Ընթացիկ ուսումնական տարվա մայիսի 23-ին Ծաղկաձորում մեկնարկեց «Հարավային Կովկասը և ԵՄ քաղաքականության ու որոշումների կայացման գործընթացի հիմնական սկզբունքները» խորագրով քառափուլ դասընթացի երկրորդ փուլը։
Հիշեցնենք, որ դասընթացը կյանքի է կոչվել Երևանի պետական համալսարանի հայագիտական հետազոտությունների ինստիտուտի և «Ֆրիդրիխ Էբերտ» հիմնադրամի հայաստանյան գրասենյակի սերտ համագործակցության շնորհիվ։
Միջոցառմանը բացման խոսքով հանդես եկավ դասընթացի կազմակերպչական հանձնաժողովի նախագահ, ԵՊՀ հայագիտական հետազոտությունների ինստիտուտի տնօրեն, պ.գ.դ. Վահրամ Պետրոսյանը։ Նա ընդգծեց, որ դասընթացի շրջանակում ներառված են ռազմագիտական, սոցիոլոգիական և տնտեսագիտական բլոկներ, որոնք միտված են մասնակիցներին տալու բազմակողմանի գիտելիքներ տարածաշրջանային և միջազգային գործընթացների վերաբերյալ։
Ներկաներին ողջունեց նաև «Ֆրիդրիխ Էբերտ» հիմնադրամի հայաստանյան գրասենյակի ծրագրերի ղեկավար Նաիրա Գևորգյանը՝ կարևորելով նման կրթական նախաձեռնությունների դերը մասնագիտական կարողությունների զարգացման գործում։
Այնուհետև Վահրամ Պետրոսյանը ներկայացրեց դասընթացի առաջին բանախոս գեներալ-մայոր, ռազմական փորձագետ Գենադի Տավարածյանին, որը մասնակիցներին ներկայացրեց իր մասնագիտական հարուստ փորձը՝ անդրադառնալով Հայաստանի ռազմաքաղաքական իրադրությանը, ռազմական ռազմավարությանն առնչվող հիմնախնդիրներին և անվտանգային մարտահրավերներին։
Օրվա երկրորդ բանախոսն էր ԵՊՀ հետազոտող, իրանագիտության ամբիոնի դոցենտ Արտյոմ Տոնոյանը, որը ներկայացրեց «Ադրբեջանի քաղաքական և ռազմավարական խոսույթի առանձնահատկությունները 1991-2020 և 2020-2026 թթ.» վերտառությամբ քննական վերլուծությունը:
Երրորդ զեկուցմամբ հանդես եկավ ՀՊՏՀ միջգիտակարգային հետազոտությունների կենտրոնի ղեկավար, տնտեսագետ Սոս Խաչիկյանը, որը ներկայացրեց Հայաստանի տնտեսության զարգացման դինամիկան, առկա մարտահրավերներն ու կառուցվածքային առանձնահատկությունները։ Նա անդրադարձավ նաև մրցակցային և համագործակցային տնտեսական մոդելներին՝ կարևորելով դրանց միջև հավասարակշռված մոտեցման անհրաժեշտությունը կայուն զարգացման ապահովման համատեքստում։
Առաջին օրվա դասախոսությունների շարքը եզրափակեց ԱԳՆ բազմակողմ քաղաքականության և զարգացման համագործակցության վարչության պետ Դավիթ Կնյազյանը: Բանախոսը հանդես եկավ «Հայաստան–ԵՄ համագործակցությունը ՄԱԿ-ի և այլ միջազգային կազմակերպությունների շրջանակում» վերտառությամբ դասախոսությամբ:
Դասընթացի երկրորդ օրը՝ մայիսի 24-ին, ««Մենք» և «Նրանք». ազգային ինքնության բնորոշման նոր մոտեցումներ» խորագրով դասախոսությամբ հանդես եկավ Երևանի պետական համալսարանի կիրառական սոցիոլոգիայի ամբիոնի վարիչ, ք.գ.դ., պրոֆեսոր Արթուր Աթանեսյանը:
Դասախոսություններն անցան գերազանցապես մտագրոհի ձևաչափով՝ մասնակիցների ակտիվ ներգրավվածությամբ և քննարկումներով։
Դասընթացի այս փուլի ավարտին Վ. Պետրոսյանը ներկայացրեց խմբային հետազոտական աշխատանքների թեմաները, որոնց արդյունքները մասնակիցները կներկայացնեն ծրագրի ավարտական փուլում։
