Գծային և ոչ գծային մոտարկումների և դրանց կիրառման լաբորատորիա

Գծային և ոչ գծային մոտարկումների ու դրանց կիրառման լաբորատորիան կազմավորվել է 2012 թ․ ԵՊՀ բարձրագույն մաթեմատիկայի ամբիոնում պրոֆեսոր Մարտին Գրիգորյանի գիտական խմբի հենքի վրա։ 

2022 թվականից լաբորատորիան ընդգրկվել է ԵՊՀ մաթեմատիկական և կիրառական հետազոտությունների կենտրոնի կազմում։

Լաբորատորիայի աշխատակիցները՝ 2 պրոֆեսոր, 3 դոցենտ և մեկ ասիստենտ, ներգրավված են նաև ուսումնական գործընթացում։ 

Գիտական խումբը նպատակադրվել է (երիտասարդ կադրերի ներգրավմամբ)՝

1. լուծել մի շարք խնդիրներ, որոնք վերաբերում են են դասական (եռանկյունաչափական, Ուոլշի, Հաարի, Շաուդերի, Ֆրանկլինի, Վիլենկինի և այլն) և ընդհանուր օրթոնորմալ համակարգերով ֆունկցիոնալ տարբեր տարածությունների ֆունկցիաների գծային և ոչ գծային մոտարկմանը,

2. սահմանել ֆունկցիոնալ նոր դասեր և գնահատել այդ դասերի ֆունկցիաների մոտարկման սխալանքի 0-ին ձգտելու արագությունը, 

3. մշակելու կիրառական խնդիրների, մասնավորապես՝ պատկերների սեղմման, ազդանշանների ու ինֆորմացիայի մշակման և օպտիմալացման լուծման նոր ալգորիթմներ` որպես ոչ գծային մոտարկման դիսկրետ դրսևորում։

Ծրագրի շրջանակում ստացվել են արժեքավոր արդյունքներ, որոնք տպագրվել են բարձր վարկանիշ ունեցող միջազգային մաթեմատիկական հեղինակավոր հանդեսներում:

Խմբի անդամները համագործակցում են ՀՀ ԳԱԱ մաթեմատիկայի ինստիտուտի, ՌԴ Ստեկլովի անվան մաթեմատիկայի ինստիտուտի, Մոսկվայի, Սանկտ Պետերբուրգի, Մինսկի, Թբիլիսիի, Վարշավայի, Պարդյուի (ԱՄՆ), Մադրիդի համալսարանների, Գերմանիայի մի շարք գիտական կենտրոնների, Լոնդոնի կայսերական քոլեջի (Imperial College) ու Գենտի համալսարանի (Բելգիա) մաթեմատիկայի բաժանմունքի հետ, ինչի արդյունքում ունեն համատեղ տպագրված աշխատանքներ ամերիկացի, իսպանացի, գերմանացի, անգլիացի, լեհ և ռուս հայտնի մաթեմատիկոսների հետ։ 

Լաբորատորիան ակտիվ համագործակցում է նաև «Krisp» ընկերության աշխատակիցների հետ։ Նշենք, որ «Krisp» ընկերության համահիմնադիր Արտավազդ Մինասյանի ատենախոսությունը (գիտ․ ղեկ․՝ Մարտին Գրիգորյան) նվիրված էր գծային և ոչ գծային մոտարկումների որոշ հարցերին։