ԵՊՀ միջազգային հարաբերությունների ֆակուլտետում տեղի ունեցավ առաջինկուրսեցիների դիմավորման հանդիսավոր արարողությունը: Ուսանողներին ողջունեց և շնորհավորական խոսքով հանդես եկավ ֆակուլտետի դեկան, պ.գ.թ., դոցենտ Տիգրան Եփրեմյանը:
«Սիրելի՛ առաջինկուրսեցիներ, ուրախ եմ ողջունելու ձեզ մեր 106-ամյա բուհում՝ Երևանի պետական համալսարանում: Ձեր կյանքի կարևոր շրջափուլն այսօր սկիզբ է առնում Հայաստանի Հանրապետության ամենահեղինակավոր բուհում: Միջազգային հարաբերությունների ֆակուլտետը մուտք է գործել բարեփոխումների, զարգացման և կատարելագործման նոր փուլ, ուստի՝ լավագույնը դեռ առջևում է: Շնորհավորում եմ ԵՊՀ միջազգային հարաբերությունների ֆակուլտետի ուսանող դառնալու և գիտելիքի, փորձի ու ինքնահաստատման սկիզբն ազդարարելու կապակցությամբ:
Սիրելի՛ ուսանողներ, դուք դառնալու եք այն մասնագետները, որոնք կարող են հասկանալ ու վերլուծել ժամանակակից աշխարհի բարդ ու փոփոխական գործընթացները: Ձեր գիտելիքներով ու հմտություններով նպաստելու եք մեր երկրի զարգացմանը։
Հիշե՛ք՝ այս տարիները ոչ միայն սովորելու, այլև ինքնակազմակերպվելու, ընկերներ ձեռք բերելու, ապագայի ձեր ուղին ձևավորելու, ինքնակարգավորվելու հնարավորություն են։ Մաղթում եմ ձեզ եռանդ, հաստատակամություն և անսպառ հետաքրքրասիրություն։ Համալսարանում ձեր առաջին քայլերը մասնագիտական հաջողությունների ու անձնական աճի ամուր հիմք թող դառնան: Բարի գալուստ Միջազգային հարաբերությունների ֆակուլտետ»,- իր խոսքը եզրափակեց ֆակուլտետի դեկանը:
Առաջինկուրսեցիներին ողջունեց նաև ֆակուլտետի գրասենյակի ղեկավար, դեկանի տեղակալ, ք.գ.թ. Գոռ Պետրոսյանը. «Սիրելի՛ ուսանողներ, շնորհավորում եմ ձեզ ԵՊՀ ուսանող դառնալու կապակցությամբ։ Դուք մտնում եք կյանքի նոր փուլ, որտեղ ձեր առջև բացվելու են նոր հեռանկարներ։ Համալսարանն ավարտելուց հետո, դուք պետք է դառնաք լուսավորության ջահակիրները մեր հասարակությունում, իսկ ձեր ստացած գիտելիքները լավագույնս ծառայեցնեք այն գերատեսչություններում և կազմակերպություններում, որտեղ անցնելու եք մասնագիտական աշխատանքի կամ ծառայության։ Այսօրվանից պետք է գիտակցեք այն մեծ պատասխանատվությունը, որ կրում եք ձեր հասարակության, ձեր պետության առջև, և ջանք չխնայեք ձեր ուսումնառության ընթացքում»։
Միջազգային հարաբերությունների և դիվանագիտության ամբիոնի վարիչ, պ.գ.թ., դոցենտ Ժակ Մանուկյանն ու Դիվանագիտական ծառայության և մասնագիտական հաղորդակցման ամբիոնի վարիչ, բ.գ.թ., դոցենտ Սյուզաննա Նավասարդյանը խոսեցին ուսումնական գործընթացին վերաբերող բոլոր մանրամասների, մասնագիտացման հնարավորությունների, լեզուների ընտրության, առաջարկվող կրթական ծրագրերի մասին:
Առաջինկուրսեցիներին շնորհավորեցին նաև կրթական ծրագրի ղեկավարներն ու նրանց ուղեկցեցին իրենց լսարաններ:
