ԵՊՀ պատմության ֆակուլտետի հայ արվեստի պատմության և տեսության ամբիոնի գիտական սեմինարների շրջանակում ս.թ. հոկտեմբերի 1-ին կայացավ ազգագրագետ, պ.գ.թ., դոցենտ Լևոն Աբրահամյանի դասախոսությունը՝ «Փարաջանովի ֆիլմերի պոետիկան» թեմայով։
Դասախոսությունը նվիրված էր Սերգեյ Փարաջանովի «Նռան գույնը» ֆիլմի պոետիկ լեզվի վերլուծությանը։ Լ. Աբրահամյանն անդրադարձավ ֆիլմի խորհրդանշային համակարգին, գեղարվեստական լուծումներին և դրանց միջոցով փոխանցված մշակութային շերտերին։ Նա շեշտեց, որ «Նռան գույնը» ոչ միայն համաշխարհային կինոյի գլուխգործոց է, այլև յուրահատուկ բանաստեղծական տեքստ՝ արտահայտված կինեմատոգրաֆիական ձևով։
Դասախոսության ընթացքում բանախոսը ներկայացրեց նաև ֆիլմի ստեղծման նախապատմությունից ուշագրավ դրվագներ։ Մասնավորապես՝ «Նռան գույնը» ֆիլմը նախապես վերնագրված է եղել «Սայաթ-Նովա», սակայն ինչ-ինչ պատճառներով հրահանգվել է վերանվանել։ Փարաջանովին առաջարկվել է այլ տարբերակ, սակայն արդյունքում ընտրվել է «Նռան գույնը» վերնագիրը։ Մինչև ֆիլմի նկարահանումները Փարաջանովն իր հարցազրույցներից մեկում նշել է. «Ես պատմությունը չեմ նկարելու, բայց պատմական իրերն այնպես են լինելու, որ հասկանալի է լինելու Սայաթ-Նովայի էպոխան»։ Նա շեշտել է, որ նպատակ ունի ներկայացնելու Սայաթ-Նովայի ստեղծած բանաստեղծական կերպարները՝ նրանց խորհրդանիշներով ու գեղարվեստական աշխարհով։
Դասախոսությունն ուշագրավ էր նաև նրանով, որ համեմված էր բանախոսի անձնական հիշողություններով թե՛ ֆիլմի նկարահանման հարթակից, թե՛ Փարաջանովի հետ հետագա շփումներից։ Այս պատմությունները դասախոսության մասնակիցներին հնարավորություն ընձեռեցին ֆիլմը և դրա ստեղծողին ընկալելու ոչ միայն տեսական դիտանկյունից, այլև կենդանի ու անձնական հուշերի միջոցով։ Նշենք, որ Լևոն Աբրահամյանը նկարահանվել է «Նռան գույնը» ֆիլմում։
Դասախոսությունն ավարտվեց ակտիվ քննարկմամբ։ Ներկաները հնարավորություն ունեցան անմիջապես հարցեր ուղղելու Լ. Աբրահամյանին և մտքեր փոխանակելու Փարաջանովի արվեստի ու կինեմատոգրաֆիական ժառանգության շուրջ։
Հավելենք, որ Հայ արվեստի պատմության և տեսության ամբիոնի գիտական սեմինարների շարքը լինելու է շարունակական՝ նպատակ ունենալով ուսանողներին և հետազոտողներին պարբերաբար ներգրավելու մշակութային և պատմական առանցքային թեմաների քննարկումներում։
