Երևանում և հարակից մարզերում (Արարատ, Արմավիր և Արագածոտն) 12-17 տարեկան դպրոցականների շրջանում անցկացվել է առցանց հարցում, որի շրջանակում մշակվել և փորձարկվել է Հայաստանում երեխաների նկատմամբ սեռական բռնության հետազոտության մեթոդաբանությունը, թարգմանվել և փորձարկվել են հիմնախնդրի ուսումնասիրությանը նվիրված միջազգային գործիքները, մշակվել է զգայուն թեմաներով երեխաների առցանց հարցումների էթիկական սկզբունքների պահպանման ընթացակարգը, ինչպես նաև կատարվել թիրախային առաջարկություններ։
Հարցումը անցկացրել են ԵՊՀ սոցիալական աշխատանքի և սոցիալական տեխնոլոգիաների ամբիոնը (ի դեմս ամբիոնի վարիչ, ս.գ.թ., դոցենտ Յուլիանա Մելքումյանի, ս.գ.թ., դոցենտ Միրա Անտոնյանի և դասախոս Տաթևիկ Կարապետյանի) և «Աստրա» առողջության ամրապնդման և բռնությունից պաշտպանության հիմնադրամը (ի դեմս ս.գ.թ. Վերոնիկա Օդինոկովայի) ՀՀ կրթության, գիտության, մշակույթի և սպորտի նախարարության և «Հանրապետական մանկավարժահոգեբանական կենտրոն» ՊՈԱԿ-ի հետ համատեղ։
ԵՊՀ հետազոտական աշխատանքների էթիկայի փորձաքննության հանձնախումբը մանրամասն ուսումնասիրել է հետազոտության մեթոդաբանությունն ու գործիքակազմը և անհրաժեշտ փոփոխություններից հետո հաստատել այն։
Ս․թ․ նոյեմբերի 24-ին Երևանում տեղի ունեցավ հետազոտության մեթոդաբանության և արդյունքների քննարկմանը նվիրված աշխատաժողով, որին մասնակցեցին ՀՀ աշխատանքի և սոցիալական հարցերի նախարարության, ՀՀ կրթության, գիտության, մշակույթի և սպորտի նախարարության, ՀՀ առողջապահության նախարարության, ՀՀ արդարադատության նախարարության, ՀՀ ներքին գործերի նախարարության, ինչպես նաև մի շարք տեղական և միջազգային շահագրգիռ կառույցների ներկայացուցիչներ։
Այս ձևավորող հետազոտությունը Հայաստանի դպրոցներում անցկացված նմանօրինակ առաջին առցանց հարցման փորձն է։ Աշխատաժողովի ընթացքում մասնակիցները հնարավորություն ունեցան ծանոթանալու հետազոտության շրջանակում կիրառված մեթոդաբանությանը և գործիքակազմին, ՀՀ-ի իրականությանը դրանց հարմարեցման առանձնահատկություններին, ինչպես նաև երեխաների շրջանում կատարված առցանց հարցման արդյունքներին՝ ներառյալ անցանց և առցանց սեռական բռնության տարածվածությունը, տղաների և աղջիկների պաշտպանվածությունը համայնքում, ընտանիքում, դպրոցում և համացանցում:
Աշխատաժողովի մասնակիցները ստացան հաշվետվության տպագիր տարբերակը, որտեղ կան անհրաժեշտ հղումներ և QR կոդեր (հարցման գործիքակազմի), ինչը հնարավորություն կտա շահագրգիռ կազմակերպություններին հետագայում ևս կիրառելու մշակված գործիքակազմը։
Նշենք, որ հետազոտությունը ֆինանսավորել է «Սեռական բռնության հետազոտական նախաձեռնություն»-ը (Sexual Violence Research Initiative - SVRI)։ Հետազոտության արդյունքների մեկնաբանման համար պատասխանատվությունն ամբողջությամբ կրում են հեղինակները, և այն պարտադիր չէ, որ արտացոլի «SVRI»-ի պաշտոնական դիրքորոշումները։
