«Համալսարանը մեզ տալիս է երկու բան, որոնք երբեք հնարավոր չէ խլել՝ գիտելիք և կապեր». ԵՊՀ շրջանավարտ Տիրան Հակոբյան

«Համալսարանական կապերը՝ բիզնեսի զարգացման գրավական» թեմայով բանախոսության ընթացքում ԵՊՀ ֆիզիկայի ինստիտուտի շրջանավարտ, «GTB Holdings»-ի գլխավոր գործադիր տնօրեն, «Armenian Mushroom Company»-ի հիմնադիր և «Seaside Startup Summit»-ի համահիմնադիր Տիրան Հակոբյանը ներկայացրեց ոչ միայն իր մասնագիտական ճանապարհը, այլև մարդկանց և մարդկային հարաբերությունների մասին պատմություններ, որոնք ձևավորվել են ուսանողական տարիներին և հետագայում դարձել հաջողված նախաձեռնությունների հիմք։

Դպրոցն ընտրում են ծնողները, համալսարանը՝ մենք

Տիրան Հակոբյանի համոզմամբ՝ մարդուն ձևավորում են երեք հիմնական գործոններ՝ միջավայրը, գիտելիքը և կյանքի ընթացքում հանդիպող շրջադարձային մարդիկ։ Նա հիշեց իր կյանքում հանդիպած այն անհատներին, որոնք կարևոր դեր են ունեցել իր կայացման գործում՝ Ապարանի ֆիզմաթ դպրոցի հիմնադիր տնօրեն Մանվել Պետրոսյանին, ինչպես նաև համալսարանի դասախոսներ Խաչատուր Ներկարարյանին և Սամվել Հարությունյանին։

«Սեպտեմբերի 1-ին Սամվել Հարությունյանն ասաց մի նախադասություն, որը մինչև օրս հիշում եմ․ «Խոսք չեմ տալիս, որ բոլորիդ ֆիզիկոս կդարձնենք, բայց խոստանում եմ, որ բոլորիդ մտածել կսովորեցնենք»»,- այս խոսքերը մեջբերեց ԵՊՀ շրջանավարտը, որի համար դրանք հետագայում դարձան կարևոր ուղենիշ։

Ըստ Տիրան Հակոբյանի՝ ուսանողական տարիներին ձևավորված հարաբերություններն առանձնահատուկ արժեք ունեն, քանի որ դրանք կառուցվում են անկեղծության և ընդհանուր հետաքրքրությունների հիման վրա։

«16-22 տարեկանում ձևավորված կապերը շատ ջերմ են, անկեղծ, հիմնականում շահադիտական չեն և հետագայում դառնում են մարդկային ու մասնագիտական հարաբերությունների կարևոր հիմք»,- ասաց նա։

Մի չստացած գնահատականը փոխեց ամեն ինչ

Տիրան Հակոբյանը պատմեց նաև իր ուսանողական տարիներից մի դրվագ, որը, ինչպես ինքն է խոստովանում, հետագայում դարձավ իր կյանքի շրջադարձային պահերից մեկը։

Նրա խոսքով՝ առաջին և երկրորդ կուրսերում ստացած գնահատականները առանձնապես տպավորիչ չէին, սակայն ամեն ինչ փոխվեց օպտիկայի դասընթացի շնորհիվ։ Այդ տարիներին ուսանողները միջանկյալ քննություններից հաճախ ավտոմատ գնահատականներ էին ստանում, ինչը որոշակի «ազատություն» էր ստեղծում։ Տ․ Հակոբյանը խոստովանեց, որ դրա արդյունքում ունեցած ազատ ժամանակը ոչ միշտ էր հատկացնում ուսումնառությանը։

Սակայն մի օր նա չստացավ օպտիկայի դասընթացի միջանկյալ գնահատականներից մեկը, ինչի պատճառով վտանգվեց արտասահմանյան ծրագրի մասնակցելու հնարավորությունը։ Փորձելով իրավիճակը շտկել՝ նա դիմեց դասախոս Լևոն Ասլանյանին՝ ակնկալելով բացառություն, սակայն մերժում ստացավ։

«Որոշեցի ապացուցել, որ այնքան էլ վատ ուսանող չեմ»,- հիշեց նա։

Դրանից հետո սկսվեց լուրջ և հետևողական աշխատանքը։ Նա խորությամբ ուսումնասիրեց օպտիկան, կարդաց ոլորտի հիմնարար գրականությունը և պատրաստվեց այնպես, որ ի վերջո կարողացավ փոխել դասախոսի վերաբերմունքը իր նկատմամբ։

Բանախոսի խոսքով՝ հենց այդ դեպքից հետո սկսվեց գիտակցված վերաբերմունքը ուսումնառության հանդեպ։ Հետագայում Լևոն Ասլանյանը դարձավ նրա ավարտական աշխատանքի, ապա նաև՝ մագիստրոսական թեզի ղեկավարը։

«Դա իմ կյանքի շրջադարձային փուլերից մեկն էր»,- ընդգծեց նա։ 

Գիտելիք և կապեր՝ համալսարանի գլխավոր կապիտալը

Տիրան Հակոբյանի խոսքով՝ համալսարանը շրջանավարտներին տալիս է երկու ռեսուրս, որոնք ժամանակի ընթացքում չեն արժեզրկվում։

«Համալսարանը մեզ տալիս է երկու բան, որոնք երբեք հնարավոր չէ խլել՝ գիտելիք և կապեր»,- ասաց գործարարը։

Նրա համոզմամբ՝ բիզնեսում, քաղաքականության մեջ և, առհասարակ, մարդկային հարաբերություններում ամեն ինչ ի վերջո հանգում է վստահության, իսկ վստահությունը ձևավորվում է տարիների ընթացքում ստեղծված հարաբերությունների հիման վրա։

«Այդ իսկ պատճառով գրեթե բոլոր նախաձեռնություններում իմ գործընկերները համալսարանական ընկերներս են եղել»,- նշեց նա։ 

Նա օրինակ բերեց ինչպես իր առաջին բիզնես նախագծերը, այնպես էլ «Armenian Mushroom Company»-ն ու այլ նախաձեռնություններ, որոնց հիմքում եղել են դեռ ուսանողական տարիներին ձևավորված հարաբերությունները։ Տիրան Հակոբյանը խորհուրդ տվեց ուսանողներին առավելագույնս օգտվել համալսարանական միջավայրից և չսահմանափակվել միայն դասերով։

«Փորձե՛ք ձևավորել հնարավորինս շատ կապեր։ Դրանք միշտ պետք են գալու»,- շեշտեց բանախոսը։

Նրա խոսքով՝ ընկերությունները ձևավորվում են ընդհանուր հետաքրքրությունների շուրջ, իսկ այդ հետաքրքրությունները հետագայում վերածվում են մասնագիտական ուղու և կյանքի կարևոր համագործակցությունների։ Տիրան Հակոբյանը նշեց, որ իրենց կուրսի շրջանավարտներն այսօր աշխատում են տարբեր ոլորտներում՝ գիտությունից ու կրթությունից մինչև ֆինանսներ, պետական կառավարում և բիզնես։ Ավելին՝ նրանք սփռված են ամբողջ աշխարհով մեկ՝ Եվրոպայում, ԱՄՆ-ում, Բրազիլիայում, Նոր Զելանդիայում և այլուր։ Նրա խոսքով՝ նման ցանցի առկայությունը մեծ առավելություն է ստեղծում թե՛ մասնագիտական համագործակցության, թե՛ նոր հնարավորություններ գտնելու տեսանկյունից։

Ամփոփելով խոսքը՝ նա խոստովանեց, որ տարիներ անց համալսարան վերադառնալը դեռևս նույն զգացողություններն է առաջացնում։

«Այսօր, երբ քայլում էի Ֆիզիկայի ինստիտուտում, ինձ թվաց, թե ոչինչ չի փոխվել։ Ուսանողական տարիները, միևնույն է, մնում են կյանքի ամենահիշարժան շրջանը»,- այս խոսքերով իր ելույթն ամփոփեց ԵՊՀ շրջանավարտ, «GTB Holdings»-ի գլխավոր գործադիր տնօրեն Տիրան Հակոբյանը։

Առավել մանրամասն՝ տեսանյութում։