Նոր լեզու, նոր երկիր, նոր հնարավորություն. օտարերկրյա ուսանողները ավարտեցին ԵՊՀ նախապատրաստական դասընթացները

Յուրաքանչյուր տարի աշխարհի տարբեր անկյուններից տասնյակ ուսանողներ դիմում են Երևանի պետական համալսարան՝ ոչ միայն հայկական բարձրագույն կրթական համակարգում մասնագիտական կրթություն ստանալու, այլև հայոց լեզուն ուսումնասիրելու, հայ մշակույթին ծանոթանալու և Հայաստանը ճանաչելու։

Այս գործընթացում առանցքային դեր ունի ԵՊՀ նախապատրաստական դասընթացների բաժինը, որը ստեղծում է նաև հայոց լեզվի ուսուցման արդյունավետ միջավայր՝ կրթական ընդհանուր ծրագրերի շրջանակում (մաթեմատիկա, պատմություն, քիմիա, կենսաբանություն, աշխարհագրություն, օտար լեզու և այլն) գիտելիքներ փոխանցելուց զատ: Նախապատրաստական դասընթացների նպատակն է հայերենին չտիրապետող քաղաքացիներին աջակցել լեզվական հմտությունների զարգացման, ինչպես նաև մասնագիտական առարկաների նախնական գիտելիքների ձևավորման հարցում՝ ապահովելով նրանց հարմարվողականությունն ու պատրաստվածությունը ԵՊՀ ուսումնական գործընթացին: 

ԵՊՀ ընդունելության և դիմորդների հետ տարվող աշխատանքների կենտրոնի նախապատրաստական դասընթացների բաժնի վարիչ Լիլիթ Գասպարյանը, խոսելով բաժնի այն գործունեության մասին, որն առնչվում է օտարերկրյա ուսանողներին, նշեց. «Առաջին կիսամյակում նրանք ինտենսիվորեն ուսումնասիրել և սովորել են հայոց լեզու, իսկ այնուհետև այն առարկաները, որոնք անհրաժեշտ են քննություններին պատրաստվելու համար։ Նրանք ոչ միայն սովորում են հայերեն, այլև ծանոթանում են մեր մշակույթին, ճանապարհորդում են Հայաստանում և ընկերանում մեր հայ ուսանողների հետ, ինչը օգնում է նրանց հետագայում լիարժեքորեն ինտեգրվել համալսարանական միջավայրում»։

Նախապատրաստական դասընթացների ամփոփիչ միջոցառմանն իր բարեմաղթանքներով հանդես եկավ հայոց լեզվի դասախոս Սիմոն Պետրոսյանը՝ ուսանողներին փոխանցելով ջերմ խոսքեր. «Սրտանց ցանկանում եմ, որ լինեք առաջադեմ, սիրեք ու զարգացնեք հայոց լեզուն, որը ձեզ կապում է մեր մշակույթին ու ինքնությանը։ Թող մասնագիտական ճանապարհը ձեզ համար լինի հաղթանակներով լի, իսկ այս կարևոր փուլը՝ սոսկ սկիզբը ձեր հաջողությունների»,- ասաց նա։ 

Այնուհետև օտարերկրյա ուսանողները հանդես եկան հայերեն գեղեցիկ խոսքով՝ արտահայտելով իրենց երախտագիտությունը, պատմելով տպավորությունների մասին և արտասանելով իրենց սիրելի հայ բանաստեղծների՝ Հովհաննես Շիրազի և Հովհաննես Թումանյանի ստեղծագործություններից հատվածներ։ 

Նախապատրաստական դասընթացները հաջողությամբ ավարտեցին երեք ուսանողներ Չինաստանից և Իրանից։ Իրանցի Մոհամմադէրիֆան Թահերին այժմ ազատ ու գրագետ խոսում է հայերեն։ Նա նպատակ ունի ուսումը շարունակելու ԵՊՀ ինֆորմատիկայի և կիրառական մաթեմատիկայի ֆակուլտետի բակալավրիատի կրթական ծրագրով։

«Հայերենը սովորել եմ հենց Երևանի պետական համալսարանում մեր բարի ու հոգատար դասախոսների շնորհիվ։ Ցանկանում եմ այստեղ շարունակել ուսումս ու ապագայում նաև աշխատել։ Իմ ընկերներից եմ լսել, որ ԵՊՀ-ն Հայաստանի լավագույն համալսարաններից է, և հենց այդպես էլ որոշեցի դիմել»,- պատմում է Մոհամմադէրիֆան Թահերին՝ հավելելով, որ համալսարանի իր ամենասիրելի վայրը ԵՊՀ կենտրոնական մասնաշենքի մոտ գտնվող շատրվանների տարածքն է, որտեղ սիրում է նստել և հանգստանալ։

Նրա խոսքով՝ ԵՊՀ-ն երեք բառով կարելի է նկարագրել՝ պրոֆեսիոնալ, մարդասեր և գեղեցիկ։ Անկեղծորեն պատմում է, որ սիրել է Հայաստանի գրեթե բոլոր անկյունները, հատկապես տպավորված է Գառնիի տաճարով և Գեղարդի վանքով։ Բացի ճամփորդելուց՝ Թահերին մեծ հաճույքով լսում է հայկական երաժշտություն, ինչը, ըստ նրա, օգնում է ավելի լավ զգալ հայ մշակույթը։

Չինաստանից ժամանած Ժոու Գաոշունը Հայաստանում ունի իր հայկական անունը՝ Երջանիկ, քանի որ հենց այդպես է թարգմանվում նրա չինական անունը։ Երջանիկը իր երկրում չորս տարի սովորել է և պատրաստվում է ուսումը շարունակելու Երևանի պետական համալսարանի ժուռնալիստիկայի ֆակուլտետի «Հեռուստալրագրություն» մագիստրոսական ծրագրով։ Հայերեն խոսում է հանդարտ ու տպավորիչ վստահությամբ։ Ասում է, որ ցանկանում է դառնալ փորձառու լրագրող։ 

«Հայ ընկերներս ինձ շատ են օգնում՝ սովորեցնելով նոր բառեր, նոր արտահայտություններ։ Շատ են օգտագործում «ջան» բառը։ Ինձ դիմելիս ասում են՝ «Երջանիկ ջան». դա ինձ շատ է դուր գալիս, մարդիկ այստեղ շատ բարի են»,- ասում է նա ժպիտով։

Չինաստանից ժամանած Ժանգ Յուհոնգը՝ Աստղիկը, համալսարանի ԻԿՄ ֆակուլտետի մագիստրատուրայի ապագա ուսանող է։ Նա սիրով պատմում է իր տպավորությունների մասին՝ շեշտելով, որ մեծ սեր է զգում հայոց լեզվի հանդեպ։

«Շատ եմ սիրել հայոց լեզուն։ Այն ունի գեղեցիկ հնչողություն և խոր իմաստներ։ Մեր դասախոսները ոչ միայն մասնագետներ են, այլև հոգատար մարդիկ»,- նշում է նա։

Թեև ուսանողները շարունակելու են իրենց կրթական ճանապարհը տարբեր մասնագիտություններով ու ֆակուլտետներում, սակայն բոլորին միավորում է մեկ ընդհանուր ուղի՝ ուսման ու ինքնազարգացման ուղին։ Նրանք ոչ միայն զարգացնելու են մասնագիտական հմտությունները, այլև խորությամբ ծանոթանալու են հայոց լեզվին, քայլ առ քայլ բացահայտելու են Հայաստանի մշակույթը, պատմությունը և առօրյա կյանքը։ Այս ամենը կօգնի նրանց ոչ միայն դառնալ իրենց երազած մասնագետները, այլև կապող օղակ Հայաստանի ու իրենց երկրների միջև։

Նշենք, որ նախորդ տարի ևս 23 օտարերկրյա ուսանողներ ավարտեցին նախապատրաստական դասընթացները՝ ստանալով ավարտական վկայականներ: