ԵՊՀ միջազգային հարաբերությունների ֆակուլտետում անցկացվեց չինական Նոր տարվան նվիրված բաց դաս, որը նպատակ ուներ խորացնելու ուսանողների գիտելիքները չինական մշակույթի և ավանդույթների վերաբերյալ, ինչպես նաև խթանելու նրանց հետաքրքրվածությունը չինարենի ուսումնասիրման նկատմամբ։
Միջոցառմանը մասնակցում էին Կոնֆուցիոսի ինստիտուտի տնօրեններ Լի Վնփինը և Գոռ Սարգսյանը, ինչպես նաև ֆակուլտետի դասախոսական կազմի ներկայացուցիչներ և ուսանողներ։
Բաց դասի շրջանակում ֆակուլտետի ուսանողները չինարենով ներկայացրին չինական Նոր տարվա ավանդույթներն ու սովորույթները՝ անդրադառնալով տոնի պատմական արմատներին, խորհրդանշական իմաստին և տոնակատարության առանձնահատկություններին։ Ներկայացումները ուղեկցվեցին մշակութային բովանդակությամբ հարուստ ելույթներով, որոնց ընթացքում ցուցադրվեցին չինական ժողովրդական և ժամանակակից երաժշտական համարներ, ինչպես նաև ներկայացվեցին չինարենով բանաստեղծություններ։
Միջոցառման ընթացքում ստեղծված կրթական միջավայրը հնարավորություն տվեց ներկաներին առավել խորությամբ ընկալելու չինական մշակույթի բազմազանությունն ու ինքնատիպությունը։
Բաց դասի ընթացքում ելույթ ունեցավ Դիվանագիտական ծառայության և մասնագիտական հաղորդակցման ամբիոնի վարիչ, Չինարենի և չինական մշակույթի կենտրոնի տնօրեն, դոցենտ Սյուզաննա Նավասարդյանը։ Վերջինս իր խոսքում ընդգծեց, որ նմանատիպ միջոցառումները կարևոր նշանակություն ունեն կրթական գործընթացում, քանի որ դրանք ոչ միայն նպաստում են լեզվական հմտությունների զարգացմանը, այլև ապահովում են մշակութային գիտելիքների խորացում և միջմշակութային հաղորդակցության ընդլայնում։
Նա նաև նշեց, որ չինարենի և չինական մշակույթի նկատմամբ աճող հետաքրքրությունը պայմանավորված է ինչպես ժամանակակից միջազգային հարաբերությունների զարգացման միտումներով, այնպես էլ կրթական համագործակցության ընդլայնմամբ։
Միջոցառումն ամփոփվեց ակտիվ քննարկումներով, որոնց ընթացքում ուսանողները հնարավորություն ունեցան ներկայացնելու իրենց դիտարկումները և ստանալու հետաքրքրող հարցերի պատասխանները։
Այս նախաձեռնությունը ևս մեկ անգամ վկայում է, որ Միջազգային հարաբերությունների ֆակուլտետը շարունակաբար խթանում է միջազգային կրթական և մշակութային համագործակցությունը՝ ստեղծելով հարթակներ, որոնք նպաստում են տարբեր մշակույթների միջև երկխոսությանը և փոխըմբռնման խորացմանը:
