Մայիսի 12-17-ը ԵՊՀ ուսանողական խորհրդի նախաձեռնությամբ կազմակերպվեց «Ուսանողական ինքնակառավարման միջազգային ֆորում-2025»-ը, որը միավորեց 9 երկրների 10 համալսարաններից ժամանած 30 ուսանող առաջնորդների։
Նախաձեռնությունը ԵՊՀ ուսանողական խորհրդի կողմից կազմակերպվող ամենամյա աշխատաժողովների շարքի մի մասն է՝ ուղղված ուսանողական կառույցների միջև փորձի փոխանակման, նորարարական գաղափարների տարածման և միջազգային համագործակցության ամրապնդմանը։
Ֆորումը մեկնարկեց ԵՊՀ ՈԻԽ նախագահ Հասմիկ Ափրեյանի ողջույնի խոսքով.«Այս ֆորումը գիտելիքներ կիսելու, միմյանցից սովորելու և հայրենի երկրի սահմաններից դուրս կապեր հաստատելու հարթակ է։ Մենք հույս ունենք, որ այն կդառնա երկխոսության, ոգեշնչման և քայլերի ձեռնարկման տարածք»։
Առաջին իսկ օրվանից ֆորումի մասնակիցները ներգրավվեցին ակտիվ քննարկումներում, որոնք ուսանողական ներկայացուցչության խնդիրների, մարտահրավերների ու դրանց հաղթահարման ուղիների շուրջ էին։
Երկրորդ օրվա աշխատանքներն ուղղված էին կրթության որակի ապահովման ներքին և արտաքին մեխանիզմներում ուսանողական կառույցների ազդեցությանը վերաբերող հարցերին, ինչպես նաև այն գործիքակազմին, որով ուսանողները կարող են դառնալ համապարփակ փոփոխությունների շարժիչ ուժ։
Ֆորումի ընթացքում իրականացվեցին «Ուսանողական առաջնորդություն» և «Ծրագրերի կառավարում» թեմաներով դասընթացներ, որոնց ավարտին մասնակիցներին տրվեցին հավաստագրեր։
Բացի մասնագիտական հանդիպումներից՝ ծրագրում ներառված էին նաև մշակութային այցեր, որոնք օտարերկրյա մասնակիցներին հնարավորություն ընձեռեցին ճանաչելու Հայաստանը և ընկալելու հայ ժողովրդի պատմությունը։
Ֆորումի հյուրերը այցելեցին Սևանավանք, Գոշավանք, Հաղարծին, Էջմիածնի Մայր Տաճար, Մատենադարան, ինչպես նաև Հայոց ցեղասպանության զոհերի հուշահամալիր։
Բարձր գնահատելով ծրագիրը՝ հյուրերը նշեցին, որ նմանօրինակ նախաձեռնությունները պետք է պարբերաբար իրականացվեն՝ ընդհանրացնելով. «Մեր օրերում երիտասարդական կրթական խնդիրները հաճախ ունենում են նույն բնույթը, իսկ դրանց արդյունավետ լուծում տալու լավագույն ձևը ուսանողական ինքնակառավարման մարմինների համագործակցությունն է»։
Հիշեցնենք, որ նախորդ տարի ֆորումին մասնակցել էին միջազգային երեք համալսարանների հինգ ուսանողներ, մինչդեռ այս տարի մասնակիցների թիվը զգալիորեն աճել է՝ ընդգրկելով ավելի քան 20 ուսանողներ 10 համալսարաններից։ Այս աճը փաստում է նախաձեռնության կարևորության և ազդեցության մասին։
Երևանի պետական համալսարանի ուսանողական խորհուրդը շարունակելու է հանդես գալ նման հարթակներով՝ նպաստելով ուսանողական միջազգային համագործակցությանը և երիտասարդ առաջնորդների կարողությունների զարգացմանը։
