Առջևում կրթական առաքելությունն է. ԵՊՀ-ում անցկացվեց տեղեկատվական հանդիպում նորանշանակ դասախոսների հետ

ԵՊՀ ռեկտոր Հովհաննես Հովհաննիսյանը, ողջունելով ներկաներին և կարևորելով նրանց համախմբումը համալսարանի կրթական առաքելության շուրջ, ընդգծեց, որ ԵՊՀ-ն միշտ պատրաստ է ընդունելու նոր մտքեր, գիտելիք և փորձի փոխանակման մեթոդներ։ Նա ներկայացրեց համալսարանում գործող ակադեմիական և վարչական կարգերը, հիմնարար գործընթացները, ինչպես նաև մասնագիտական համագործակցության լայն հնարավորությունները թե՛ ներհամալսարանական, թե՛ տեղական և միջազգային մակարդակներում։ 

«Պայմանավորված վերջին շրջանում համալսարանի բազմաթիվ կարգերի փոփոխությամբ՝ սկսած էլեկտրոնային հարթակների կառավարման մեխանիզմներից մինչև ընդհանուր գործընթացների կազմակերպում, որոշեցինք հանդիպում կազմակերպել ԵՊՀ նորանշանակ դասախոսների հետ, որ նրանք լիարժեք պատկերացում կազմեն տեղի ունեցող փոփոխությունների մասին և ավելի արագ ինտեգրվեն համալսարանական միջավայրին»,- նշեց ռեկտորը։

Նա խոսեց համալսարանում գործող բազմաբնույթ հնարավորությունների մասին, որոնք ուղղված են դասախոսական կազմի մասնագիտական զարգացմանն ու բարեկեցությանը։ Մասնավորապես ներկայացվեցին գիտական հոդվածների հրապարակման աջակցման ծրագրերը, դրամաշնորհային ծրագրերի հնարավորությունները, էլեկտրոնային ռեսուրսների հասանելիությունը, ինչպես նաև ԵՊՀ գիտակազմակերպչական խորհրդի կողմից տրամադրվող ճանապարհորդական դրամաշնորհները՝ միջազգային գիտաժողովներին և վերապատրաստումներին մասնակցելու նպատակով։

Անդրադարձ կատարվեց նաև ԵՊՀ ներքին դրամաշնորհային ծրագրերին, ակադեմիական և միջազգային շարժունակության հնարավորություններին, խրախուսական և ֆինանսական աջակցության գործիքակազմին՝ ներառյալ հավելավճարների տրամադրումը։ Ռեկտորը կարևորեց նաև դասախոսների սոցիալական ապահովության հարցը՝ նշելով, որ համալսարանը տրամադրում է առողջապահական ապահովագրություն՝ նպաստելու դասախոսական կազմի առողջական խնդիրների ժամանակին և արդյունավետ լուծմանը։

Խոսելով ֆինանսական քաղաքականության և օրենսդրական փոփոխությունների մասին՝ Հովհաննես Հովհաննիսյանն ընդգծեց, որ վերջերս ընդունված «Բարձրագույն կրթության և գիտության մասին» օրենքում ներառվել է կարևոր դրույթ, համաձայն որի՝ բուհերին պետք է տրամադրվի բազային ֆինանսավորում կրթական գործունեության իրականացման համար։

«Լիահույս ենք, որ այս դրույթի ուժի մեջ մտնելուց հետո համալսարանը կկարողանա ստանալ որոշակի ֆինանսական ռեսուրսներ, որոնք կուղղվեն դասախոսների աշխատավարձերի բարձրացմանը։ Վերջին տարիներին ԵՊՀ-ում արդեն երեք անգամ կատարվել է աշխատավարձերի բարձրացում 10% աճով։ Բացի դրանից՝ ՀՀ ԿԳՄՍՆ բարձրագույն կրթության և գիտության կոմիտեն պարբերաբար հայտարարում է դրամաշնորհային ծրագրեր, որոնք գիտական և ակադեմիական նոր հնարավորություններ են ընձեռում ԵՊՀ դասախոսներին»,- ասաց ԵՊՀ ռեկտորը։ 

Այնուհետև ԵՊՀ ուսումնամեթոդական վարչության բաժնի վարիչ Արմեն Սարգսյանն ու տեղեկատվական տեխնոլոգիաների կրթական և հետազոտական կենտրոնի տնօրեն Արթուր Ավագյանը ԵՊՀ դասախոսներին ներկայացրին համալսարանի էլեկտրոնային հարթակները՝ «Email», «Registrar», «Moodle» համակարգերը, ինչպես նաև դասախոսների աշխատանքը կազմակերպելու համար նախատեսված ներքին գործիքները։ Ներկայացվեցին հարթակների օգտագործման մեթոդաբանությունը, թարմացված գործառույթներն ու գնահատման նորարար մոտեցումները։

Հանդիպման շրջանակում դասախոսները հնարավորություն ունեցան համալսարանի վարչական և տեխնիկական թիմի ներկայացուցիչներին ուղղելու իրենց հետաքրքրող հարցերը։

«Սպասի՛ր ինձ» հաղորդաշարի պրոդյուսեր Տաթևիկ Ախայանը ևս այս տարի առաջին անգամ կդասավանդի Երևանի պետական համալսարանում։

«Ես դասավանդելու եմ «Տեսալսողական սթորիթելինգ» դասընթացը և ուզում եմ փոխանցել այնպիսի գիտելիքներ, որոնք ինքս բուհում չեմ ստացել, սակայն ցանկացել եմ ստանալ։ Նպատակ ունեմ ուսանողների համար ապահովելու պրակտիկ գործընթաց, որ նրանք հնարավորություն ունենան իրենց ստացած տեսական գիտելիքը կիրառելու գործնականում, իմանան՝ ինչպես աշխատել թիմում, ինչպես գրել տեքստ, և առհասարակ, նրանց սովորեցնեմ այն ամենը, ինչ ինքս գիտեմ»,- ընդգծեց Տաթևիկ Ախայանը և հավելեց, որ պատվով, հպարտությամբ ու պատասխանատվությամբ է կրելու ԵՊՀ դասախոսի կոչումը։