ԵՊՀ-ում գործարկվել է «Եվրասիական ուսումնասիրություններ» մագիստրոսական նոր ծրագիրը

Ծրագրի նպատակները

Մեկուկես տարի տևողությամբ ծրագիրը մշակվել է ԵՊՀ միջազգայնացման ռազմավարության շրջանակում և միտված է ներգրավելու ինչպես տեղացի, այնպես էլ միջազգային ուսանողների, որոնք հետաքրքրված են հետխորհրդային Եվրասիայի ժամանակակից հասարակությունների, մշակույթների, քաղաքական գործընթացների և տարածաշրջանային փոխկապակցվածությունների խորքային ուսումնասիրմամբ։

Ծրագիրը կենտրոնացած է հետխորհրդային Եվրասիայի պատմաքաղաքական լայն տարածքի վրա՝ առանձնահատուկ ուշադրություն դարձնելով Ռուսաստանին, Հայաստանին և Հարավային Կովկասին։ Այն հնարավորություն կտա ուսումնասիրելու տարածաշրջանում ընթացող արդի վերափոխումները, աճող գլոբալ լարվածությունների ազդեցությունը, հետխորհրդային Ռուսաստանի քաղաքական զարգացումները, ինչպես նաև Հայաստանի սոցիոմշակութային և քաղաքական մարտահրավերները՝ ավելի լայն տարածաշրջանային համատեքստում։

Միջգիտակարգային մոտեցում

Մագիստրոսական նոր ծրագիրը ձևավորվում է միջազգային հարաբերությունների մասնագիտացման շրջանակում և միավորում է մի շարք ակադեմիական ուղղություններ՝ տարածքային ուսումնասիրություններ, քաղաքագիտություն, միջազգային հարաբերություններ, սոցիոլոգիա, մշակութային մարդաբանություն, պատմություն, ինչպես նաև մշակութային և հիշողության ուսումնասիրություններ։ Այս համադրությունը ծրագրին տալիս է միջգիտակարգային բնույթ և ապահովում տարածաշրջանի համակողմանի ուսումնասիրության հնարավորություն։

Դասընթացներ և թեմաներ

Ծրագրի դասընթացների շրջանակում նախատեսվում են թեմաներ, որոնք վերաբերում են՝

• հետխորհրդային Եվրասիայի ապագաղութացման գործընթացներին,

• Ռուսաստանի նոր և ժամանակակից պատմությանը,

• տարածաշրջանային քաղաքականությանն ու անվտանգությանը,

• Կովկասի էթնիկական և ազգային հակամարտություններին,

• 21-րդ դարի մշակութային հիշողությանը, մեդիա վերափոխումներին,

• ժողովրդավարության տեսությանն ու պրակտիկային,

• քաղաքացիական հասարակությանը, ինչպես նաև ռուսերենին և հայերենին,

• մասնագիտական հայերեն և ռուսերեն։

Առաջարկվող այլ դասընթացները կներառեն 20-րդ դարի մշակութային հիշողությունը, ներկայիս մեդիա փոխակերպումները և մշակութային պատերազմները, Կովկասի էթնիկ և մշակութային բազմազանությունը, քաղաքացիական հասարակության տեսությունն ու պրակտիկան, Հայկական սփյուռքը սփյուռքի ուսումնասիրությունների համատեքստում, արվեստն ու գրականությունը հետխորհրդային Եվրասիայում, Վրաստանի ժամանակակից պատմությունը։

Ո՞վ կարող է դիմել

Ծրագիրը նախատեսված է ինչպես հայաստանյան, այնպես էլ օտարերկրյա այն ուսանողների համար, որոնք արդեն ունեն ակադեմիական հետաքրքրություն կամ նախնական պատրաստվածություն ռուսական, եվրասիական կամ կովկասյան ուսումնասիրությունների ոլորտներում։ Մասնակիցների մի մասը կարող է ներգրավվել նաև «Էրազմուս+» ծրագրերում և ԵՊՀ-ի ու օտարերկրյա բուհերի միջև գործող երկկողմ համագործակցությանը։

Դասախոսական կազմ

Դասավանդումը կիրականացնեն ԵՊՀ հիմնական պրոֆեսորադասախոսական կազմի ներկայացուցիչները, ինչպես նաև հրավիրյալ դասախոսներ և հետազոտողներ արտերկրից։

Կարիերայի հեռանկարներ

Ծրագրի շրջանավարտները կստանան տեսական գիտելիքներ և գործնական կարողություններ, որոնք կարող են կիրառել՝

• դիվանագիտության ոլորտում,

• միջազգային կազմակերպություններում,

• հետազոտական և կրթական հաստատություններում,

• մեդիայի ոլորտում,

• տարածաշրջանային համագործակցությանն առնչվող մասնավոր և հասարակական կառույցների գործունեության մեջ։

Ծրագիրը միտված է պատրաստելու մասնագետների, որոնք հնարավորություն կունենան մասնագիտական գործունեություն ծավալելու ինչպես Հայաստանում, այնպես էլ եվրասիական միջավայրում։