ԵՊՀ արևելագիտության ֆակուլտետում ս․թ․ փետրվարի 23-ին հյուրընկալվեց լիբանանցի հայտնի արդյունաբերող, հասարակական գործիչ և հեղինակ Նիկոլաս Աբու Ֆայսալը, որը ֆակուլտետի դեկան, պրոֆեսոր Ռուբեն Մելքոնյանի, ՀՀ-ում Լիբանանի արտակարգ և լիազոր դեսպան Մայա Դաղերի և ԵՊՀ արաբագիտության ամբիոնի վարիչ Հայկ Քոչարյանի հետ քննարկեց երկկողմ համագործակցությանն առնչվող հարցեր:
Կայացած հանդիպման ընթացքում անդրադարձ կատարվեց Աբու Ֆայսալի բազմակողմանի գործունեությանը, որը ներառում է ինչպես գործարար ոլորտը, այնպես էլ ինտելեկտուալ և մշակութային ներդրումները: Որպես «Gardenia Grain d'Or» խմբի հիմնադիր և «Բեկաայի արդյունաբերողների ասոցիացիայի» նախագահ՝ նա մեծապես կարևորում է արդյունաբերության դերը ազգային ինքնության ամրապնդման գործում: Հատկանշական է, որ նա հիմնադրել է նաև «Gardenia Lebanese Farms»-ը Հայաստանում՝ դրանով իսկ ամրապնդելով հայ-լիբանանյան տնտեսական կապերը:
Հանդիպման առանցքային թեմաներից էր հեղինակի նոր՝ «Հայաստան...մահ և վերածնված կյանք» գիրքը, որը պատմության, անձնական փորձառության և ապագայի տեսլականի յուրօրինակ պատմվածք է: Պայմանավորվածություն ձեռք բերվեց առաջիկայում կազմակերպելու գրքի պաշտոնական շնորհանդեսը և քննարկումը մասնագիտական շրջանակներում, ինչը հնարավորություն կտա արևելագետներին ու ուսանողներին մոտիկից ծանոթանալու հեղինակի գաղափարներին և Հայաստանի մասին նրա ինքնատիպ ընկալումներին:
Այս հանդիպումը ևս մեկ քայլ էր ֆակուլտետի արտաքին կապերի ընդլայնման և արդիական թեմաների շուրջ միջմշակութային երկխոսություն ծավալելու ճանապարհին:
