«ԿՅԱՆՔԸ ՄՐՑԱԿՑՈՒԹՅՈՒՆ Է»․ ԴՊՐՈՑԱԿԱՆՆԵՐԻ ԱՅՑԸ ԵՊՀ ՏՆՏԵՍԱԳԻՏՈՒԹՅԱՆ ԵՎ ԿԱՌԱՎԱՐՄԱՆ ՖԱԿՈՒԼՏԵՏ

Այցը կազմակերպել էր ԵՊՀ մինչհամալսարանական կրթության վարչությունը։

Փոխտնօրենի և դասղեկի ուղեկցությամբ համալսարան եկած աշակերտներին դիմավորեցին ԵՊՀ տնտեսագիտության և կառավարման ֆակուլտետի դեկան Հայկ Սարգսյանն ու Կառավարման և գործարարության ամբիոնի վարիչ Կառլեն Խաչատրյանը։

Հայկ Սարգսյանը ողջունեց դպրոցականներին և կարճ ներկայացրեց ֆակուլտետի կառուցվածքն ու գործունեությունը։ Նա նշեց, որ Տնտեսագիտության և կառավարման ֆակուլտետն այսօր ոչ միայն բուհում, այլև երկրում առաջամարտիկ ֆակուլտետներից է։ Այդ մասին են վկայում ընդունելության համար անհրաժեշտ բարձր միավորներն ու հետագայում շրջանավարտների պատշաճ աշխատանք գտնելը։

«Մեր ֆակուլտետի ամենալավ շրջանավարտներից շատերն այսօր պետական և կառավարման մարմիններում բարձր պաշտոններ են զբաղեցնում, ունեն հաջողված բիզնես նախագծեր և գտել են իրենց տեղն աշխատաշուկայում»,- նշեց դեկանը։

Ողջույնի խոսքերից հետո տնտեսագիտական հոսքի աշակերտների համար տնտեսական մրցակցության մասին դասախոսություն կարդաց ԵՊՀ կառավարման և գործարարության ամբիոնի վարիչը։ Նա պետության կայացման գործում կարևորեց տնտեսական առողջ մրցակցությունը։

«Կյանքը մրցակցություն է։ Ամեն տեղ ու ամեն ոլորտում գոյություն ունի մրցակցություն։ Տնտեսությունը մրցակցության ամենալայն դաշտերից մեկն է»,- ասաց Կ․ Խաչատրյանը։

Նա աշակերտներին պատմեց, թե ինչպես է տնտեսական մրցակցությունն ազդում ապրանքաշուկայի գների տատանման և որակի փոփոխության վրա։

Ամբիոնի վարիչը խոսեց նաև մենաշնորհների, դրանց բացասական հետևանքի և պետության անհրաժեշտ միջամտության մասին՝ օրինակ բերելով Ռոքֆելլերների ընտանիքը։

Ինտերակտիվ դասախոսության միջոցով աշակերտներն իմացան, թե ինչպես է աշխատում տնտեսական աշխատաշուկան, ինչ է առողջ մրցակցությունը, ու ինչպես պետք է պետությունը խթանի այն։

Դասախոսության վերջում Կառլեն Խաչատրյանը պատասխանեց ներկաների հարցերին։