Սովորել 21-րդ դարի պահանջներին համահունչ պայմաններում․ ԵՊՀ-ում շարունակվում են միջավայրի բարելավման աշխատանքները

ԵՊՀ տարբեր ֆակուլտետների 16 լսարաններում կատարվել է տիպային վերանորոգում՝ օգտագործելով միատեսակ, դիմացկուն և գեղեցիկ հատակի ծածկույթ, որը ստեղծում է համակողմանի ներդաշնակ միջավայր։ Վերանորոգման ամբողջական ավարտից հետո նախատեսվում է լսարանների ժամանակակից կահավորում՝ ապահովելով ուսումնական գործընթացի կազմակերպման համար հարմարավետ միջավայր։

Այս պահին լսարանների վերանորոգման աշխատանքները շարունակվում են․ նախագծման փուլում է երեք մեծ բեմային լսարանների վերանորոգումը (ԵՊՀ կենսաբանության, քիմիայի ֆակուտետների, 7-րդ ուսումնական մասնաշենքի առաջին հարկի լսարանները)։ 

ԵՊՀ ֆակուլտետների տարբեր ամբիոններ (ԵՊՀ տնտեսագիտության և կառավարման, պատմության ֆակուլտետներ) նույնպես համակողմանիորեն վերանորոգվել և կահավորվել են։

ԵՊՀ 8-րդ ուսումնական մասնաշենքում (1-ին և 2-րդ հարկերում) ստեղծվել է ուսանողական լոֆթ ոճի հանգստի և աշխատանքային տարածք՝ համալրված նոր կահույքով, որտեղ ուսանողները կարող են սովորել, աշխատել, հանգստանալ: 

Վերանորոգվել և արդիականացվել են ԵՊՀ կենսաբանության, քիմիայի ֆակուլտետների, ինչպես նաև ֆիզիկայի ինստիտուտի վեց լաբորատորիաներ։ Վերանորոգման շրջանակում նորացվել են հատակը և օդափոխության համակարգերը։ Լաբորատորիաները ևս շուտով կկահավորվեն ժամանակակից սարքավորումներով։

Վերափոխվել և ներկվել են բասկետբոլի և վոլեյբոլի դաշտերը։ Լուսավորության արդիականացման նպատակով ֆուտզալի խաղադաշտում կառուցվում է տանիք, որը կհեշտացնի լույսերի տեղադրումն ու սպասարկումը։

Ֆակուլտետներից, գիտական և կրթական կենտրոններից բացի՝ վերանորոգվել և արդիականացվել են ԵՊՀ վարչական ստորաբաժանումները (Միջազգային համագործակցության վարչություն, ԵՊՀ պատմության թանգարանի նախամուտքը, լուսավորությունը)։ ԵՊՀ կենտրոնական մասնաշենքի երրորդ հարկի նախկին բուֆետի տարածքը վերափոխվում է՝ դառնալով գրասենյակային տարածք, լսարան, աշխատասենյակ։

Բարեփոխվում են ոչ միայն համալսարանի ֆակուլտետների (Մաթեմատիկայի և մեխանիկայի, Սոցիոլոգիայի, Կենսաբանություն, Տնտեսագիտության և կառավարման ֆակուլտետների, Ֆիզիկայի ինստիտուտի տարբեր հարկեր, ԵՊՀ 7-րդ մասնաշենքի առաջին հարկ), այլև կենտրոնական մասնաշենքի միջանցքները։ Ըստ ԵՊՀ գլխավոր ինժեներ, տնտեսական գործունեության կազմակերպման և վերահսկման բաժնի վարիչ Դավիթ Կարախանյանի՝ վերանորոգված միջանցքների ծավալը համեմատելի է մի քանի լսարանների վերանորոգման հետ։ Այս գործընթացը ընդգրկել է ոչ միայն պատերի նորոգումը, այլև լուսավորության համակարգերի, հոսանքի լարերի արդիականացումը, հատակի նորոգումը և ջրագծերի փոփոխությունը, որոնք հիմնովին բարելավել են ամբողջ տարածքի ֆունկցիոնալությունը։

Վերանորոգման աշխատանքներ են կատարվել նաև ԵՊՀ ՍԹԵՄ ավագ դպրոցում․ լսարանները ընդարձակվել են՝ ընդլայնելով լսարանների ընդհանուր ֆոնդը։ Դպրոցի 10-րդ դասարանի աշակերտներն արդեն դասերն անցկացնում են ամբողջությամբ վերանորոգված և կահավորված դասասենյակներում։ 

ԵՊՀ-ում կատարվող վերանորոգման աշխատանքները ոչ միայն շինարարական նախագծեր են, այլև կրթական միջավայրի ընդհանուր բարելավմանն ուղղված ռազմավարական քայլեր։

Համալսարանը շարունակում է վերափոխվել՝ ժամանակին համընթաց զարգացնելով իր կրթական միջավայրը։