Մեդիաուսումնասիրությունների ու նշանագիտության ամբիոն

Մեդիաուսումնասիրությունների ու նշանագիտության ամբիոնն ունի իր գործունեության հետագիծը։ 1999 թ. մայիսին այն կոչվել է Ռադիոհեռուստատեսային ժուռնալիստիկայի, իսկ 2017-ից՝ Տպագիր և հեռարձակվող լրատվամիջոցների ամբիոն: 2025 թ. սեպտեմբերից ԵՊՀ հոգաբարձուների խորհրդի որոշմամբ այն վերանվանվել է Մեդիաուսումնասիրությունների ու նշանագիտության ամբիոն։ 

Ամբիոնը կրթական և գիտահետազոտական գործունեության բոլորովին նոր չափանիշներով գործող հարթակ է՝ կոչված պատասխանելու ժամանակակից մեդիաոլորտի և նշանագիտության դինամիկ զարգացման մարտահրավերներին:

Ամբիոնի դասախոսները տիրապետում են մեդիաուսումնասիրությունների ժամանակակից մեթոդներին (նշանագիտական տեսություններ, խոսույթի տեսություն, վիզուալ նշանագիտության տեսություններ և այլն)։

Մեդիաուսումնասիրությունների ու նշանագիտության ամբիոնի նպատակն է ապահովել մեդիաուսումնասիրության մասնագիտացման կրթական գործընթացը, պատրաստել նորագույն մեթոդներին տիրապետող հետազոտողներ, որոնք ի վիճակի կլինեն գեներացնելու/ստեղծելու մեդիաուսումնասիրության և նշանագիտության մեթոդներով մրցունակ, միջազգային մակարդակի ու որակի հետազոտություններ։

Ամբիոնը սերտ կապի մեջ է համաշխարհային նշանագիտական կենտրոնների, ֆակուլտետների և մասնավորապես Նշանագիտական հետազոտությունների համաշխարհային ասոցիացիայի (IASS-AIS), ինչպես նաև Ասիայի նշանագիտական միջազգային ասոցիացիայի (ASIA) հետ։ Պարբերաբար հանդիպումներ են կազմակերպվում մեդիայի և նշանագիտության ոլորտում հայտնի առաջատար գիտնականների հետ։

Ամբիոնն աշխատում է միջգիտակարգային մագիստրոսական ծրագիր մշակելու, ինչպես նաև օտարերկրյա գործընկերների հետ համատեղ կրթական ծրագիր (Double Diploma/Dual Degree) կյանքի կոչելու ուղղությամբ: