Դեկտեմբեր 10, 2025 | 13:08
Գիտություն
Կրթություն
Միջազգային համագործակցություն
«T-GREEN» նախագծի շրջանակում քննարկվել են մագիստրոսական մշակված ծրագրերի փորձարկման արդյունքներն ու դրանց համապատասխանեցումը օրենսդրական նոր կարգավորումներին
«Էրազմուս+»-ի «T-GREEN» («Transforming Graduate Education for Green and Sustainable Future») նախագծի շրջանակում Պորտուգալիայի կաթոլիկ համալսարանում (ք․ Պորտո) տեղի ունեցավ աշխատաժողով՝ մագիստրոսական ծրագրերի փորձնական իրականացման արդյունքների քննարկման նպատակով։
Ս․թ. դեկտեմբերի 2–4-ը անցկացված եռօրյա աշխատաժողովը միավորեց Հայաստանի և ԵՄ գործընկեր բուհերի, ինչպես նաև կոնսորցիումի մի շարք անդամների ներկայացուցիչներին՝ քննարկելու մագիստրոսական ծրագրերի փորձնական ներդրման արդյունքները և դրանց հետագա կատարելագործման ու կայունության հարցերը։
Աշխատաժողովը մեկնարկեց Պորտուգալիայի կաթոլիկ համալսարանի և հայ գործընկերների ողջույնի խոսքերով, որոնցում ընդգծվեցին կայուն և «կանաչ» ապագայի պահանջներին համապատասխան բարձրագույն կրթության արդիականացման կարևորությունը և կրկնակի դիպլոմների տրամադրման ծրագրի զարգացման վերաբերյալ կոնսորցիումի միասնական մոտեցումը։
ԵՄ գործընկեր համալսարանների ներկայացուցիչները համապարփակ տեղեկություն ներկայացրին Պորտուգալիայում, Լիտվայում, Լեհաստանում և Հունաստանում համատեղ, կրկնակի և բազմակի մագիստրոսական ծրագրերին վերաբերող օրենսդրական դաշտի, ազգային կանոնակարգերի և ինստիտուցիոնալ ընթացակարգերի վերաբերյալ։ Ծրագրերի տարածման, ուսանողների ընդգրկման, որակի ապահովման և ներքին կարգերի վերաբերյալ իրենց փորձով նրանք հնարավորություն տվեցին հայաստանյան բուհերին ավելի հստակ պատկերացում կազմելու եվրոպական չափորոշիչներին համապատասխան գործընթացների ներդրման մասին։
Հայաստանյան գործընկեր բուհերը ներկայացրին մագիստրոսական նոր մշակված ծրագրերի փորձնական իրականացման արդյունքները, այդ թվում՝ տնտեսագիտության, գյուղատնտեսության, ճարտարապետության, ինժեներության, կառավարման և տեղեկատվական տեխնոլոգիաների ոլորտների ծրագրերը։ Արձանագրվեցին ձեռքբերումները, ինչպես նաև համագործակցության ու կարողությունների ամրապնդման լրացուցիչ անհրաժեշտությունը։
Աշխատաժողովի շրջանակում անդրադարձ կատարվեց նաև ՀՀ բարձրագույն կրթության և գիտության մասին նոր ընդունված օրենքի հիմնական դրույթներին, որի համաձայն տրամադրվում է համատեղ մագիստրոսական ծրագրերի իրականացման համար ամբողջական իրավական շրջանակ։
Բարձրագույն կրթության և գիտության կոմիտեի ներկայացուցիչներն իրենց ելույթում անդրադարձան օրենքի հիմնական փոփոխություններին՝ մատնանշելով, որ օրենքի լիարժեք կիրառման համար անհրաժեշտ է ենթաօրենսդրական ակտերի մշակում։ Այս առումով «T-GREEN» նախագծի ընթացքում կուտակված փորձը կարող է կարևոր դերակատարում ունենալ ազգային կարգավորումների մշակման փուլում։
Աշխատաժողովի ընթացքում հատուկ ընդգծվեց նաև, որ «T-GREEN» նախագծի շրջանակում Երևանի պետական համալսարանում մշակվել և ներդրվել են երեք նոր մագիստրոսական ծրագրեր՝ «Կանաչ տնտեսություն և կառավարում» (Տնտեսագիտության և կառավարման ֆակուլտետ), «Բլոկչեյն և թվային արժույթներ» (Մաթեմատիկայի և մեխանիկայի ֆակուլտետ), «Կայուն քաղաքների կառավարում» (Սոցիոլոգիայի ֆակուլտետ)։
2025-2026 ուստարվանից Մաթեմատիկայի և մեխանիկայի ֆակուլտետում հաջողությամբ մեկնարկել է «Բլոկչեյն և թվային արժույթներ» մեկ տարի տևողությամբ մագիստրոսական ծրագիրը։ Բացի դրանից՝ ԵՊՀ կենսաբանության ֆակուլտետում վերապրոֆիլավորվել են մի շարք դասընթացներ, ուսումնական ծրագրերը հարստացվել են «կանաչ կրթության» բաղադրիչներով օժտված մասնագիտական հինգ առարկաներով։
Աշխատաժողովը եզրափակվել է նախագծի ավարտական միջազգային համաժողովի անցկացման օրերի և կառուցվածքի վերաբերյալ համաձայնությամբ։
Համաժողովը տեղի կունենա 2026 թ. փետրվարի 17–19 Երևանում։
«T-GREEN» նախագիծը, որը մեկնարկել է 2023 թվականին և համաֆինանսավորվում է Եվրոպական միության կողմից, ուղղված է բակալավրիատից հետո տրամադրվող կրթության համակարգի բարեփոխումներին՝ առանձնահատուկ կարևորելով «կանաչ» քաղաքականությունների ներդրումը։
Նախագիծը համակարգում են Հայաստանի ազգային պոլիտեխնիկական և Եվրասիա միջազգային համալսարանները։
Հայաստանյան գործընկերներն են ՀՀ կրթության, գիտության, մշակույթի և սպորտի նախարարությունը, Բարձրագույն կրթության և գիտության կոմիտեն, Որակի ապահովման ազգային կենտրոնը, Երևանի պետական, Հայաստանի պետական տնտեսագիտական, Հայաստանում ֆրանսիական, Հայաստանի ազգային պոլիտեխնիկական, Հայաստանի ազգային ագրարային, Գորիսի պետական, Գավառի պետական համալսարանները, ինչպես նաև «Erasmus Student Network Yerevan» և «Hope Bridge» ՀԿ-ները։
ԵՄ գործընկերներն են՝ International Hellenic University (Հունաստան), Mikolas Romeris University (Լիտվա), Catholic University of Portugal (Պորտուգալիա) և Jagiellonian University of Krakow (Լեհաստան)։
