Գիտությունը՝ նոր ձևաչափով․ ԵՊՀ-ում մեկնարկել է փոդքասթների շարք

Փոդքասթների շրջանակում անդրադարձ է կատարվում ֆիզիկայի արդիական ոլորտներին և կարևոր թեմաներին։ Հյուրերը ներկայացնում են իրենց մասնագիտական ուղին՝ խոսելով գիտության ընտրության շարժառիթների, հանդիպած դժվարությունների, ձեռքբերումների և ներկայիս գործունեության մասին՝ միաժամանակ ընդգծելով գիտնականի աշխատանքի կարևորությունը հասարակության զարգացման գործում։

Նախաձեռնությունն ուղղված է ոչ միայն ուսանողներին և գիտնականներին, այլև աշակերտներին, որոնք հետաքրքրված են գիտությամբ կամ դեռևս մասնագիտական կողմնորոշման փուլում են։ Այն հնարավորություն է տալիս խորքային քննարկումների միջոցով ստանալու իրենց հետաքրքրող հարցերի պատասխանները և ձևավորելու գիտության վերաբերյալ սեփական պատկերացումները։

Փոդքասթի առաջին հյուրը պրոֆեսոր Արշակ Վարդանյանն էր։ Զրույցի ընթացքում նա ներկայացրեց իր գիտական ուղին և հետազոտական հետաքրքրությունների շրջանակը՝ անդրադառնալով ֆիզիկայի դերին, առավել հետաքրքիր ուղղություններին և ինստիտուտում իրականացվող կրթական ծրագրերին։

Արշակ Վարդանյանն ընդգծեց, որ ֆիզիկան փորձարարական և բազմաշերտ գիտություն է, սակայն ոլորտում հաջողության հասնելու համար անհրաժեշտ է ունենալ հիմնարար գիտելիքներ, որոնց հիման վրա հնարավոր է կատարել բարդ և կարևոր գիտափորձեր։

Փոդքասթի մասին տեսանյութը՝ շուտով։