«ՄԻ՛ ՎԱԽԵՑԵՔ ԶԳԱԼ». ԱՎԱՐՏՎԵՑ «ՀՈԳԵԲԱՆԱԿԱՆ ԱՇԽԱՏԱՆՔԻ ԱՌԱՆՁՆԱՀԱՏԿՈՒԹՅՈՒՆՆԵՐԸ ՏՐԱՎՄԱՅԻ, ՀԵՏՏՐԱՎՄԱՏԻԿ ԽՆԴԻՐՆԵՐԻ ԵՎ ՎՇՏԻ ՀԵՏ» ԴԱՍԸՆԹԱՑԸ

Հիշեցնենք, որ միջոցառումն անցկացվել է Երևանի պետական համալսարանի (համակարգող՝ ԵՊՀ մշակույթի կենտրոն), «Լոգոս» հոգեբանական խորհրդատվական կենտրոն ՀԿ-ի և Հայկական հոգեբանական ակադեմիայի ակտիվ համագործակցությամբ:

Աննախադեպ այս դասընթացի շրջանակում առաջին անգամ Հայաստան ժամանած հոգեթերապևտ Յուրե Բիեհոնսկին և հոգեբան-խորհրդատու Մելլի Լեյնը վերապատրաստեցին  հայաստանյան հոգեբաններին և հոգեբույժներին, որպեսզի նրանք կարողանան ժամանակակից մոտեցումներով մասնագիտական աջակցություն ցուցաբերել այն ընտանիքներին, որոնք Արցախյան երկրորդ պատերազմի պատճառով տուժել են հետտրավմատիկ սթրեսային խանգարումներից:

Դասընթացի փակման արարողությանը ներկա էին ԵՊՀ պրոռեկտորներ Արթուր Իսրայելյանը, Էլինա Ասրիյանը, Եվրոպական լեզուների և հաղորդակցության ֆակուլտետի դեկան Գևորգ Բարսեղյանը, բազմաթիվ հյուրեր և ուսանողներ:

Միջոցառման սկզբում Մշակույթի կենտրոնի տնօրեն Կարինե Դավթյանը շնորհակալություն հայտնեց ներկաներին ցուցաբերած մասնակցության և հետաքրքրության համար:

Խոսելով այս բացառիկ միջոցառման կարևորության մասին՝ Կարինե Դավթյանն առանձնահատուկ նշեց, որ այս ընթացքում մի հետաքրքիր բացահայտում է եղել. դասընթացի հյուրերից պարոն Յուրե Բիեհոնսկին արմատներով հայ է:

Բացի դրանից՝ նա շեշտեց, որ շատ հատկանշական էր նմանատիպ կարևոր միջոցառման անցկացումը հենց այս ժամանակ, երբ Հայաստանում ապրող շատ ընտանիքներ հոգեբանական աջակցության և մասնագիտական խորհրդատվության կարիք ունեն:

Հյուրերին ողջունեց ԵՊՀ պրոռեկտոր Էլինա Ասրիյանը, որը խորին շնորհակալություն հայտնեց հյուրերին ցուցաբերած մասնագիտական բարձր հմտությունների համար:

«Դասընթացի առաջին օրը մասնակիցների հայացքներում կասկած էի նկատում,- ասաց Էլինա Ասրիյանը,- բայց հիմա ես վստահ կարող եմ ասել, որ բոլորի դեմքին կա բավարարվածություն, ինչի համար ես առաջին հերթին շնորհակալ եմ մեր հյուրերին»:

ԵՊՀ պրոռեկտորը հավելեց նաև, որ այս ընթացքում դասընթացի մասնակիցները հարստացել են արժեքավոր գիտելիքով և փորձով, ինչի մասին են վկայում երախտիքի խոսքերը, որ նրանք հայտնում են կազմակերպիչներին. «Գիտելիքը միակ սեփականությունն է, որը ոչ ոք չի կարող ձեզնից խլել, և ես վստահ եմ, որ դուք պատրաստ եք կիսվել այդ հարստությամբ նաև մյուսների հետ»:

Ելույթով հանդես եկավ և ներկաներին շնորհակալագրեր հանձնեց ԵՊՀ պրոռեկտոր Արթուր Իսրայելյանը:

Նա կարևորեց դասընթացն ու շնորհակալություն հայտնեց կազմակերպիչներին՝ շեշտելով, որ ԵՊՀ-ն միշտ պատրաստ է հյուրընկալել նմանատիպ բարձրակարգ մասնագետների:

Վերջում Ա. Իսրայելյանը շնորհակալություն հայտնեց նաև ԵՊՀ թարգմանության տեսության և պրակտիկայի ամբիոնին միջոցառման ողջ ընթացքում որակյալ թարգմանություն ապահովելու համար:

Դասընթացի մասնակիցներից Տիգրան Մնացականյանը, որը կառավարման հոգեբանության մասնագետ է, դրական գնահատեց դասընթացի նշանակությունը ոչ միայն մասնագիտական, այլև անձնական տիրույթում:

Շնորհակալություն հայտնելով նմանատիպ դասընթացի կազմակերպման համար՝ Տիգրան Մնացականյանը նշեց, որ այս դասընթացն աշխատանք էր առաջին հերթին իրենց անձի հետ. «Դասընթացը մեզ ոչ միայն նոր գիտելիքներ և մասնագիտական մոտեցումներ տվեց, այլև հյուրերի մասնագիտական հմտությունների շնորհիվ մենք կարողացանք ավելի լավ ճանաչել ինքներս մեզ՝ որպես մասնագետներ հետագայում ուրիշներին օգնելու համար»:

Միջոցառման փակման արարողության ժամանակ կամավորական աշխատանքներ կատարած դասախոսները և ուսանողները պարգևատրվեցին շնորհակալագրերով, իսկ դասընթացի մասնակիցները ստացան մասնակցության հավաստագրեր:

Մասնակիցներն իրենց հերթին շնորհակալություն հայտնեցին ԵՊՀ մշակույթի կենտրոնի տնօրեն Կարինե Դավթյանին և կամավորներին տքնաջան աշխատանքի ու կազմակերպչական բարձր որակի համար:

Հայաստան ժամանած հոգեթերապևտ Յուրե Բիեհոնսկին և հոգեբան-խորհրդատու Մելլի Լեյնը նույնպես տպավորված էին այցից և խոստացան կրկին վերադառնալ Հայաստան, քանի որ առանձնահատուկ կապ է ստեղծվել իրենց ու Հայաստանի միջև. «Մեր միակ կոչն ու հորդորն է բոլորին՝ չվախենալ զգալ այն, ինչ զգում եք»:

«Հոգեբանական աշխատանքի առանձնահատկությունները տրավմայի, հետտրավմատիկ խնդիրների և վշտի հետ» խորագրով դասընթացների փակման հանդիսավոր արարողության ընթացքում ելույթ ունեցան ԵՊՀ մշակույթի կենտրոնի երգչախումբը և Երևանի Կոմիտասի անվան պետական կոնսերվատորիայի սաները:

Նրանք հնչեցրել են հատվածներ Տիգրան Չուխաջյանի «Կարինե» օպերետից, Արմեն Տիգրանյանի «Դավիթ Բեկ», Չայկովսկու «Դոն Ժուան» օպերաներից, ինչպես նաև հանդես եկել այլ կատարումներով:

ԵՊՀ մշակույթի կենտրոնի տնօրեն Կարինե Դավթյանը մեզ հետ զրույցում ասաց, որ միջոցառման ավարտին հնչեցվել է ՀՀ հիմնը հյուրերի խնդրանքով. «Սովորաբար մեր բոլոր միջոցառումները մեկնարկում են ՀՀ հիմնով, սակայն հաշվի առնելով, որ մեր հյուրերը տարբեր ազգության են, մենք երկմտում էինք և որոշեցինք չհնչեցնել: Եվ ինչքան մեծ էին մեր զարմանքը և ոգևորությունը, երբ հենց նրանք խնդրեցին հնչեցնել հիմնը, որը լսեցին մեծ հուզմունքով»:

Հիշեցնենք, որ հյուրերը Հայաստան էին ժամանել Էստոնիայի հայկական միության ակտիվ ներկայացուցիչների աջակցությամբ, և մեր հայրենակիցների շնորհիվ դասընթացներն անցկացվել են անվճար: