ԵՊՀ Շառլ Ազնավուրի անվան մշակույթի կենտրոնի դահլիճում ընթացիկ տարվա նոյեմբերի 5-ին «Չորս հարյուր հարված» ֆիլմի ցուցադրությամբ մեկնարկեց «Կինոակումբ»-ի այս տարվա գործունեությունը:
«Կինոակումբ»-ը համախմբել էր ԵՊՀ աշխատակիցներին և ուսանողներին՝ մեկտեղելով կինոարվեստի հանդեպ հետաքրքրությունը։ Օրվա քննարկումը վարեց ռեժիսոր Դիաննա Կարդումյանը, որի մասնակցությունը նախագծին հնարավորություն տվեց ֆիլմի դիտումը վերածելու ոչ միայն գեղարվեստական, այլև մասնագիտական հետաքրքիր երկխոսության։
Ֆրանսիացի նշանավոր ռեժիսոր Ֆրանսուա Տրյուֆոյի դեբյուտային և համաշխարհային կինոյի պատմության մեջ իր ուրույն տեղն ունեցող «Չորս հարյուր հարված»-ը ֆրանսիական նոր ալիքի հիմնասյուներից մեկն է։ 1959 թվականին նկարահանված այս ֆիլմը առանձնանում է իր անկեղծությամբ, հոգեբանական խորությամբ և պատանեկան աշխարհի նուրբ ու հուզիչ պատկերավորմամբ։ Այն պատմում է դեռահաս Անտուան Դուանելի կյանքի, ներաշխարհի, ազատության որոնումների և մեծահասակների աշխարհում իր տեղը գտնելու դժվարությունների մասին։ Ֆիլմն արժանացել է Կաննի կինոփառատոնի՝ լավագույն ռեժիսուրայի մրցանակին և առաջադրվել «Օսկար» մրցանակի՝ «Լավագույն օրիգինալ սցենար» անվանակարգում։
Ֆիլմի ցուցադրությունից հետո տեղի ունեցավ քննարկում, որի ընթացքում ուսանողները ռեժիսոր Դիաննա Կարդումյանի հետ անդրադարձան ֆիլմի գաղափարական շերտերին, կերպարների հոգեբանական առանձնահատկություններին, ռեժիսորական լուծումներին և ստեղծագործության արդիականությանը։ Հանդիպումը հնարավորություն ընձեռեց ոչ միայն կիսվելու դիտման ընթացքում առաջացած տպավորություններով, այլև կինոմատոգրաֆիական տեսանկյունից նորովի բացահայտելու ստեղծագործությունը։
«Կինոակումբի» հերթական հանդիպումը ևս մեկ առիթ էր արժևորելու համաշխարհային կինոյի դասական ժառանգությունը, բացահայտելու կինոարվեստի լեզուն և ֆիլմի շուրջ ձևավորելու մտքերի ու տեսակետների կենդանի փոխանակում։
