ԵՊՀ պատմության ֆակուլտետի «Կովկասագիտություն» բակալավրի կրթական ծրագիրը շարունակաբար զարգանում է՝ արձագանքելով ժամանակի պահանջներին և կրթական արդի միտումներին։ Վերջին տարիներին կատարված փոփոխությունները միտված են բարձրացնելու ծրագրի արդյունավետությունը, կիրառելիությունն ու ուսանողների մրցունակությունը աշխատաշուկայում։
Վերջին տարիներին ծրագրի նկատմամբ հետաքրքրությունը զգալիորեն աճել է, ինչի վկայությունն է դիմորդների թվի կայուն աճը։ Սա պայմանավորված է թե՛ ծրագրի արդիականացված բովանդակությամբ, թե՛ շրջանավարտների համար բացվող մասնագիտական հնարավորություններով։
«Կովկասագիտություն» կրթական ծրագիրը նպատակ ունի պատրաստելու տարածաշրջանի պատմության, մշակույթի և քաղաքական գործընթացների խոր գիտելիքներ ունեցող մասնագետներ՝ համադրելով տեսական գիտելիքն ու կիրառական հմտությունները։
Ծրագրի կարևոր առանձնահատկություններից է լեզվական պատրաստվածությունը, որը կովկասագիտական կրթության հիմնասյուներից է։ Կրթական ծրագրի ղեկավար, պ․գ․թ․, դոցենտ Հայկ Մխոյանի խոսքով՝ ծրագրում մեծ ուշադրություն է դարձվում տարածաշրջանի լեզուների ուսումնասիրմանը. «Ուսանողները հաճախ գերադասում են ադրբեջաներենը՝ հաշվի առնելով աշխարհաքաղաքական իրողությունները։ Սակայն մենք կարևորում ենք նաև վրացերենի իմացությունը, քանի որ կովկասագիտական գրականության մի զգալի մասը վրացերենով է»։
Ծրագրի շրջանակում ուսանողները հնարավորություն ունեն ուսումնասիրելու ադրբեջաներեն և վրացերեն՝ ստանալով նաև մասնագիտական թարգմանության հմտություններ։ Այս համադրված լեզվական պատրաստվածությունը էապես բարձրացնում է շրջանավարտների մրցունակությունը և ընդլայնում նրանց մասնագիտական հնարավորությունները։
Հայաստանում և աշխարհում չկա մեկ այլ կրթական ծրագիր, որտեղ նշված երկու լեզուները միաժամանակ խորապես ուսումնասիրվում են։ Հաշվի առնելով նաև այն, որ ուսանողները տիրապետում են հայերենին, ծրագրի շրջանավարտները ձևավորվում են որպես տարածաշրջանը միաժամանակ երեք լեզուներով ուսումնասիրելու կարողություն ունեցող մասնագետներ։
Ըստ Հայկ Մխոյանի՝ կրթական ծրագրում կարևոր տեղ են զբաղեցնում նաև պատմագիտական և ազգագրական դասընթացները, որոնք ներկայացվում են հստակ կառուցվածքով և բովանդակային ուղղվածությամբ։ Ուսանողներն ուսումնասիրում են Կովկասի ժողովուրդների պատմությունը, մշակույթը և հասարակական զարգացումները՝ ձևավորելով համապարփակ պատկերացում տարածաշրջանի մասին։
«Առանձնահատուկ ուշադրություն է դարձվում նաև տարածաշրջանային գործընթացների ուսումնասիրմանը։ Դասընթացները համադրում են ինչպես պատմական զարգացումների, այնպես էլ ժամանակակից քաղաքական գործընթացների վերլուծությունը՝ հնարավորություն տալով ուսանողներին ընկալելու Կովկասը որպես փոխկապակցված և բազմաշերտ տարածք»,- ընդգծում է կրթական ծրագրի ղեկավարը։
Ծրագրի կարևոր բաղադրիչներից է գործնական փորձը։ Ուսանողները հնարավորություն ունեն ներգրավվելու ուսումնական պրակտիկայի մեջ՝ աշխատելով Մատենադարանում, արխիվներում և գրադարաններում, ինչպես նաև պետական կառույցներում։ Սա նպաստում է նրանց հետազոտական հմտությունների զարգացմանը և գիտական աշխատանքի հիմքերի ձևավորմանը։ «Կովկասագիտություն» կրթական ծրագիրը համադրում է լեզվական, պատմագիտական և հետազոտական պատրաստվածությունը՝ ձևավորելով մասնագետներ, որոնք կարող են հաջողությամբ գործունեություն ծավալել ինչպես գիտական, այնպես էլ կիրառական ոլորտներում։
Նշենք, որ «Կովկասագիտություն» բակալավրի կրթական ծրագրում ընդունելությունը կատարվում է «Հայոց պատմություն» (գրավոր), «Հայոց լեզու և գրականություն» (գրավոր) կամ «Օտար լեզու» (գրավոր) առարկաների քննությունների արդյունքների հիման վրա: Փաստաթղթերն ընդունվում են ս.թ. ապրիլի 15-ից մինչև մայիսի 10-ը ներառյալ (մայիսի 10-ին՝ մինչև ժամը 18:00-ն)։
