«Los Angeles Times»-ը՝ Հայաստանի գիտակրթական և տեխնոլոգիական ներուժի մասին․ հատուկ անդրադարձ ԵՊՀ-ին

«Armenia Special Report» խորագրով հատուկ զեկույցում զետեղված հարցազրույցում Հովհաննես Հովհաննիսյանը մատնանշում է, որ ԵՊՀ-ն ոչ միայն կրթական, այլև հետազոտական հզոր հաստատություն է՝ 21 ֆակուլտետով և գիտահետազոտական 9 ինստիտուտով։ Միջազգային գրախոսվող գիտական հրապարակումների թվով էլ համալսարանը առաջատարն է Հայաստանում։ 

Վերջին տարիներին պետական ներդրումների շնորհիվ զգալիորեն արդիականացվել է համալսարանի գիտական ենթակառուցվածքը։ Այդ համատեքստում կարևորագույն նախաձեռնություններից է արհեստական բանականության կենտրոնի ստեղծումը ԵՊՀ-ում։ 

ԵՊՀ ռեկտորը մատնանշել է, որ դեկտեմբերին ԵՊՀ-ում բացվել է Հայաստանում արհեստական բանականության ամենամեծ կենտրոնը՝ ընդգծելով, որ շուրջ 8 միլիոն ԱՄՆ դոլար արժողությամբ GPU-ներից բաղկացած գերհամակարգիչը տարածաշրջանում ամենահզորներից մեկն է։

Հ․ Հովհաննիսյանի խոսքով՝ համալսարանի զարգացման հիմքում են կարևոր արժեքներ՝ պատասխանատվություն, թափանցիկություն, հաշվետվողականություն, ակադեմիական ազատություն և նորարարություն։ Ուսումնական ծրագրերը պարբերաբար վերանայվում են՝ համապատասխանեցվելով աշխատաշուկայի պահանջներին։

«Գիտությունը չպետք է մեկուսացած լինի․ այն պետք է լինի աշխարհի մի մասը»,- ընդգծել է ռեկտորը՝ շեշտելով, որ ԵՊՀ-ն համագործակցում է ավելի քան 50 երկրների գիտակրթական հաստատությունների հետ։

ԵՊՀ-ում իրականացվող նախաձեռնությունները վկայում են, որ համալսարանը շարունակում է ամրապնդել իր դիրքը որպես Հայաստանի գիտակրթական և տեխնոլոգիական զարգացման առանցքային կենտրոն։