Բրիտանական թանգարանի տեղեկագրի անդրադարձը ԵՊՀ պրոֆեսոր Լ. Ղարիբջանյանի անվան պատմության թանգարանում կազմակերպված ցուցադրությանը

2024 թվականին ԵՊՀ պատմության թանգարանում տեղի ունեցավ «Ուսանողների դերը ուշխորհրդային Հայաստանի լիբերալ մշակույթում» վերտառությամբ հետազոտական նախագիծ-ցուցադրությունը, որը կազմակերպվել էր Երևանի պետական համալսարանի և Ֆրիդրիխ Նաումանի «Հանուն ազատության» հիմնադրամի համագործակցությամբ: Այն ներառում էր 5 դասախոսություն (որոնցից մեկն ուղեկցվել է ֆիլմի դիտումով) և վեցամսյա մեկ ցուցադրություն:

Միջազգային դրամաշնորհի շրջանակում ցուցադրությունը ԵՊՀ թանգարանում կազմակերպվում էր առաջին անգամ: Ցուցադրության առանձնահատկությունը նաև այն էր, որ վերջինս ներառում էր մատչելի, շոշափելի տարածքներ, ինչպիսիք էին, օրինակ, 1960-ականների սրճարանի և հյուրասենյակի անկյունների վերստեղծումը, հիպիների հագուստի ցուցադրությունը, արգելված և «սամիզդատ» գրքերով գրապահարանը, ռադիոհաղորդիչը և այլն: Ցուցանմուշներին կարելի էր ձեռք տալ, շոշափել, նստել աթոռին, «սելֆի» անել: Ցուցանմուշներով վերստեղծված դարաշրջանի իրականությանն առնչակից լինելով մոտիկից՝ թանգարանի այցելուները, հատկապես ուսանողները դրանով իսկ բուն ցուցադրության մաս կազմեցին: 

ԵՊՀ պատմության թանգարանի առաջին դրամաշնորհային և միջազգային համագործակցային նախաձեռնությանն անդրադարձել է Բրիտանական թանգարանն իր տեղեկագրում, որն այս տարի կրում էր «Մի մոռացիր ձեռք տալ» խորագիրը: ԵՊՀ պատմության թանգարանի ցուցադրությունն ամբողջությամբ համապատասխանում էր այդ տրամաբանությանը:

Թանգարանի տնօրենը, իր խոսքում ընդգծելով թանգարանների ներդրումը հասարակության ներդաշնակ և կայուն զարգացման գործընթացներում, նշեց, որ առաջիկայում իրենց ռազմավարական ծրագրերում նախատեսելու են նյութերի հասանելիություն բոլորի, այդ թվում՝ տեսողական, հենաշարժողական և ֆիզիկական այլ սահմանափակում ունեցող ուսանողների համար: 

Թանգարանն այդպիսով կդադարի առարկաների լոկ ցուցադրության տարածք լինելուց՝ վերածվելով ինտերակտիվ կրթության և հետազոտության արդյունավետ միջոցի:

Ժամանակակից թանգարանագիտության մեջ այցելուի և ցուցադրվող առարկաների միջև կենդանի կապ ապահովելու միտում կա (այդ նպատակով ցուցադրվող բնօրինակները հաճախ փոխարինվում են կրկնօրինակներով): Այդ միտումներին և փոփոխություններին համընթաց է փորձում շարժվել նաև ԵՊՀ պրոֆեսոր Լ. Ղարիբջանյանի անվան պատմության թանգարանը, որի գործունեությունը միտված է նպաստելու համալսարանի կրթական ներուժի զարգացմանը, կրթահետազոտական առաքելության իրագործմանն ու արժևորմանը:

Իսկ մինչ այդ…

ԵՊՀ պրոֆեսոր Լ. Ղարիբջանյանի անվան պատմության թանգարանի տնօրեն Տաթևիկ Սարոյանը մեզ հետ զրույցում նշեց, որ դեռ 2022 թվականին է դիմել Բրիտանական թանգարանի միջազգային ծրագրին և ֆելոուշիփի հնարավորություն ստացել: 

Ստանձնելով ԵՊՀ պատմության թանգարանի տնօրենի պաշտոնը՝ Տ. Սարոյանը որոշեց մասնագիտական տիրույթում հանդես գալ հետաքրքիր նախաձեռնությամբ: 2024 թվականին լրանում էր ԵՊՀ պրոֆեսոր Լ. Ղարիբջանյանի անվան պատմության թանգարանի 64-ամյակը, ինչն էլ հիմք հանդիսացավ մասնագիտական տիրույթում նախաձեռնություններով հանդես գալու (գիտական հետազոտություն, ֆոնդերի ուսումնասիրություն, հաշվետու ցուցադրություն), ի թիվս որոնց՝ նաև միջազգային դրամաշնորհի դիմում: