Երևանի պետական համալսարանի հայ բանասիրության ֆակուլտետում ս.թ. մայիսի 12-ին տեղի ունեցավ ֆակուլտետի ՈՒԳԸ գիտաժողովը՝ նվիրված Բանասերի օրվան։ Գիտաժողովը հերթական անգամ փաստեց մայր բուհի հիմնադիր ֆակուլտետի գիտակրթական ամուր ավանդույթների շարունակականությունը և բանասիրական մտքի զարգացման նկատմամբ երիտասարդ հետազոտողների հետաքրքրվածությունը։
Գիտաժողովին մասնակցում էին ոչ միայն Հայ բանասիրության ֆակուլտետի ուսանողներ, այլև հարակից ֆակուլտետների ներկայացուցիչներ, մասնավորապես՝ ռադիոֆիզիկայի ոլորտից, ինչը ևս մեկ անգամ ընդգծեց միջֆակուլտետային համագործակցության կարևորությունը և գիտական տարբեր ուղղությունների համադրման արդյունավետությունը։
Ներկայացված զեկուցումները վերաբերում էին բազմաբնույթ թեմաների։ Ուսանողները նոր դիտանկյուններից անդրադարձան Ավետիք Իսահակյանի, Շիրվանզադեի ստեղծագործություններին, «Սասնա ծռեր» էպոսին, ինչպես նաև Իբսենի և Սարտրի գրական ու փիլիսոփայական ժառանգությանը։
Գիտաժողովի ընթացքում առանձնակի ուշադրության արժանացան նաև Խաչատուր Աբովյանի գրաբարագիր ուղեգրությունների լեզվական առանձնահատկությունները, հայոց ազգանունների ծագումնաբանությունը, հագուստի իմաստային դաշտին առնչվող բառապաշարը և համացանցային տիրույթում գրադարձության խնդիրները։
Գիտաժողովն անցկացվեց կազմակերպչական բարձր մակարդակով և աչքի ընկավ զեկուցումների գիտական պատշաճ ներկայացմամբ, թեմատիկ բազմազանությամբ ու քննարկված հարցերի արդիականությամբ։
