Մեկնարկել է «Լավագույն ուսանող» հանրապետական մրցույթը

Մեկնարկել է «Լավագույն ուսանող» հանրապետական մրցույթը, որի նպատակն է խրախուսել ՀՀ բուհերի՝ բարձր առաջադիմություն ունեցող և գիտահետազոտական, ստեղծագործական, ուսանողական ինքնակառավարման և սպորտի ասպարեզներում ակտիվ գործունեություն ծավալող ուսանողներին։

Մրցույթին կարող են մասնակցել առկա ուսուցմամբ բակալավրիատի 2-4-րդ կուրսերի և մագիստրատուրայի կրթական ծրագրի առաջին կիսամյակն ավարտած ուսանողները: ԵՊՀ-ի ներբուհական փուլին մասնակցելու համար անհրաժեշտ է լրացնել դիմում-հայտը և կցել անհրաժեշտ փաստաթղթերը:

Լրացված դիմում-հայտը և պահանջվող փաստաթղթերը մինչև ս.թ․ հոկտեմբերի 8-ը՝ ժամը 16:00-ն, պետք է ներկայացնել ԵՊՀ ընդհանուր բաժին (Կենտրոնական մասնաշենք, 2-րդ հարկ, 207 սենյակ), իսկ փաստաթղթերի էլեկտրոնային (սքանավորված) տարբերակները մեկ ամբողջական pdf ձևաչափով անհրաժեշտ է ուղարկել tatevikhovhannisyan@ysu.am էլհասցեին՝ նամակի «Subject» բաժնում նշելով հետևյալը՝ «Լավագույն ուսանող․ Ձեր անուն-ազգանունը, ֆակուլտետը, կրթական ծրագիրը և կուրսը» (օրինակ՝ «Լավագույն ուսանող․ Պողոս Պողոսյան, Միջազգային հարաբերությունների ֆակուլտետ, մագիստրատուրա, II կուրս»)։

Մրցույթն անցկացվում է երկու փուլով՝ ներբուհական և միջբուհական (հանրապետական), բակալավրի և մագիստրոսի կրթական ծրագրերով` ըստ հետևյալ ոլորտների`

1) բնագիտական (այդ թվում` մաթեմատիկական-տեղեկատվական և հաղորդակցման տեխնոլոգիաներ (ՏՀՏ)),

2) բժշկություն,

3) հումանիտար գիտություններ,

4) հասարակագիտություն,

5) ճարտարագիտություն (այդ թվում` ճարտարապետական/ գյուղատնտեսական),

6) մշակույթ/սպորտ,

7) հայագիտություն:

Մրցույթի անցկացման կարգը՝ այստեղ։