Լեզու, մշակույթ, ինքնություն. ԵՊՀ-ում նշվեց Արաբերենի օրը

Միջոցառմանը մասնակցում էին նաև ՀՀ-ում Արաբական Միացյալ Էմիրությունների, Սիրիայի Արաբական Հանրապետության, Լիբանանի Հանրապետության, Եգիպտոսի Արաբական Հանրապետության, Իրաքի Հանրապետության, Կատարի Պետության և Քուվեյթի Պետության արտակարգ և լիազոր դեսպանները։

Միջոցառման մեկնարկին ողջույնի խոսքով հանդես եկավ ԵՊՀ զարգացման և նորարարությունների գծով պրոռեկտոր Միքայել Հովհաննիսյանը՝ ընդգծելով օրվա նշանակությունն ու արաբերենի դերը ոչ միայն ֆակուլտետի և համալսարանի, այլև պետության ու հասարակության համար։

Արաբերենը դիտարկելով միջմշակութային հաղորդակցության համատեքստում՝ պրոռեկտորը շեշտեց նրա դերը ոչ միայն որպես սեփական մշակույթն ու պատմությունը ուսումնասիրելու, վերլուծելու և հարստացնելու յուրահատուկ գործիք, այլ նաև ինքնության և ինքնաճանաչման միջոց:

«Այս օրը չափազանց կարևոր է՝ մատնանշելու և ուրվագծելու այն նշանակությունը, որն ունի արաբերենը ոչ միայն Արևելագիտության ֆակուլտետի և ԵՊՀ-ի, այլ նաև մեր պետության և հասարակության համար։ Լեզվի իմացությունը բանալի է մշակութային, պատմական և քաղաքական շերտերը բացահայտելու համար՝ ուսումնասիրելով ինչպես միջնադարյան աղբյուրները, այնպես էլ ժամանակակից գործընթացները։ Եվ հենց այդ բանալին է կիրառվում նաև այստեղ՝ Արևելագիտության ֆակուլտետում, քանի որ գործող կրթական ծրագրերը հնարավորություն են ընձեռում լեզուն կիրառելու որպես գործիք՝ մշակույթը, պատմությունը և կրոնը խորապես ուսումնասիրելու համար»,- նշեց Մ. Հովհաննիսյանը։

ԵՊՀ արևելագիտության ֆակուլտետի դեկան Ռուբեն Մելքոնյանը կարևորեց Արաբերենի օրը՝ այն բնորոշելով որպես բարեկամ ժողովուրդների և մշակույթների միջև կապը ամրապնդելու առիթ։

«Այսօր մեր բարեկամ ժողովուրդների լեզվի օրն է, որը նաև մեր ֆակուլտետում բարեկամ երկրների դեսպաններին հյուրընկալելու հնարավորություն է։ Արաբագիտության ամբիոնը տասնամյակներ շարունակ մեծ սիրով կատարում է արաբերենի և արաբական մշակույթի ուսուցման ու տարածման իր առաքելությունը։ Դուք պետք է գիտակցեք, որ գտնվում եք երեք գեղեցկությունների կենտրոնում՝ գեղեցիկ դասախոսների, գեղեցիկ լեզվի և գեղեցիկ ուսանողների շրջապատում։ Այս բոլոր գեղեցկություններից պետք է օգտվել առավելագույնս»,- ընդգծեց դեկանը։

ԵՊՀ արևելագիտության ֆակուլտետի արաբագիտության ամբիոնի վարիչ Հայկ Քոչարյանն իր հերթին խոսեց արաբագիտության խորհրդանշական և ներքին նշանակության մասին։

«Արաբագիտությունը պարզապես գիտական ուղղություն չէ: Այն մի ամբողջական և գեղեցիկ աշխարհ է, որը մենք բացահայտում ենք միասին տարիների ընթացքում։ Արաբերենի միջազգային օրը մեզ համար յուրահատուկ է, հնարավորություն՝ վերարժևորելու անցած ճանապարհը, ամփոփելու ձեռքբերումները և ուրվագծելու ապագա ծրագրերը։ Այս օրը նաև յուրատեսակ տարեկան հաշվետվություն է ոչ միայն թվերի կամ արդյունքների, այլև արժեքների, գաղափարների և գիտական շարունակականության մասին։ Մեր ամբիոնի առաքելությունն է փոխանցել լեզվի նկատմամբ սերը, մշակույթի խորքային ընկալումը և գիտական հետաքրքրությունը՝ ձևավորելով մասնագետներ, որոնք կարող են կամրջել մշակույթներն ու ժամանակաշրջանները»,– կարևորեց ամբիոնի վարիչը։

Նրա խոսքով՝ արաբերենի ուսումնասիրությունը կարևոր է ոչ միայն ակադեմիական, այլև համաշխարհային գործընթացները հասկանալու տեսանկյունից, քանի որ լեզուն հնարավորություն է ընձեռում ընթերցելու և վերլուծելու տարածաշրջանի հասարակական, քաղաքական և մշակութային զարգացումները հենց սկզբնաղբյուրներից։

Միջոցառմանը ներկա էին նաև դպրոցականներ, որոնք հետաքրքրված են արաբերենով և ուսումնասիրում են այն։ Նրանց ներկայությունը, կազմակերպիչների խոսքով, վկայում է ոլորտի ապագայի, շարունակականության և սերնդափոխության մասին։