ԵՊՀ արևելագիտության ֆակուլտետի իրանագիտության ամբիոնի դոցենտ, բ.գ.թ. Նունիկ Դարբինյանը մասնակցել է Մեծ Բրիտանիայի Քեմբրիջի համալսարանի Միջին Արևելքի ուսումնասիրությունների ֆակուլտետի կազմակերպած «E.G. Browne and the Making of Iranian Studies» գրականագիտական գիտաժողովին՝ նվիրված մեծանուն արևելագետ Էդուարդ Բրաունի ժառանգությանը։
Գիտաժողովի շրջանակում դոցենտ Ն. Դարբինյանը ներկայացրել է «Հայերը Էդուարդ Բրաունի ստեղծագործություններում» թեմայով ծավալուն և գիտականորեն հիմնավորված զեկուցում, որն արժանացել է միջազգային գիտական հանրության բարձր գնահատանքին։ Զեկուցման հաջողությունը նոր հեռանկարներ է բացել հետազոտողի համար, քանի որ Ն. Դարբինյանը հասանելիություն է ստացել Քեմբրիջում պահվող Էդուարդ Բրաունի անձնական արխիվներին, որոնց ուսումնասիրությունը նախատեսվում է առաջիկա ուսումնական տարվա ընթացքում։
Այցի շրջանակում Ն. Դարբինյանը մի շարք արդյունավետ հանդիպումներ է ունեցել Միջին Արևելքի ուսումնասիրությունների ֆակուլտետի դեկան, պրոֆեսոր Ամիրա Բեննիսոնի, պրոֆեսոր Քրիստիան վան Ռույեմբեքեի և «SOAS» համալսարանի իրանագիտության բաժնի վարիչ Նարգես Ֆարզադի հետ։ Քննարկումների արդյունքում ձեռք են բերվել նախնական պայմանավորվածություններ ԵՊՀ արևելագիտության ֆակուլտետի իրանագիտության ամբիոնի և վերոնշյալ կրթական հաստատությունների միջև ուսանողների փոխանակման ծրագրերի իրականացման վերաբերյալ։
Այցը կարևոր քայլ է ԵՊՀ իրանագիտության ամբիոնի միջազգային կապերի ընդլայնման, ինչպես նաև հայ-իրանագիտական կապերի ամրապնդման գործում։
