Մարտ 14, 2026 | 11:48
Գիտություն
Հասարակություն
Մարտի 14-ը՝ Մաթեմատիկայի միջազգային օր
Մարտի 14-ը ամբողջ աշխարհում նշվում է որպես Մաթեմատիկայի միջազգային օր։ Այն հաստատվել է ՅՈՒՆԵՍԿՕ-ի կողմից 2019 թվականին՝ նպատակ ունենալով ընդգծելու մաթեմատիկայի կարևոր դերը գիտության, տեխնոլոգիայի, տնտեսության և առօրյա կյանքի զարգացման մեջ։
Այս օրը նաև հայտնի է որպես ՊԻ օր, քանի որ ամսաթվի թվային գրությունը ՝ 3.14, համընկնում է մաթեմատիկայի կարևորագույն հաստատուններից մեկի՝ π (պի) թվի առաջին թվանշանների հետ։ π թիվը լայնորեն կիրառվում է երկրաչափության, ֆիզիկայի, ճարտարագիտության և բազմաթիվ այլ գիտական ոլորտներում՝ շրջանագծերի, ալիքների և բարդ մաթեմատիկական մոդելների հաշավարկներում։
Մաթեմատիկայի միջազգային օրը նշվում է նաև կրթական և գիտական հաստատություններում։ Այդ օրը աշխարհի տարբեր համալսարաններում կազմակերպվում են գիտաժողովներ, դասախոսություններ, կրթական ծրագրեր, ինտելեկտուալ խաղեր և մրցույթներ՝ նպատակ ունենալով խթանելու երիտասարդների հետաքրքրությունը մաթեմատիկայի նկատմամբ։ Համալսարաններում և կրթական հաստատություններում հաճախ կազմակերպվում են նաև թեմատիկ միջոցառումներ, բաց դասեր և քննարկումներ՝ նվիրված մաթեմատիկայի կիրառական նշանակությանը։
Երևանի պետական համալսարանի գիտական և կրթական գործընթացում ևս մաթեմատիկան առանցքային դերակատարում ունի։ ԵՊՀ մաթեմատիկայի և մեխանիկայի ֆակուլտետում կատարվում են գիտական հետազոտություններ, պատրաստվում են բարձրակարգ մասնագետներ, իսկ մաթեմատիկական գիտելիքները կիրառվում են նաև այլ ոլորտներում՝ ֆիզիկայի, ինֆորմատիկայի, տնտեսագիտության և տվյալագիտության։
Այս օրը ևս մեկ անգամ ընդգծում է համալսարանների կարևոր դերակատարությունը գիտական մտքի զարգացման գործում։ Բարձրագույն կրթական հաստատություններում մաթեմատիկան ոչ միայն ուսումնասիրվում է որպես տեսական գիտություն, այլև ակտիվորեն կիրառվում է տարբեր ոլորտներում՝ համագործակցելով ֆիզիկայի, ինֆորմատիկայի, տնտեսագիտության և այլ գիտակարգերի հետ։
Մաթեմատիկայի միջազգային օրը հիշեցնում է, որ թվերն ու բանաձևերը միայն տեսական հասկացություններ չեն․ դրանք այն լեզուն են, որով հնարավոր է բացատրել աշխարհի կառուցվածքը և ստեղծել ապագայի տեխնոլոգիաները։ Այդ պատճառով մաթեմատիկական գիտելիքների զարգացումը շարունակում է մնալ կրթության և գիտության կարևոր առաջնահերթություններից մեկը։
