ԵՊՀ-ն՝ «Հորիզոն Եվրոպա» ծրագրի շրջանակում հաղթող ճանաչված «WARIE» նախագծի մասնակից

Նախագիծը նպատակ ունի խթանելու արհեստական բանականության (AI) ոլորտում գիտական հետազոտությունները և նորարարությունը Արևելյան գործընկերության երկրներում՝ Հայաստանի, Վրաստանի և Մոլդովայի առաջատար համալսարանների և գիտահետազոտական կենտրոնների կարողությունների զարգացման միջոցով։ «WARIE»-ի շրջանակում նախատեսվում է ստեղծել միջգիտակարգային AI հետազոտական գերազանցության կենտրոններ, որոնք կկենտրոնանան հատկապես առողջապահության և գյուղատնտեսության ոլորտների վրա։

«WARIE» նախագիծը նաև նպատակ ունի զարգացնելու հետազոտական կառավարման համակարգերը, խթանելու երիտասարդ գիտնականների և հետազոտողների կարողությունների զարգացումը, ներդնելու բաց գիտության սկզբունքներին համապատասխան թվային ենթակառուցվածքներ և խորացնելու համագործակցությունը եվրոպական առաջատար համալսարանների ու հետազոտական կենտրոնների հետ։

48 ամիս տևողությամբ նախագծի ընդհանուր բյուջեն կազմում է ավելի քան 4․2 մլն եվրո։

Նախագիծը միավորում է 13 գործընկեր կազմակերպություն Հայաստանից, Վրաստանից, Մոլդովայից և եվրոպական մի շարք երկրներից՝

• ՀՀ ԳԱԱ ինֆորմատիկայի և ավտոմատացման պրոբլեմների ինստիտուտ (նախագծի համակարգող),

• Երևանի պետական համալսարան,

• Վրաստանի տեխնիկական համալսարան,

• Իվանե Ջավախիշվիլիի անվան Թբիլիսիի պետական համալսարան,

• Մոլդովայի տեխնիկական համալսարան,

• Մոլդովայի պետական համալսարան,

• Գերմանական արհեստական բանականության հետազոտական կենտրոն (DFKI),

• Սաարլանդի համալսարան (Saarland University),

• Եվրոպական գիտության հիմնադրամ (European Science Foundation),

• Տուլուզի ազգային պոլիտեխնիկական ինստիտուտ (INP Toulouse),

• Տուլուզի համալսարան (Université de Toulouse),

• Ժնևի համալսարան (University of Geneva),

• Լինշոպինգի համալսարան (Linköping University)։

Երևանի պետական համալսարանի մասնակցությունը նախագծին կարևոր քայլ է համալսարանի միջազգային գիտահետազոտական համագործակցության ընդլայնման և արհեստական բանականության ոլորտում հետազոտությունների զարգացման ուղղությամբ։