Քարարտադրողների միության սեմինար-քննարկումը ԵՊՀ-ում

ԵՊՀ շրջանավարտների և կարիերայի կենտրոնի և Քարարտադրողների միության գործակցության շրջանակում ԵՊՀ աշխարհագրության և երկրաբանության ֆակուլտետում կազմակերպվեց սեմինար-քննարկում։

Քարարտադրողների միության՝ ԵՊՀ աշխարհագրության և երկրաբանության ֆակուլտետի ուսանողների համար կազմակերպած մասնագիտական հանդիպման ընթացքում ներկայացվեց «Ոչ մետաղային օգտակար հանածոների արդյունաբերության սոցիալ-տնտեսական և բնապահպանական ազդեցությունները» խորագրով զեկուցում։

Հանդիպման ընթացքում անդրադառնալով ոլորտի հիմնական զարգացումներին ու մարտահրավերներին՝ շեշտադրվեցին հետևյալ թեմաները.

• ոչ մետաղային հանքարդյունաբերության ներդրումը ՀՀ տնտեսության մեջ,

• արդյունաբերության նշանակությունը մարզային համայնքների զարգացման ու աշխատատեղերի ստեղծման համար,

• բնապահպանական ռիսկերի նվազեցման արդյունավետ գործիքները,

• պատասխանատու հանքարդյունաբերության միջազգային չափանիշներն ու ՀՀ արդի ցուցանիշները,

• համայնքների հետ համագործակցության կարևորությունը և սոցիալական ներդրումների մոդելները:

Ինտերակտիվ ձևաչափով կազմակերպված հանդիպման շրջանակում ուսանողները հնարավորություն ունեցան հնչեցնելու քարի արտադրության և իրացման ոլորտներին առնչվող բազմաթիվ հարցեր: 

Քննարկումը հնարավորություն տվեց ուսանողներին խորությամբ ծանոթանալու ոլորտի կառուցվածքին, կարգավորումների համակարգին, ինչպես նաև պատկերացում կազմելու կայուն ու պատասխանատու արտադրության անհրաժեշտության մասին։