Սեպտեմբերի 15-ին ԵՊՀ Եվրոպական ուսումնասիրությունների կենտրոնը հյուրընկալեց Գլոբալ Կամպուս մարդու իրավունքների նախագահ Վերոնիկա Գոմեսին, ով կենտրոնի ուսանողների համար կարդաց դասախոսություն «Մարդու իրավունքները Ամերիկայում» թեմայով։
Դասախոսության ընթացքում Վերոնիկա Գոմեսը ներկայացրեց մարդու իրավունքների պաշտպանության ձևավորման պատմական նախադրյալները Ամերիկայում՝ սկսած գաղութատիրական ժամանակաշրջանից մինչև ժամանակակից միջազգային մեխանիզմները։ Ներկայացվեցին եվրոպական գաղութատիրության հետևանքները՝ բնիկ ժողովուրդների զանգվածային ոչնչացում, հարկադիր աշխատանք և ստրկության համակարգ, ինչպես նաև դրանց սոցիալ-տնտեսական ու իրավական հետևանքները։
Առանձնահատուկ ուշադրություն դարձվեց մարդու իրավունքների պաշտպանության ոլորտում ձևավորված իրավական հիմքերին՝ սկսած XVI դարի «Նոր օրենքներից» մինչև XX դարի միջազգային նախաձեռնություններ։ Գոմեսը ընդգծեց 1948 թ․ Բոգոտայի կոնֆերանսի և Ամերիկյան հռչակագրի մարդու իրավունքների և պարտականությունների մասիննշանակությունը, որը հիմք դարձավ տարածաշրջանային մարդու իրավունքների պաշտպանության համակարգի համար։
Ներկայացվեց նաև Միջամերիկյան մարդու իրավունքների համակարգի գործունեությունը՝ Մարդու իրավունքների միջամերիկյան հանձնաժողովի և Մարդու իրավունքների միջամերիկյան դատարանի դերը մարդու իրավունքների խախտումների կանխարգելման և պաշտպանության գործում։
Դասախոսության ավարտին Վերոնիկա Գոմեսը բարձրացրեց արդիական հարցեր՝ արդյո՞ք իրավական մեխանիզմները կարող են արդյունավետորեն հաղթահարել կառուցվածքային անհավասարությունները, և արդյո՞ք այդ անհավասարությունների պահպանությունը չի վտանգում ժողովրդավարության լեգիտիմությունը։
Այս հանդիպումը հնարավորություն տվեց ԵՊՀ Եվրոպական ուսումնասիրությունների կենտրոնի ուսանողներին ոչ միայն ծանոթանալու մարդու իրավունքների պաշտպանության ամերիկյան փորձին, այլև քննարկելու համաշխարհային նշանակության հիմնահարցեր միջազգային փորձագետի հետ։
