ԵՊՀ-ն և QS-ը՝ համագործակցության նոր փուլում. քննարկվել են համալսարանի միջազգային տեսանելիության բարձրացման ուղիները

QS-ի հետ համագործակցության նոր ծրագիրը

ՀՀ ԿԳՄՍ նախարարությունը, բարձրագույն կրթության և գիտության կոմիտեն և «Ակադեմիական քաղաք» հիմնադրամը համաշխարհային համալսարանական վարկանիշավորման առաջատար կազմակերպություններից մեկի՝ «QS Quacquarelli Symonds»-ի հետ սկսում են համագործակցություն, որի շրջանակում առանձնացվել են երեք բուհեր՝ Երևանի պետական, Երևանի պետական բժշկական և Հայաստանի ազգային պոլիտեխնիկական համալսարանները։

Համագործակցության մեկնարկը տրվել է սեպտեմբերի 15-ին Երևանում կայացած միջոցառմամբ, որի ընթացքում ներկայացվել են Հայաստանի բարձրագույն կրթության ոլորտի և համալսարանների միջազգային դիրքերի ամրապնդմանն ուղղված առաջիկա քայլերը։ Ծրագրով նախատեսվում է մի քանի տարվա աշխատանք՝ ուղղված բուհերի ներքին գործընթացների զարգացմանը, միջազգային տեսանելիության բարձրացմանը և վարկանիշավորման ցուցանիշների բարելավմանը։

Այս գործընթացի շրջանակում QS-ի փորձագետները այցելել են Երևանի պետական համալսարան, որտեղ համալսարանի տարբեր ստորաբաժանումների ներկայացուցիչների հետ քննարկել են ԵՊՀ զարգացման առաջնահերթությունները, գիտահետազոտական գործունեության արդյունքների միջազգային տեսանելիությունը, ակադեմիական հեղինակության ձևավորման մեխանիզմներն ու առաջիկա համատեղ աշխատանքի ուղղությունները։

ԵՊՀ գիտական արդյունքները՝ միջազգային տեսանելիության համատեքստում

Հանդիպման մեկնարկին ԵՊՀ ռեկտոր Հովհաննես Հովհաննիսյանը ներկայացրել է համալսարանի ընթացիկ աշխատանքներն ու գիտահետազոտական ներուժը։ 

Անդրադառնալով ԵՊՀ գիտական արդյունքներին՝ ռեկտորը ներկայացրել է նաև միջազգային շտեմարաններում ընդգրկված հրապարակումների աճի դինամիկան։ Նրա խոսքով՝ 2024 թվականին «Scopus» և «Web of Science» շտեմարաններում հաշվառված շուրջ 450 հրապարակումների թիվը մեկ տարի անց հասել է շուրջ 710-ի։ Միաժամանակ, ընթացիկ տարում Q1 դասակարգված գիտական պարբերականներում ԵՊՀ հեղինակների արդեն ավելի քան 100 հրապարակում է արձանագրվել։

Համալսարանականները QS-ի պատվիրակությանը ներկայացրել են նաև համալսարանում կատարվող բարեփոխումները, այդ թվում՝ կրթական ծրագրերի վերանայման և հավատարմագրման գործընթացները՝ նշելով, որ վերջին տարիներին համալսարանը տարբեր ցուցանիշներով արձանագրել է առաջընթաց։ Միաժամանակ ընդգծվել է այդ արդյունքների առավել արդյունավետ ներկայացման և միջազգային ակադեմիական համայնքում ԵՊՀ տեսանելիության բարձրացման կարևորությունը։

ԵՊՀ ռեկտոր Հովհաննես Հովհաննիսյանն ընդգծել է, որ համագործակցության արդյունավետությունը մեծապես կախված է համալսարանի կատարած աշխատանքից։ Նրա խոսքով՝ թեև QS-ի գործընկերները պատրաստ են աջակցելու գործընթացին, սակայն հիմնական աշխատանքն ու պատասխանատվությունը համալսարանի վրա են։ 

QS-ի փորձագետները՝ ԵՊՀ զարգացման ուղիների և առաջիկա աշխատանքի մասին

QS-ի գլխավոր խորհրդատու Իզոբել Ռոսիթերը կարևորել է հանդիպմանը համալսարանի տարբեր ստորաբաժանումների ներկայացուցիչների լայն ներգրավվածությունը։ Նրա խոսքով՝ նման բազմակողմ ներկայացվածությունը կարևոր է, քանի որ տարբեր ստորաբաժանումների համատեղ աշխատանքը կարող է նպաստել համագործակցության առավել արդյունավետ իրականացմանը։

«Թեև սա մեր առաջին այցն է ԵՊՀ, վստահ եմ, որ վերջինը չի լինելու։ Մենք սպասում ենք ձեզ հետ համագործակցությանը և այս ամբողջ գործընթացի ընթացքում միասին աշխատելուն»,- նշել է QS-ի գլխավոր խորհրդատու Իզոբել Ռոսիթերը։

QS-ի խորհրդատու Դարա Բուխտոյարովան նշել է, որ կազմակերպությունը վերջին տարիներին համագործակցության մի շարք ծրագրեր է իրականացրել Ղազախստանում, Ուզբեկստանում, Հունգարիայում, Ավստրալիայում և Ինդոնեզիայում։

«Մենք մեծ ոգևորությամբ ենք աջակցում այս նախաձեռնությանը»,- նշել է խորհրդատուն՝ ներկայացնելով ծրագրի իրականացման առաջիկա փուլերը։ Այս համատեքստում նա ընդգծել է նաև, որ առաջին վեց ամիսներին կկատարվի Հայաստանի բարձրագույն կրթության համակարգի խորքային վերլուծություն, ինչից հետո աշխատանքը կկենտրոնանա ծրագրում ընդգրկված երեք բուհերի վրա։

Նրա խոսքով՝ ԵՊՀ-ի հետ աշխատանքը ներառելու է համալսարանի ուժեղ կողմերի, զարգացման հնարավորությունների և առկա մարտահրավերների ուսումնասիրություն, ինչպես նաև գիտական արդյունքների, միջազգային գործընկերությունների և առարկայական տարբեր ուղղությունների վերլուծություն՝ դրանք առավել տեսանելի դարձնելու, միջազգային հեղինակությունն ամրապնդելու և հետագա զարգացման համար հստակ ճանապարհային քարտեզ ձևավորելու նպատակով։

«QS Quacquarelli Symonds»-ի խորհրդատվության և վերլուծությունների ղեկավար Ժակ դը Շամփշընելն ընդգծել է, որ իրենց թիմի նպատակը համալսարանին պատրաստի լուծումներ պարտադրելը չէ, այլ սեփական ռազմավարության իրականացմանը աջակցելը։

«Մենք այստեղ չենք՝ ձեզ ինչ-որ բան սովորեցնելու համար։ Մեր նպատակը ձեր ռազմավարությանն աջակցելն է։ Մենք համալսարանին տրամադրում ենք վերլուծություններ և առաջարկներ՝ համադրելով մեր տվյալները, փորձագիտական գիտելիքն ու լավագույն փորձը»,- նշել է նա՝ շեշտելով, որ սա է իրենց աշխատանքի հիմնական էությունը։ 

QS-ի ներկայացուցիչներն ընդգծել են, որ համագործակցության առաջին փուլում կկատարվի Հայաստանի բարձրագույն կրթության համակարգի և ապա՝ ԵՊՀ գործունեության խորքային վերլուծություն։ Դրան կհաջորդեն երեք տարվա ընթացքում պարբերական աշխատաժողովներ և տարբեր ուղղություններով սեմինարներ։ 

Նշենք, որ հանդիպումից հետո QS վարկանիշավորման կազմակերպության ներկայացուցիչները շրջայց են կատարել Երևանի պետական համալսարանում՝ ծանոթանալով համալսարանի ենթակառուցվածքներին և գիտակրթական միջավայրին։ Նրանք այցելել են ԵՊՀ Սարգիս և Մարի Իզմիրլյանների անվան գրադարան, ֆիզիկայի ինստիտուտի լաբորատորիաներ և տվյալների կենտրոն՝ ծանոթանալով համալսարանի կրթական, գիտահետազոտական և տեխնոլոգիական հնարավորություններին։