«Հոգեբանական վերնիսաժ» ցուցահանդեսը՝ նոր ձևաչափով և համագործակցության ընդլայնվող հնարավորություններով

Էքսպոն կազմակերպվել էր ԵՊՀ ընդհանուր հոգեբանության ամբիոնի ու հոգեբանության գիտահետազոտական կենտրոնի նախաձեռնությամբ և «Հայաստանի հոգեբանների միություն» մասնագիտական ՀԿ-ի աջակցությամբ։

ԵՊՀ փիլիսոփայության և հոգեբանության ֆակուլտետի ընդհանուր հոգեբանության ամբիոնի վարիչ, հ.գ.դ., պրոֆեսոր Հրանտ Ավանեսյանը, անդրադառնալով միջոցառման նպատակներին և կազմակերպման առանձնահատկություններին, նշեց. ««Հոգեբանական վերնիսաժ» էքսպոյի հիմնական նպատակներից է հանրությանը ներկայացնել հոգեբանի գործառույթները և աջակցել որակյալ մասնագետների բացահայտմանը։ Տարիների ընթացքում միջոցառման ձևաչափը զգալիորեն փոխվել է․ աճել է թե՛ մասնակիցների, թե՛ ներգրավված կազմակերպությունների թիվը։ Եթե նախկինում ինքնաներկայացումը ավելի պարզ էր, ապա այսօր կիրառվում են ժամանակակից տեխնոլոգիաներ, այդ թվում՝ արհեստական բանականությամբ ստեղծված ներկայացումներ։ Վերջին 5–6 տարիներին միջոցառմանը որպես կամավորներ մասնակցում են բակալավրիատի ուսանողները, ինչը նրանց համար արժեքավոր փորձառություն է։ Միջոցառումն արդեն դուրս է եկել ԵՊՀ սահմաններից․ էքսպոներ անցկացվել են նաև Հայ-ռուսական համալսարանում և ՀՀ պետական կառավարման ակադեմիայում»։

Հրանտ Ավանեսյանը կարևորեց հոգեբանների միավորումը մեկ միասնական հասարակական կազմակերպության շրջանակում՝ ընդգծելով, որ հոգեբանը պետք է ունենա ոչ միայն համապատասխան կրթություն, այլև մասնագիտական իրավունքներ՝ համահունչ միջազգային բարոյագիտական նորմերին։

Մասնակից կազմակերպությունները էքսպոյի շրջանակում ներկայացրին իրենց վերապատրաստման ծրագրերը, թերապևտիկ մոտեցումները, ինչպես նաև հոգեկան առողջության պահպանմանն ուղղված ծառայությունները։

«Recovery» քոլեջի և Հոգեսոցիոլոգիական կարգավորման կենտրոնի ներկայացուցիչ Լիլիթ Բաղդասարյանը ներկայացրեց իր գործունեությունը հոգեբանության ոլորտում։ Կենտրոնը հանդես էր գալիս նաև սոցիալական ձեռնարկության ձևաչափով, որտեղ հոգեկան առողջության խնդիրներ ունեցող անձինք հնարավորություն ունեն աշխատելու և վարձատրվելու։ Այն մատուցում է բազմաբնույթ ծառայություններ՝ ներառյալ հոգեբուժական, թմրաբանական, նյարդաբանական և հոգեբանական աջակցություն։

ԵՊՀ-ն և Հայաստանի հոգեբանների միությունը ներկայում մշակում են վերապատրաստման նոր ծրագրեր, որոնք միտված են մասնագիտական զարգացմանը։ Դրանք կլինեն բազմազան՝ ուղղված տարբեր ոլորտներում գործունեություն ծավալող հոգեբաններին՝ կրթական հաստատություններից մինչև բանկային համակարգ և HR ոլորտ։ Միևնույն ժամանակ, ԵՊՀ փիլիսոփայության և հոգեբանության ֆակուլտետում իրականացվում է «Կառավարման հոգեբանություն» մագիստրոսական ծրագիրը, որը հնարավորություն է տալիս ստանալու առավել մասնագիտացված կրթություն։

Էքսպոյին մասնակցեցին հասարակական տարբեր կազմակերպություններ և հոգեբանական կենտրոններ, որոնք ներկայացրին իրենց ծառայություններն ու հոգեթերապևտիկ մեթոդները։