերազմի չերևացող կողմում մշակված և հաշվարկված մարտավարությունները»,- նշեց Իվան Պողոսյանը:

Բանախոսը  ելույթը սկսեց հին աշխարհի մարտավարական օրինակներով՝ ներկայացնելով «Իլիական» և «Ոդիսական» գրքերից հատկանշական հատվածներ, այնուհետև անդրադարձավ ժամանակակից, այդ թվում՝ ինֆորմացիոն պատերազմներին:

«Նախ պետք է նշեմ, որ  որոշակի թյուրըմբռնում է առաջանում, երբ մենք «ինֆորմացիան» «տեղեկատվություն» են անվանում, քանի որ «տեղեկատվությունը» բուն գործընթացն է, մինչդեռ այն, ինչ մենք փոխանցում ենք, կարող ենք կա՛մ «տեղեկություն», կա՛մ «տեղեկույթ» անվանել»:

Բանախոսը խոսեց նաև «ինֆորմացիոն տարածք» հասկացության մասին, որը չպետք է շփոթել ինֆորմացիոն դաշտի հետ:

«Ինֆորմացիոն դաշտը ներգործություն ապահովող դաշտն է, մինչդեռ  ինֆորմացիոն տարածքն իր մեջ ընդգրկում է ինֆորմացիայի աղբյուրը, ուղին, նպատակային լսարանը, ինֆորմացիայի ներկայացման ձևերը, միջոցներն ու սկզբունքները, ինչպես նաև հաղորդակցային հանգույցները»,- պարզաբանում է Իվան Պողոսյանը:

Վերջինս անդրադարձավ նաև Ղարաբաղյան պատերազմին, պատմեց հերոսներ Լեոնիդ Ազգալդյանի, Մոնթե Մելքոնյանի սխրանքների մասին, խոսեց պատերազմական իրավիճակներում զինվորների հոգեբանության դրսևորումներից:

«Այն, ինչ անվանում են հայրենասիրություն, պատերազմի դաշտում չի գործում, այնտեղ գործում են պարզ, մարդկային փոխհարաբերությունները և վստահությունը, որ զինվորը տիրապետում է զենքին, իրավիճակին»,- նշեց հյուրը:

Վերջում ներկաները շնորհակալություն հայտնեցին Իվան Պողոսյանին հետարքրքիր դասախոսության համար, իսկ կազմակերպիչները նրան նվիրեցին Արցախյան ազատամարտի հերոս Լեոնիդ Ազգալդյանի մասին պատմող գիրք:

Անի Պողոսյան