Միջմշակութային հաղորդակցություն (գերմաներեն)

• Ուսուցման ձև՝ առկա

• Տևողություն՝ 1.5 տարի 

• Վարձավճար՝ 800․000 ՀՀ դրամ

• Ընդունելության քննության ձևաչափ՝ բանավոր

• Որակավորումը՝ բանասիրության մագիստրոս

• Դասերը կազմակերպվում են շաբաթական 4 օր՝ առաջին հերթով:

Ընդունելության պահանջները

Ընդունելության քննություն անցկացվում է բանավոր։ Հարցաշարին և ընդունելության վերաբերյալ այլ մանրամասների հնարավոր է ծանոթանալ «Ընդունելություն» բաժնում։

Ծրագրի նպատակը

«Միջմշակութային հաղորդակցություն (գերմաներեն)» ծրագրի նպատակն է պատրաստել գերմաներենի բարձրակարգ մասնագետներ գերմանական լեզվամշակույթի և լեզվամշակութային հաղորդակցության ոլորտում, ինչպես նաև ուսանողին հնարավորություն տալ արդյունավետ կիրառել գերմաներենի գիտելիքներն ու հմտությունները միջմշակութային հաղորդակցության իրադրություններում: Ծրագրի նպատակներից է նաև զարգացնել ուսանողների քննադատական վերլուծության, ինչպես նաև տեսությունն ու պրակտիկան համադրելու, գնահատելու կարողությունները։ Այս ծրագրի ավարտին ուսանողը կկարողանա ներկայացնել գերմանական լեզվամշակույթի լեզվական և արտալեզվական դրսևորումները, մեկնաբանել միջմշակութային հաղորդակցման տեսության հիմնարար հասկացություններն ու գերմաներենի գործածության հիմնական օրինաչափությունները՝ հաղորդակցության տարբեր իրադրություններում, քննարկել նշված տեսության, ինչպես նաև թարգմանաբանության և հարակից այլ գիտակարգերի հասկացական փոխհարաբերությունները մասնագիտական խնդիրներ լուծելու համար: Բացի այդ՝ ուսանողն կկարողանա արժևորել լեզվական և արտալեզվական տարբեր գործոնների դերը միջմշակութային հաղորդակցության ոլորտում, պարզաբանել միջմշակութային տեքստերի կառուցման օրինաչափությունները և կիրառել դրանք հաղորդակցական իրադրություններում: Մագիստրոսական ծրագրի շրջանակում նախատեսված է մասնագիտական պրակտիկա 3-րդ կիսամյակում միջազգային տարբեր կազմակերպություններում, թանգարաններում և թարգմանչական գրասենյակներում:

Մագիստրատուրան ավարտելուց հետո շրջանավարտը կարող է շարունակել իր հետբուհական կրթությունը թե´ Հայաստանում, թե´ արտերկրում, նույն մասնագիտությամբ կամ հարակից մասնագիտություններով: Բանասիրության մագիստրոսի դիպլոմը մեծ հնարավորություններ է ընձեռում աշխատելու գերմանախոս երկրների դեսպանատներում, գերմանախոս միջազգային կազմակերպություններում, հայրենական պետական և մասնավոր կառույցներում, մշակութային միություններում, հրատարակչություններում: 

Ծրագրի նպատակն է պատրաստել գերմաներենի և միջմշակութային հաղորդակցության բնագավառի մասնագետներ, որոնք կկարողանան աշխատել թե՛ միջազգային կազմակերպություններում որպես թարգմանիչ, տարբեր ոլորտներին առնչվող տեքստեր վերլուծող և մեկնաբան, թե՛ կրթական ոլորտում (հանրակրթական դպրոցներում (ուսուցիչ), բուհերում (դասախոս)): 

Ծրագրում ընդգրկված դասընթացներ

Ծրագիրը բաղկացած է ընդհանուր և մասնագիտական պարտադիր և կամընտրական դասընթացներից, ինչպես նաև հետազոտական կառուցամասից, որը ենթադրում է գիտական քննարկումներ, զեկույցներ, ելույթներ և ծանոթացնում ուսանողներին հետազոտական աշխատանքի մեթոդաբանությանը, նպաստում գիտահետազոտական հմտությունների ձևավորմանն ու զարգացմանը: Ծրագիրն ընդգրկում է հետևյալ դասընթացները.

• Տեղեկատվական տեխնոլոգիաները մասնագիտական ոլորտում

• Հետազոտության պլանավորում և մեթոդներ

• Գերմաներենն ակադեմիական նպատակներով

• Մասնագիտական լեզվի գործառույթները

• Միջմշակութային տեքստերի վերլուծություն

• Մասնագիտական տեքստերի թարգմանության տեսության և պրակտիկայի հիմնահարցեր

• Հոգելեզվաբանություն

• Միջմշակութային հաղորդակցություն

• ԶԼՄ-ների լեզվաբանական վերլուծություն

• Գերմանագիտության քերականական տեսությունները

• Գործառական ոճագիտություն

• Հերմենևտիկա

• Գերմաներենի զարգացման միտումները

• Իրավաբանական և բժշկական տեքստերի թարգմանություն

• Լրատվամիջոցների դիսկուրսի վերլուծություն

• Միջազգային տուրիզմ

• Զբոսաշրջային գերմաներեն

• Գերմանական քաղաքական դիսկուրս

• Գործարար հաղորդակցություն

Կարիերայի հնարավորությունները

Վերոհիշյալ բաժնի շրջանավարտները հնարավորություն կունենան աշխատելու գերմանախոս երկրների դեսպանատներում, Գերմանական ակադեմիական փոխանակման ծառայության գրասենյակում, Գյոթեի անվան ինստիտուտի և կենտրոնների գրասենյակներում,  գերմաներենի ուսուցիչների վերապատրաստման գերմանական գրասենյակներում, միջազգային կազմակերպություններում և ձեռնարկություններում («Siemens Energy Armenia», «Zeppelin Armenia», «DWV», «The Horeka Armenia»), ՀՀ պետական կառույցներում, մշակութային միություններում, հրատարակչություններում, գերմաներեն դասավանդելու կրթական տարբեր հաստատություններում:

Հարցերի դեպքում դիմել կրթական ծրագրի ղեկավար Գայանե Սավոյանին (էլհասցե՝ gayanesavoyan@ysu.am):