«ՀՆԴԿԱՍՏԱՆԻ ՊԱՏՄՈՒԹՅՈՒՆԸ ԼԻ Է ՀԱՅԱԶԳԻ ԿԵՐՊԱՐՆԵՐՈՎ ԵՎ ՀԱՅԱՍՏԱՆԻ ՀԵՏ ԿԱՊՎԱԾ ԴՐՎԱԳՆԵՐՈՎ». ԴՈԿՏՈՐ ԱՄԻԹԱԲՆ ՍԻՆԳՀ

Մինչև դասախոսությունը սկսելը Միջազգային հարաբերությունների ֆակուլտետի դեկան Գեղամ Պետրոսյանը ողջունեց ներկաներին և նշեց, որ ֆակուլտետը շարունակում է կազմակերպել արդեն ավանդույթ դարձած հանդիպումները քաղաքական գործիչների և տարբեր երկրներից ժամանած դասախոսների ու դիվանագետների հետ:

Դեկանը նշեց, որ առաջիկայում նախատեսվում է Նյու Դելիի Ջահվահարլալ Ներուի անվան համալսարանի հետ կնքել համագործակցության հուշագիր, որը հնարավորություն կտա համագործակցելու գիտական ոլորտում:

Դասախոսության ընթացքում բանախոսն ուսանողներին նախ ներկայացրեց Հնդկաստանի պատմությունը, Հայաստանի և Հնդկաստանի դիվանագիտական հարաբերությունները, ինչպես նաև անդրադարձավ Հայաստանում իր ուսումնասիրությունների հիմնական թեմային՝ Հայոց ցեղասպանությանը:

Ամիթաբն Սինգհը խոսեց Հարավային Կովկասում Ռուսաստանի Դաշնության քաղաքականության, ինչպես նաև Հնդկաստանի արդի քաղաքական վիճակի մասին:

«Սա իմ առաջին այցն է Հայաստան, և այստեղ գալու իմ նպատակն է ուսումնասիրել Հայոց ցեղասպանության մասին առկա փաստերը: Պետք է նշեմ, որ մինչև օրս Հնդկաստանը չի ընդունել Հայոց ցեղասպանությունը»,- ասաց նա:

Նրա խոսքով, Հայաստանը և Հնդկաստանն ունեն հին քաղաքակրթություն, բայց Հնդկաստանի հասարակությունը բավականաչափ տեղյակ չէ Հայաստանի և հայկական մշակույթի մասին, ուստի այս այցելությունը նպատակ ունի նաև զարգացնելու երկկողմ հարաբերությունները:

Դոկտոր Ամիթաբն Սինգհն ընդգծեց, որ Հնդկաստանի պատմությունը լի է հայազգի կերպարներով և Հայաստանի հետ կապված դրվագներով: «Հնդկաստանի շատ մշակութային շինությունների կառուցման գործում իրենց մասնակցությունն են ունեցել Եղեռնից փրկված բազմաթիվ հայեր: Ինչպես նաև անհրաժեշտ է նշել, որ բազում հայազգի առևտրականներ գործունեություն են ծավալել Հնդկաստանում այն ժամանակ, երբ Հնդկաստանը Բրիտանիայի գաղութն էր»,- հավելեց նա:

Անդրադառնալով Հայաստանի և Հնդկաստանի միջև սերտ դիվանագիտական հարաբերություններին՝ Ամիթաբն Սինգհը նշեց, որ դրանց մասին վկայում են երկու երկրների բարձրաստիճան պաշտոնյաների այցերը տարբեր մակարդակներում:

Հանդիպումից հետո Միջազգային հարաբերությունների ֆակուլտետի դեկանի տեղակալ Արթուր Իսրայելյանը նշեց, որ հանգամանորեն կքննարկվի նաև վերոհիշյալ համալսարանի և կենտրոնի հետ հուշագրի կնքման հարցը, քանի որ նմանատիպ ստորաբաժանումների հետ ունենք այդ պրակտիկան. «Դա հիմնականում հնարավորություն կտա համագործակցելու մի քանի ոլորտներում՝ ուսանողների փոխանակում, համատեղ հոդվածների հրապարակում, առցանց դասախոսություններ և այլն»:  

Նադեժդա Տեր-Աբրահամյան