Delegation from Martin Luther University Halle-Wittenberg visits YSU to strengthen educational cooperation

A delegation from Martin Luther University Halle-Wittenberg, led by Rector Claudia Becker, visited Yerevan State University with the aim of enhancing Armenian-German relations in the field of higher education. During the visit, the delegation members met with YSU Rector Hovhannes Hovhannisyan, vice rectors, administrative staff, and faculty members. The discussions focused on promoting educational cooperation between the two countries, exploring opportunities for new academic and exchange programs.

Մարտին Լյութերի անվան Հալլե-Վիթթենբերգի համալսարանը Գերմանիայի առաջատար կրթական հաստատություններից մեկն է, որն ակտիվ համագործակցում է միջազգային բազմաթիվ համալսարանների հետ՝ իրականացնելով ուսանողների ու դասախոսների փոխանակման ծրագրեր, կատարելով համատեղ հետազոտական նախագծեր, անցկացնելով միջազգային կոնֆերանսներ։ Այսօր Երևանի պետական համալսարանը հյուրընկալեց այդ համալսարանի պատվիրակությանը, որի կազմում էին ռեկտորը և պրոֆեսորները՝ քննարկելու հայ-գերմանական կրթական և գիտական համագործակցության հնարավորությունները, մշակելու համատեղ նոր ծրագրեր։

Գլխավոր նպատակը՝ համագործակցության ամրապնդում

Հանդիպման ընթացքում կողմերը ստորագրեցին գիտական և մշակութային համագործակցության համաձայնագիր, որով արտահայտեցին իրենց մտադրությունը՝ հաստատելու գործակցային կապեր գիտական հետազոտությունների, ուսուցման և մշակութային գործունեության ոլորտներում։

Համագործակցությունն իրագործվելու է հետևյալ ուղղություններով՝ գիտահետազոտական նախագծերի պլանավորում և կատարում, դասախոսների, գիտաշխատողների և ուսանողների փոխանակման ծրագրեր (պրակտիկա և ամառային դասընթացներ), ինչպես նաև համատեղ գիտաժողովների և մշակութային միջոցառումների կազմակերպում։

ԵՊՀ ռեկտոր Հովհաննես Հովհաննիսյանը, խոսելով համագործակցության կարևորության մասին, ընդգծեց, որ Մարտին Լյութերի անվան Հալլե-Վիթթենբերգի համալսարանի հետ ձևավորված գործակցությունը կարևոր քայլ է հայ-գերմանական կրթական ու գիտական կապերի ամրապնդման գործում։ Նա նշեց, որ այս այցը ստեղծում է փորձի փոխանակման և համատեղ ծրագրերի մշակման հնարավորություն, որը կնպաստի բարձրագույն կրթության որակի բարձրացմանը։ Նա խոսեց փոխանակման ծրագրերի մասին, որոնք հնարավորություն են տալիս ուսանողներին և դասախոսական կազմին ձեռք բերելու միջազգային փորձ և հարստացնելու իրենց գիտելիքների պաշարը: Հովհաննես Հովհաննիսյանն ընդգծեց, որ այսօրինակ ծրագրերը նպաստում են երկու երկրների բարձրագույն ուսումնական հաստատությունների միջև կապերի ամրապնդմանը և նպաստում նորարարական համատեղ հետազոտությունների կատարմանը:

«Հուսով եմ, որ համագործակցությունն ապագայում շատ ավելի արդյունավետ կդառնա երկու հաստատությունների համար»,- մատնանշեց Հովհաննես Հովհաննիսյանը՝ ներկայացնելով ԵՊՀ համագործակցությունների, հավատարմագրում անցած կրթական ծրագրերի, դասավանդման մեթոդաբանության, ինչպես նաև կրթության ոլորտում հնարավոր փոփոխությունների մասին տեղեկություններ։

Կլաուդիա Բեքերը ներկայացրեց Մարտին Լյութերի անվան Հալլե-Վիթթենբերգի համալսարանի կրթական ծրագրերը՝ կարևորելով միջազգային համագործակցությունը՝ որպես բարձրագույն կրթության զարգացման հիմնաքար։ Նա հատկապես ընդգծեց ուսանողների և դասախոսական անձնակազմի փոխանակման հնարավորությունները, ինչպես նաև այն համատեղ գիտահետազոտական նախագծերը, որոնք խթանում են գիտելիքի փոխանակումը, նորարարական մտածողությունը և գիտական կապերի ամրապնդումը:

Հանդիպման ընթացքում կողմերն անդրադարձան հայ-գերմանական միջբուհական համագործակցության և կրթության ու գիտության ոլորտներում հետագա գործակցության ընդլայնման հարցերին։

Ապագա ծրագրեր և հեռանկարներ

Այցի շրջանակում ձեռք բերված պայմանավորվածությունները հիմք կդառնան նոր ծրագրերի և նախագծերի մեկնարկի համար։ Երկուստեք հետաքրքրություն կա ստեղծելու ակտիվ և բազմակողմանի համագործակցային հարթակներ, որոնք նոր շունչ կհաղորդեն գիտակրթական փոխգործակցությանը։

Հանդիպումը շարունակվեց ԵՊՀ գիտական խորհրդի նիստերի դահլիճում․ պատվիրակության անդամները հնարավորություն ունեցան ծանոթանալու, հանդիպելու ԵՊՀ դասախոսների, հետազոտողների հետ և քննարկելու փոխադարձ հետաքրքրություն ներկայացնող հարցեր ու հնարավոր համագործակցության ուղղություններ։