ԵՊՀ միջազգային հարաբերությունների ֆակուլտետում Ֆրանկոֆոնիայի միջազգային օրվա և Հայաստանում Ֆրանկոֆոնիայի երկամսյակի մեկնարկի կապակցությամբ տեղի ունեցավ «Ուժի իրավունքը միջազգային իրավունքում» թեմայով էսսեների մրցույթի մրցանակաբաշխության հանդիսավոր արարողությունը։ Միջոցառումը նպատակ ուներ խթանելու ուսանողների հետաքրքրությունը միջազգային իրավունքի արդիական խնդիրների նկատմամբ, ինչպես նաև զարգացնելու ֆրանսերենով մասնագիտական գրավոր խոսքը։
Մրցույթի հաղթողներին հավաստագրեր հանձնեց ֆակուլտետի դեկան, պ.գ.թ., դոցենտ Տիգրան Եփրեմյանը։ Շնորհավորելով մրցանակակիրներին՝ նա իր խոսքում կարևորեց ֆրանսերենի դերը ապագա դիվանագետների մասնագիտական գործունեության մեջ՝ ընդգծելով, որ ֆրանսերենը շարունակում է մնալ միջազգային հարաբերությունների և դիվանագիտության կարևոր լեզուներից մեկը։ Դեկանը, կարևորելով ուսանողների ակտիվ ներգրավվածությունն ու մասնագիտական աճը, իր պատրաստակամությունը հայտնեց աջակցելու նմանատիպ գիտակրթական նախաձեռնությունների շարունակական կազմակերպմանը:
Մրցույթի կազմակերպիչ և ժյուրիի նախագահ, Դիվանագիտական ծառայության և մասնագիտական հաղորդակցման ամբիոնի դոցենտ Վարդուհի Պետրոսյանն իր խոսքում նշեց, որ ներկայացված աշխատանքները աչքի են ընկել թեմայի խորքային վերլուծությամբ, արդիականությամբ և գիտական հիմնավորվածությամբ։ Նա նաև տեղեկացրեց, որ նախորդ տարվա մրցույթի հաղթող Նարե Հարությունյանի էսսեն հրատարակվել է Բելգիայում լույս տեսնող «Nouvelles de Flandre» ամսագրում, ինչը վկայում է մրցույթի բարձր մակարդակի և միջազգային ճանաչման մասին։
«SPFA» ֆրանսիական կազմակերպության կամավոր Էլվիր Պասկալն իր ելույթում բարձր գնահատեց մասնակիցների աշխատանքները՝ նշելով, որ բոլոր էսսեները բարձրարժեք էին և շարադրված էին գրագետ ֆրանսերենով։ Նա ընդգծեց, որ նման նախաձեռնությունները կարևոր հարթակ են ուսանողների լեզվական և վերլուծական կարողությունների զարգացման համար։ Նշենք, որ Էլվիր Պասկալը միաժամանակ իրավագիտություն է ուսումնասիրում Գերմանիայի և Ֆրանսիայի համալսարաններում և խորհրդակցական ձայնի իրավունքով ընդգրկված էր մրցույթի ժյուրիի կազմում:
Ավանդական դարձած էսսեների մրցույթը կազմակերպվել էր «SPFA» ֆրանսիական բարեգործական կազմակերպության հետ համատեղ և հովանավորվել «Association pour la promotion de la Francophonie en Flandre» և «Richelieu International Europe» կազմակերպությունների կողմից։ Միջոցառման կազմակերպիչներն իրենց խորին երախտագիտությունն են հայտնում գործընկեր կազմակերպություններին՝ շարունակական համագործակցության և Ֆրանկոֆոնիայի արժեքների տարածման գործում ունեցած նշանակալի ներդրման համար։
Միջոցառումն անցկացվեց բարձր մակարդակով՝ ընդգծելով ֆրանկոֆոն մշակույթի, լեզվի և արժեքների կարևորությունը ակադեմիական միջավայրում և նպաստելով ապագա մասնագետների միջազգային մտածողության ձևավորմանը:
