Չինացի անվանի գիտնական Սուն Չժուանչժիի գլխավորած պատվիրակությունն այցելել է ԵՊՀ

Այցի շրջանակում Սուն Չժուանչժին հանդիպում է ունեցել ԵՊՀ ռեկտոր Հովհաննես Հովհաննիսյանի հետ։ Նրանք քննարկել են հայ-չինական ակադեմիական համագործակցության զարգացման հեռանկարները, գիտահետազոտական ծրագրերի ընդլայնման հնարավորությունները և բարձրագույն կրթության ոլորտում փորձի փոխանակման հարցերը։

Այնուհետև պրոֆեսոր Սուն Չժուանչժին ԵՊՀ միջազգային հարաբերությունների ֆակուլտետում հանդիպել է ֆակուլտետի պրոֆեսորադասախոսական կազմի ներկայացուցիչների հետ՝ քննարկելով մասնագիտական ոլորտին առնչվող տարաբնույթ հարցեր։ Քննարկման առանցքում են եղել ժամանակակից աշխարհի վերափոխումները, միջազգային հարաբերությունների համակարգում տեղի ունեցող փոփոխությունները, աշխարհաքաղաքական նոր իրողությունները, գլոբալ և տարածաշրջանային մարտահրավերները, ինչպես նաև Կենտրոնական Ասիայի, Հարավային Կովկասի և Չինաստանի դերակատարումը ձևավորվող միջազգային գործընթացներում։

Մասնակիցները մտքեր են փոխանակել միջազգային անվտանգության, տնտեսական համագործակցության, բազմաբևեռ աշխարհակարգի ձևավորման և պետությունների միջև գործակցության նոր ձևաչափերի վերաբերյալ։ 

Ձևավորելով կարևոր հարթակ գիտական և փորձագիտական երկխոսության համար՝ այս հանդիպումը հայ և չինացի մասնագետներին հնարավորություն ընձեռեց համադրելու միջազգային զարգացումների շուրջ իրենց մոտեցումներն ու գնահատականները։