ԵՊՀ աջակցությամբ կազմակերպվել է Քուվեյթում գտնվող ուսանողների վերադարձը Հայաստան

Վերջին շրջանում տարածաշրջանում ստեղծված իրավիճակով պայմանավորված՝ Քուվեյթի օդային տարածքի փակ լինելու պատճառով հայրենիք վերադառնալու համար ՀՀ դեսպանություն էր դիմել շուրջ 33 ՀՀ քաղաքացի, որոնցից 8-ը՝ ԵՊՀ արևելագիտության ֆակուլտետի «Արաբագիտություն» կրթական ծրագրի ուսանողներ։ Ստեղծված պայմաններում համալսարանը ձեռնամուխ է եղել աջակցելու ուսանողների՝ Հայաստան վերադառնալու գործընթացի կազմակերպմանը՝ համագործակցելով համապատասխան կառույցների հետ։

Պաշտոնական տվյալների համաձայն՝ Քուվեյթում ՀՀ դեսպանությունն աջակցել է Հայաստանի 9 քաղաքացու վերադարձին Քուվեյթ–Ռիյադ–Թբիլիսի–Երևան երթուղով։ Ցամաքային ուղևորափոխադրումը կազմակերպվել է անվճար։ Վերադարձածների թվում էր նաև ԵՊՀ ուսանողների խումբը։

Չնայած արտակարգ իրավիճակին՝ ուսանողները շարունակում են իրենց ուսումնառությունը առցանց ձևաչափով և ծրագրի ավարտին կստանան համապատասխան հավաստագրեր Քուվեյթի համալսարանից։

ԵՊՀ արևելագիտության ֆակուլտետի արաբագիտության ամբիոնի վարիչ Հայկ Քոչարյանի խոսքով՝ ուսանողները ներկայում գտնվում են տարկետման փուլում, և թեև ուսումնական գործընթացի լիարժեք վերականգնումը ԵՊՀ-ում դեռևս հնարավոր չէ, սակայն ֆակուլտետը նրանց հնարավորություն է ընձեռել ցանկության դեպքում մասնակցելու դասերին։

Ուսանողները ևս ընդգծեցին, որ ստեղծված իրավիճակում իրենց համար կարևոր էին համալսարանի մշտական աջակցությունն ու հոգատարությունը, և իրենք վստահ էին, որ կկարողանան անվտանգ վերադառնալ և շարունակել իրենց կրթությունը։

Նշենք, որ ներկայում միջբուհական նույն կրթական ծրագրով ԵՊՀ մի խումբ ուսանողներ ուսումնառում են Կատարում, Հորդանանում և Կահիրեում, որտեղ կրթական գործընթացը շարունակվում է՝ ըստ սահմանված ծրագրի։