Մարդկային ռեսուրսների կառավարում

Ընդունելության պահանջները

ԵՊՀ մագիստրատուրայի 2024/2025 ուսումնական տարվա առկա ուսուցման ձևով ընդունելությանը հնարավորություն ունեն դիմելու ՀՀ պետական և ըստ մասնագիտությունների հավատարմագրված/ինստիտուցիոնալ հավատարմագրում անցած ոչ պետական այլ բուհերի՝ բակալավրի, մագիստրոսի կամ դիպլոմավորված մասնագետի որակավորում ունեցող շրջանավարտները:

ԵՊՀ մագիստրատուրայի 2024/2025 ուսումնական տարվա առկա  ուսուցման ձևով ընդունելությունը կատարվելու է՝ համաձայն «ԵՊՀ մագիստրատուրայի (առկա և հեռակա ուսուցման ձևերով) ընդունելության կարգ»-ի պահանջների:

Ծրագրի նպատակը

«Մարդկային ռեսուրսների կառավարում» մագիստրոսական կրթական ծրագիրը նպատակ ունի պատրաստելու ժամանակակից, մրցունակ և ռազմավարական մտածողությամբ ՄՌԿ մասնագետներ՝ նրանց տրամադրելով մարդկային
ռեսուրսների կառավարման ոլորտի հիմնարար և կիրառական գիտելիքներ,ինչպես նաև գործնական մասնագիտական հմտություններ։ 

Ծրագիրը հնարավորություն է տալիս ձեռք բերելու գիտելիքներ ռազմավարական ՄՌԿ-ի, ինչպես նաև ՄՌԿ ժամանակակից գործառույթների՝ հավաքագրման, ուսուցման և զարգացման, կատարողականի կառավարման, վարձատրությունների համակարգերի, կազմակերպական վարքի և կազմակերպական մշակույթի կառավարման ոլորտներում։ Միաժամանակ, ծրագիրը զարգացնում է վերլուծական, հետազոտական, հաղորդակցական և կառավարչական կարողություններ՝ համադրելով տեսական պատրաստվածությունն ու գործնական ուսուցումը։

Ծրագրի շրջանակում ուսանողները ծանոթանում են նաև ՀՀ աշխատանքային օրենսդրությանը, տվյալահենք և ժամանակակից ՄՌԿ մոտեցումներին, ինչպես նաև սովորում են կիրառել տեղեկատվական և հաղորդակցական տեխնոլոգիաները մասնագիտական գործունեության մեջ։

Կարիերայի հնարավորությունները

Ծրագրի շրջանավարտների համար առկա են մասնագիտական լայն հնարավորություններ պետական, մասնավոր և միջազգային ոլորտներում։ Նրանք կարող են աշխատել՝

• պետական կառավարման և տեղական ինքնակառավարման մարմիններում,
• նախարարություններում, կոմիտեներում և պետական այլ կառույցներում,
• բանկերում և ֆինանսական կազմակերպություններում,
• ՄՌԿ և կազմակերպական զարգացման խորհրդատվական կազմակերպություններում,
• ՏՏ և ստարտափ ընկերություններում,
• հեռահաղորդակցության, արտադրության, մարքեթինգի, սպասարկման և հյուրընկալության ոլորտների կազմակերպություններում,
• տեղական և միջազգային հասարակական կազմակերպություններում և հիմնադրամներում,
• կրթական, առողջապահական և մշակութային հաստատություններում,
• ուսումնական և վերապատրաստման կենտրոններում։

Շրջանավարտները կարող են զբաղեցնել HR մասնագետի, «HR Business Partner»-ի, հավաքագրման, ուսուցման և զարգացման, կատարողականի կառավարման, կազմակերպական զարգացման և HR վերլուծության ոլորտների մասնագիտական և կառավարչական պաշտոններ։