ՍՈՑԻԱԼԱԿԱՆ ՁԵՌՆԱՐԿԱՏԻՐՈՒԹՅԱՆ ԶԱՐԳԱՑՄԱՆ ՎԵՐԱԲԵՐՅԱԼ ՀԱՄԱԺՈՂՈՎ ԵՎ ՑՈՒՑԱՀԱՆԴԵՍ-ՎԱՃԱՌՔ ԵՊՀ-ՈՒՄ

Սոցիալական ձեռնարկատիրությունը ձեռնարկատիրական գործունեություն է, որի բիզնես մոդելի հիմքում դրված են սոցիալական խնդիրների լուծումն ու սոցիալական արժեքների ստեղծումը, որի շահույթի մեծ մասը ծառայում է սոցիալական բարեփոխումների իրականացմանը, սոցիալական խնդիրների լուծմանը:

«Հայաստանի սոցիալական ձեռնարկությունների ասոցիացիայի» (ՀՍՁԱ), «ԷկոԼաբ» կենսակայուն զարգացման և ակտիվ քաղաքացիության հիմնադրամի և Երևանի պետական համալսարանի ձեռներեցության զարգացման կենտրոնի համատեղ այս միջոցառումը հարթակ է, որը հնարավորություն է տալիս ոլորտի դերակատարներին քննարկելու սոցիալական ձեռնարկատիրության էկոհամակարգին առնչվող կարևորագույն խնդիրներն ու դրանց հնարավոր լուծումները։

Միջոցառումն իրականացվում է «Իրավաբանների հայկական ասոցիացիա» ՀԿ-ի կողմից ղեկավարվող «Սոցիալական ձեռնարկատիրությունը համայնքային զարգացման մեխանիզմ» ծրագրի շրջանակում Եվրոպական միության և «ԷկոԼաբ» հիմնադրամի համաֆինանսավորմամբ:

ՍՁ ցուցահանդես-վաճառքին ներկայացված էին ՀՀ տարբեր մարզերում գործող ՍՁ-ներ: Նորաստեղծ ՍՁ-ների թվում են կարի արհեստանոցը, պլաստիկի վերամշակման գործարանը, հրուշակեղենի արտադրամասը, որոնք ստեղծել են մի քանի տասնյակ աշխատատեղեր, իսկ եկամտի առնվազն 50%-ն ուղղում են համայնքի խնդիրների լուծմանը:



Պաշտոնական բացման ժամանակ ելույթ ունեցավ ԵՊՀ ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը՝ մաղթելով արդյունավետ քննարկում, որը կարող է պարբերական դառնալ:
«Ուրախ եմ, որ ԵՊՀ-ն դառնում է համապետական ներուժի համախմբման հարթակ»,- ասաց Ռուբեն Մարկոսյանը:

Հայաստանում ԵՄ պատվիրակության միջազգային օգնության/համագործակցության պատասխանատու Ստանիսլավ Տոշկովը ողջունեց ներկաներին՝ նշելով, որ հրաշալի է ցուցահանդեսի ժամանակ տեսնել այդ բոլոր բիզնեսները:

Ըստ նրա՝ ԵՄ պատվիրակությունը հետաքրքրված է այս ոլորտով և իր գործունեությունն է ուղղում սոցիալական և համայնքային օժանդակությանը:

«Վերջին տարիների ընթացքում ինձ հետաքրքիր է հետևել ոլորտի առաջընթացին, այս միջոցառումը դրա մի մասն է»,- ասաց Ստանիսլավ Տոշկովը:

«Հայաստանի սոցիալական ձեռնարկությունների ասոցիացիայի» տնօրեն Սաթենիկ Բադեյանը խոսեց պետական մարմինների, բիզնես սեկտորի և քաղաքացիական հասարակության համագործակցության մասին, որն ուղղված կլինի սոցիալական ձեռնարկատիրության զարգացմանն ու կայացմանը:



«Դեռ շուտ է խոսել այն մասին, որ ոլորտը կայացած է, բայց մենք ունենք կայացած մոդելներ, որոնք կարելի է տարածել այլ համայնքներում: Այդ նպատակով մենք ձեռնարկեցինք այս համաժողովը»,- ասաց Սաթենիկ Բադեյանը:

Նա անդրադարձավ նաև ՍՁ կրթության խնդիրներին՝ նշելով, որ արդեն կա հայալեզու ձեռնարկ, ինչը նշանակում է, որ նախանշվում է խնդիրների լուծման ուղին:

«Իրավաբանների հայկական ասոցիացիա» ՀԿ-ի ղեկավար Կարեն Զադոյանը կարևորեց ՍՁ-ների դերը՝ նշելով դրանց մեծ ներուժը:

«ԷկոԼաբ» կենսակայուն զարգացման և ակտիվ քաղաքացիության հիմնադրամի տնօրեն Յանա Մկրտչյանը ՍՁ-ների զարգացումն ու կայունացումը համարեց իրենց հիմնադրամի ռազմավարական ճյուղերից:

«Նշեմ նաև, որ մենք սկսեցինք մտածել ոլորտի մասին և դարձանք այս ժողովի նախաձեռնողներից մեկը, քանի որ շահագրգռված ենք խոսելու խնդիրների մասին և քարտեզագրելու ներուժը»,- ասաց Յանա Մկրտչյանը:

Բացումից հետո համաժողովը շարունակվեց պանելային քննարկումներով, որոնց հիմնական թեմաներն են Սոցիալական ձեռնարկատիրության էկոհամակարգը և ոլորտի զարգացմանն աջակցող մեխանիզմները, ՍՁ իրավական կարգավորման հարցերը, ՍՁ կրթության խնդիրներն ու զարգացման հնարավորությունները:

Համաժողովին որպես բանախոս մասնակցում են ինչպես ՀՀ տարբեր մարզերի սոցիալական ձեռնարկատերեր, այնպես էլ ԱԺ պատգամավորներ, ոլորտին առնչվող պետական կառավարման և տեղական ինքնակառավարման մարմինների պաշտոնյաներ, դաշտում ներդրումներ անող կազմակերպությունների ներկայացուցիչներ:

Համաժողովի հիմնական նպատակն է ցույց տալ ՍՁ-ների դերը համայնքների զարգացման գործում, ապահովել ոլորտում փորձի փոխանակումը, խոչընդոտների վերհանումը և դրանց լուծման տարբերակների քննարկումը, ինչպես նաև ոլորտի զարգացման հեռանկարների ու հայեցակարգերի նախանշումը:

Ցուցահանդես-վաճառքի լուսանկարները հասանելի են այստեղ:

Մարի Ռաֆյան