ԵՊՀ-ում բացվեց Օպտիկայի և ֆոտոնիկայի կենտրոն․ ՀՀ վարչապետը ծանոթացավ համալսարանում իրականացվող գիտահետազոտական աշխատանքներին

Երևանի պետական համալսարանի ֆիզիկայի ինստիտուտի օպտիկայի և ֆոտոնիկայի նորաստեղծ կենտրոնը նպատակ ունի դառնալու գիտական հետազոտությունների և տեխնոլոգիական նորարարությունների խոշոր հարթակ՝ միավորելով ժամանակակից լաբորատոր պայմանները, առաջատար գիտնականներին և ուսանողներին։ 

Կենտրոնի ստեղծումն իրականություն է դարձել ՀՀ ԿԳՄՍՆ բարձրագույն կրթության և գիտության կոմիտեի, Նորարարությունների մրցակցային հիմնադրամի (ՆՄՀ) և Երևանի պետական համալսարանի համաֆինանսավորման շնորհիվ։ Այն արտացոլում է պետական մակարդակով գիտության զարգացմանը տրվող առաջնահերթությունը և համալսարանական միջավայրի հնարավորությունների շարունակական ընդլայնումը։

Բացման արարողությունից հետո ՀՀ վարչապետի գլխավորած պատվիրակությունը ԵՊՀ ռեկտոր Հովհաննես Հովհաննիսյանի ուղեկցությամբ շրջեցին կենտրոնի լաբորատորիաներով, ծանոթացան դրանց տեխնիկական հնարավորություններին և իրականացվող հետազոտական ուղղություններին, որոնք ներառում են գերարագ օպտիկա, ֆոտոնիկա, արհեստական բանականություն, նանոտեխնոլոգիաներ և արդի այլ գիտաճյուղեր։

Հետայդու նրանք այցելեցին «Ամարյան» բարեգործական հիմնադրամի աջակցությամբ կառուցված հուշ-պուրակ՝ ծաղիկներ խոնարհելու և հարգանքի տուրք մատուցելու 44-օրյա պատերազմում անմահացած հերոսների հիշատակին։ 

Շարունակելով շրջայցը՝ նրանք եղան նաև ԵՊՀ կենսաբանության ֆակուլտետում՝ ծանոթանալով լաբորատորիաներում իրականացվող աշխատանքներին։

Այցն ամփոփվեց ԵՊՀ դասախոսների և ուսանողների հետ հանդիպմամբ, որին մասնակցում էին ԵՊՀ պրոֆեսորադասախոսական համակազմի ներկայացուցիչներ, ուսանողներ։ Վարչապետը պատասխանեց ներկաներին հետաքրքրող հարցերին։