ԵՊՀ իրավագիտության ֆակուլտետի 2026-2027 ուստարվա առաջինկուրսեցիների դիմավորման և իրազեկման հանդիսավոր արարողությունն անցկացվեց ԵՊՀ Պալեանների անվան դահլիճում, որի ընթացքում ֆակուլտետի պատասխանատուները ներկայացրին ուսումնական ստորաբաժանումների կառուցվածքի, կրթության կազմակերպման հիմնական առանձնահատկությունների և ուսումնառությանն անհրաժեշտ այլ հարցերի վերաբերյալ տեղեկություններ:
Ֆակուլտետի դեկան Հարություն Խաչիկյանը, ողջունելով և շնորհավորելով ուսանողներին, ընդգծեց նրանց ընտրած մասնագիտության դերն ու կարևորությունը:
«Իրավագիտությունն է կարգավորում հանրային կյանքի բոլոր ոլորտներն ու հարաբերությունները. այսպես են ընդհանրական իրենց աշխատանքը բնորոշում իրավաբանները: Այո՛, և սա է իրականությունը: ԵՊՀ իրավագիտության ֆակուլտետը պատրաստ է և ընդունակ մատուցելու այն ամենն, ինչ անհրաժեշտ է բարձր որակավորում ունեցող իրավաբան դառնալու համար: Դա բացարձակ ճշմարտություն է՝ ապացուցված ժամանակի ընթացքում: Հանրային կյանքի բոլոր ոլորտներում, որտեղ ընդգրկված են իրավաբաններ, գերակշռում են մեր շրջանավարտները, որոնք պատվով են կատարում իրենց վստահված ոլորտի գործառույթները»,- նշեց դեկանը՝ հավելելով, որ ԵՊՀ իրավագիտության ֆակուլտետը միջազգային որակավորման վարկանիշով առաջատար, առավել երկար պատմական ուղի անցած, հեղինակավոր և ճանաչված բուհի իրավաբանական կրթություն կազմակերպող կառուցվածքային ստորաբաժանում է, որի ուսանող դառնալը հնարավորություն է նոր բացահայտումների:
«Դուք դարձել եք բուհի ուսանող, որտեղ կրթական ծրագրերը շարունակաբար համապատասխանեցվում են ժամանակակից աշխարհի առաջնահերթություններին,- դիմելով ուսանողներին՝ ընդգծեց դեկանը և հավելեց,- իրավաբանական կրթությունն օգնելու է ձեզ բացահայտելու ոչ միայն ձեզ շրջապատող աշխարհը, այլև ձեր կարողությունները, ընդունակություններն ու հմտությունները»:
Նրա խոսքով՝ ֆակուլտետում կազմակերպվող իրավաբանական կրթությունը հնարավորություն է յուրաքանչյուր շրջանավարտի համար՝ հաջողության հասնելու հանրային կյանքի ցանկացած ոլորտում՝ իրավապահ և դատական համակարգ, օրենսդիր և գործադիր իշխանություն, փաստաբանական ու խորհրդատվական ընկերություններ, բանկային համակարգ, մասնավոր ձեռնարկատիրական գործունեություն, գիտահետազոտական կենտրոններ, միջազգային կառույցներ ու հասարակական կազմակերպություններ և այլն:
Իրավաբանական կրթություն, գիտություն, պրակտիկա, արդյունավետ, կառուցողական և շարունակական համագործակցություն, մշակույթի զարգացում, տեսության և պրակտիկայի կապի ամրապնդում, տեսական գիտելիքներով և գործնական հմտություններով իրավաբան կադրերի պատրաստում, տեսական գիտելիքների գործնականում կիրառման կարողությունների զարգացում. սրանք են իրավաբանական բարձրագույն կրթություն կազմակերպող բուհի առաջնահերթ սկզբունքները:
Դեկանի տեղակալ Աշոտ Պետրոսյանը ներկայացրեց ֆակուլտետի ուսումնական ստորաբաժանումները, ուսումնական գործընթացի կազմակերպման հիմնական սկզբունքները, ամբիոնների աշխատանքների առանձնահատկությունները, ընձեռվող հնարավորություններն ու հեռանկարները:
