May 12, 2026 | 10:00
Education
Society
Events
YSU Alumni Forum nears: what to expect and why to attend
On May 16, the founding day of Yerevan State University, the university will once again serve as a platform for alumni from different generations to reconnect, exchange ideas and build new partnerships. This year, the YSU Alumni Forum will be held in a more interactive format, combining professional discussions, experience-sharing and opportunities for informal communication. Astghik Mnatsakanyan, Director of the YSU Alumni and Career Center, spoke about the forum's new format, discussion topics and the initiative's significance for the YSU community.
Մասնագիտական քննարկումներ, հաջողության պատմություններ և նոր կապեր ձևավորելու հնարավորություններ․ այս ձևաչափով է օրեր անց անցկացվելու ԵՊՀ շրջանավարտների ֆորումը։ Շրջանավարտների բանախոսություններից մինչև դինամիկ «ԶրուցԱրագ» հանդիպումներ․ ֆորումը միավորելու է փորձը, նոր գաղափարներն ու համալսարանական համայնքը։ Թե ինչ է սպասվում այս տարի, պատմում է Աստղիկ Մնացականյանը։
- Ինչո՞վ է ԵՊՀ շրջանավարտների այս տարվա ֆորումը տարբերվելու նախորդ տարվա ֆորումից, և ինչո՞ւ արժե մասնակցել։
- Ֆորումի նպատակն է մայր բուհը կրկին դարձնել հանդիպման, վերամիավորման ու նոր կապերի ձևավորման հարթակ տարբեր սերունդների շրջանավարտների համար։ Հենց այս գաղափարով էլ այս տարի միջոցառումն անցկացվելու է ավելի ինտերակտիվ և մասնակցային ձևաչափով։ Ի տարբերություն նախորդ տարվա՝ այս տարի ֆորումի ընթացքում նախատեսված են ինչպես թեմատիկ պանելային քննարկումներ, այնպես էլ ոչ ֆորմալ հաղորդակցության ձևաչափեր, որոնք հնարավորություն կտան մասնակիցներին ծանոթանալու, մտքեր փոխանակելու և տարբեր սերունդների ու մասնագիտությունների շրջանավարտների միջև ձևավորելու նոր համագործակցություններ և իրական կապեր։
Օրվա ավարտին նախատեսվում է նաև կոնցեպտուալ կոկտեյլ-բար և «In Vino Veritas» սիմպոզիումը՝ մեկ գավաթ գինու կամ կոկտեյլի շուրջ տարբեր թեմաներով ազատ քննարկման համար։
- Ֆորումի կարևոր նպատակներից մեկը ԵՊՀ-շրջանավարտ կապի ամրապնդումն է․ ի՞նչ նոր գործիքներ կամ նախաձեռնություններ են նախատեսվում՝ այս կապը ոչ միայն խորհրդանշական, այլև գործնական ու շարունակական դարձնելու համար։
- Այս տարվա ֆորումի կարևոր բաղադրիչներից են «ԵՊՀ–համայնք համագործակցություն» խորագրով թեմատիկ 4 քննարկումները, որոնք անցկացվելու են կրթության, գիտության, ենթակառուցվածքների և հանրային պատասխանատվության ուղղություններով։
Քննարկումների նպատակն է հասկանալ, թե գործնական ինչ համագործակցություն կարող է ձևավորվել ԵՊՀ-ի և շրջանավարտների համայնքի միջև, ինչ խնդիրներ կան այսօր և ինչ ռեսուրսներ են անհրաժեշտ դրանք լուծելու համար։
Մասնակիցների հետ միասին փորձելու ենք պատասխանել մի քանի հիմնարար հարցերի․
Ի՞նչ կարող է ԵՊՀ-ն տալ իր շրջանավարտներին։
Ի՞նչ կարող են շրջանավարտները տալ համալսարանին։
Ի՞նչ ռեսուրսներ են անհրաժեշտ և որտեղի՞ց գտնել դրանք։
Ինչպե՞ս այդ համագործակցությունը դարձնել կայուն, շարունակական և ինստիտուցիոնալ։
Քննարկումները մոդերացնելու են Հայ սոցիոլոգների ասոցիացիայի մասնագետները։ Քննարկումների ամփոփման հիման վրա պատրաստվելու է զեկույց, որը հիմք կծառայի երկարաժամկետ գործողությունների և գործընթացների ինստիտուցիոնալացման համար։
Բացի թեմատիկ քննարկումներից՝ այս տարի նախատեսվում են նաև մասնակցային ձևաչափեր, որոնք նպատակ ունեն շրջանավարտ–ԵՊՀ կապը դարձնելու ավելի անձնական և գործնական։
Նոր ձևաչափ է «Երազում եմ → Պլանավորում եմ → Հանձնառում եմ» նախաձեռնությունը։ Մասնակիցները հնարավորություն կունենան ձևակերպելու, թե ինչպես են պատկերացնում ԵՊՀ-ն ապագայում, ինչ ներդրում կարող են ունենալ իրենք և ինչ կոնկրետ քայլեր են պատրաստ կատարելու առաջիկա մեկ տարվա ընթացքում։
Միջոցառման ավարտից հետո գրառումները մասնակիցներին կուղարկվեն էլեկտրոնային տարբերակով՝ որպես անձնական հանձնառության հիշեցում։
Բացի դրանից՝ նախատեսվում է համատեղ վարպետաց դաս ԵՊՀ Իջևանի մասնաճյուղի հետ գործակցությամբ՝ հուշանվերների ստեղծման ձևաչափով։
- Այս տարի ևս օրակարգում առանձնահատուկ տեղ ունեն պանելային քննարկումները։ Ի՞նչ սկզբունքով են ընտրվել քննարկումների թեմաները։
- Այս տարվա ֆորումի օրակարգում ներառված են չորս հիմնական պանելային քննարկումներ, որոնց շրջանակում անդրադարձ է կատարվելու տարբեր, բայց փոխկապակցված թեմաների՝
հայագիտության զարգացման ժամանակակից հեռանկարներին,
«CoP-17»-ի շրջանակում Հայաստանի և ակադեմիական համայնքի դերակատարությանը,
ժամանակակից աշխարհում կրթության փոխակերպումներին,
ԵՊՀ-ի՝ նորարարական էկոհամակարգ դառնալու և այդ ամենում ԱԲ տեխնոլոգիաների դերակատարման ու հնարավորություններին, ինչպես նաև առկա մարտահրավերներին։
Թեմաների ընտրությունը պայմանավորված է ինչպես ԵՊՀ 2025-2030 ռազմավարական առաջնահերթություններով, այնպես էլ համալսարանի՝ մի շարք ոլորտներում համակարգող և օրակարգ ձևավորող դերակատարությամբ։
- Ֆորումը նաև հարթակ է հաջողության պատմությունների ներկայացման համար։ Ձեր դիտարկմամբ՝ ինչո՞ւ է կարևոր, որ ներկայիս ուսանողներն ու նորավարտները լսեն ԵՊՀ շրջանավարտների մասնագիտական ճանապարհի մասին։
- Կարծում եմ՝ շրջանավարտների հաջողության պատմությունները ուսանողների համար դառնում են ոչ միայն գիտելիքի աղբյուր, այլև հնարավորություն՝ սովորելու դերային օրինակ հանդիսացող մարդկանցից (role-models), ծանոթանալու նրանց փորձառությանն ու անցած ճանապարհին և իրականում տեսնելու, թե համալսարանական տարիներից սկսած՝ կրթությունն ու նախաձեռնողականությունը ինչպես կարող են վերածվել մասնագիտական մեծ ձեռքբերումների։ Ուսանող–շրջանավարտ կապի ամրապնդման նպատակով այս տարի շարունակվելու է նաև նախորդ տարի հաջողությամբ իրականացված «Շրջանավարտների բանախոսություններ» ձևաչափը, որի ընթացքում հաջողության հասած շրջանավարտները «TEDTalk»-ային կարճ ելույթներով պատմում են իրենց փորձի և մասնագիտական ճանապարհի մասին։
Նոր ձևաչափերից մեկի՝ «ՀարցՈՒՓորձ»-ի շրջանակում էլ շրջանավարտները կմասնակցեն ինքնահարցազրույցների՝ ավելի անձնական և անկեղծ խոսելով իրենց ընտրությունների, սխալների, մարտահրավերների և հաջողությունների մասին։ Միաժամանակ, այս տարի առաջին անգամ անցկացվելու է «ԶրուցԱրագ»-ը՝ կարճ և դինամիկ հանդիպումների շարք, որտեղ ուսանողները և շրջանավարտները, պարբերաբար փոխելով զրուցակիցներին, հնարավորություն կունենան քննարկելու կարիերայի հնարավորությունները, մասնագիտական փորձը և նոր կապեր ձևավորելու ուղիները։ Այս ձևաչափը նպատակ ունի ապահովելու փորձի փոխանակում շրջանավարտների և ուսանողների միջև դինամիկ ու անկաշկանդ միջավայրում։
- ԵՊՀ շրջանավարտների ֆորումն արդեն ավանդույթ է դարձել։ Ձեր կարծիքով՝ ինչպե՞ս է այս նախաձեռնությունը փոխում համալսարանական համայնքի մշակույթը և ինչպիսի՞ երկարաժամկետ ազդեցություն կարող է ունենալ ԵՊՀ զարգացման վրա։
- Կարծում եմ՝ նման նախաձեռնություններն աստիճանաբար փոխում են համալսարանական համայնքի մշակույթը՝ դարձնելով այն ավելի բաց, համագործակցային և համակողմանի ներգրավվածության վրա հիմնված։ Եթե նախկինում շրջանավարտ–համալսարան կապը հաճախ ավարտվում էր դիպլոմ ստանալու պահից, ապա այսօր ձևավորվում է ավելի երկարաժամկետ և գործընկերային մոդել, որտեղ շրջանավարտը կարող է լինել ոչ միայն հիշողության կրող, այլև համալսարանի զարգացման ակտիվ մասնակից։
Երկարաժամկետ առումով սա կարող է նպաստել ավելի ուժեղ մասնագիտական ցանցերի ու նոր համագործակցությունների ձևավորմանը, համայնքային կապերի ամրապնդմանը, գիտակրթական և մասնագիտական ռեսուրսների փոխանակմանը և ապահովել երկարաժամկետ աջակցություն ԵՊՀ ռազմավարական զարգացմանը։
Ավարտելով զրույցը՝ Աստղիկ Մնացականյանը նշում է, որ շրջանավարտների ֆորումը պարզապես միջոցառում չէ, այլ համայնք ձևավորելու և ԵՊՀ–շրջանավարտ կապը նոր մակարդակի հասցնելու հնարավորություն։ Նրա խոսքով՝ ֆորումը միավորում է տարբեր սերունդների, փորձի ու մասնագիտությունների տեր մարդկանց՝ ստեղծելով միջավայր, որտեղ համալսարանական հիշողությունները վերածվում են նոր գաղափարների, համագործակցությունների և ապագային միտված նախաձեռնությունների։
Միացե՛ք ԵՊՀ շրջանավարտների ֆորումին՝ վերադառնալու մայր բուհ, հանդիպելու տարբեր տարիների շրջանավարտների, լսելու ոգեշնչող պատմություններ և դառնալու նոր գաղափարների ու համագործակցությունների ձևավորման մի մասը։ Գրանցվելու համար սեղմել այստեղ։
